ދިވެހި ފަތުރުވެރިކަމުގެ ސިނާއަތުގެ އެއް ބާނީ އަދި ޔުނިވާސަލްގެ ވެރިޔާ، މުހައްމަދު އުމަރު މަނިކު (އެމްޔޫ މަނިކު) ގެ އެންމެ ފަހުގެ އުންމީދަކީ  މިސްކިތެއް ބިނާކުރެއްވުން ކަމަަށާ އެކަމަށް ބިމެއް ހަމަޖައްސަވާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ހާލުކޮޅު ދެރަވެ ފަރުވާ ދެމުން ދަނިކޮށް އެމްޔޫމަނިކު މިއަދު ވަނީ އަވަހާރަވެފަ އެވެ.
އެމަނިކުފާނު ވަކިވެވަޑައިގަތުމާއި ގުޅިގެން މިނިސްޓަރު ފޮނުއްވެވި މެސެޖެއްގައި ވިދާޅުވީ މަނިކަކީ ދީނީ، އިޖްތިމާއީ އަދި ތައުލީމީ ކަންތައްތަކާއި މީހުން ބިނާކުރެއްވުމަށް ވަރަށް ބޮޑު އަހައްމިއަޔަތުކަމެއް ދެއްވި ބޭފުޅެއް ކަމަށެވެ.
އަދި މިސްކިތްތައް ބިނާކުރެއްވުމާއި މަރާމާތު ކުރެއްވުމަށް އެހީތެރިކަން ދެއްވި ބޭފުޅެއް ކަމަށެވެ. އެމަނިކުފާނު އަވަހާރިވި އާލާސްކަންފުޅާ ގުޅިގެން ސިންގަޕޫރަށް ފުރުއްވުމުގެ ކުރިން ވެސް ހުޅުމާލެ ސަރަހައްދުގައި ބޮޑު މިސްކިތެއް ބިނާކުރެއްވުމަށް ބޭނުންވެ އެކަމަށް އެދި ސިޓީއެއް މިނިސްޓްރީ އަށް ފޮނުއްވާފައިވާ ކަމަށާ އެމަނިކުފާނުގެ ހަޔާތުގެ އެންމެ ފަހުގެ އުންމީދަކީ ވެސް މިސްކިތެއް ބިނާކުރެއްވުން ކަމަށް މިނިސްޓަރު ވިދާޅުވި އެވެ.
ސިޓީ އެއް ފޮނުއްވުމުގެ އިތުރުން ބޭފުޅަކު ފޮނުއްވައި އެއީ ވަރަށް ބޮޑަށް ބޭނުންފުޅުވާ ކަމެއް ކަމަށާއި ވީ އެންމެ އަވަހަކަށް މިސްކިތް އެޅުމަށް ޖާގައެއް ހަމަ ޖައްސަވައި ދެއްވުމަށް އެދިވަޑައިގެންފައިވާ ކަމަށް ވެސް ވިދާޅުވި އެވެ.
“އަޅުގަނޑުމެންވަނީ މިހާރު ޖާގައެއް ވެސް އެކަމަށް ހުޅުމާލެ ސަރަހައްދުގައި ހަމަޖައްސާފަ. މާތް ﷲ އެމަނިކުފާނަށް ސުވަރުގޭގައި ގަނޑުވަރެއް ބިނާކުރައްވާށި،” މިނިސްޓަރު ޝަހީމްގެ މެސެޖުގައިވެ އެވެ.