ފެނަކަ ކޯޕަރޭޝަނުން ކުރިއަށްގެންދާ މުވައްޒަފުން މަދުކުރުމުގެ ޕްރޮގްރާމް ފުރިހަމައަށް ތަންފީޒުކޮށް ނިމޭއިރު، ކުންފުނީގެ ޚަރަދުތަކުން ގާތްގަނޑަކަށް 22 މިލިއަން ރުފިޔާ ސަލާމަތް ކުރެވޭނެ ކަމަށް އެ ކުންފުނީގެ މެނޭޖިން ޑިރެކްޓަރު މުހައްމަދު އަފީފް ހުސައިން ވިދާޅުވެއްޖެއެވެ.
ޕީއެސްއެމް އަށް ދެއްވި އިންޓަވިއުއެއްގައި އަފީފް ވިދާޅުވީ، ފެނަކައިގެ ބައެއް ޑިޕާޓްމަންޓްތަކުގައި މިހާރުވެސް މަސައްކަތަށް ބޭނުންވާ ވަރަށްވުރެ އިތުރަށް މުވައްޒަފުން އެބަތިބި ކަމަށެވެ. ގާތްގަނޑަކަށް 8،000 މުވައްޒަފުން މަސައްކަތްކުރާ މި ކުންފުނިން ކޮންމެ މަހަކު މުސާރައިގެ ގޮތުގައި އެކަނިވެސް 90 މިލިއަން ރުފިޔާ ހޭދަކުރާކަން އޭނާ ފާހަގަކުރެއްވިއެވެ. އެހެންކަމުން، ފެނަކައަކީ ދެމެހެއްޓެނިވި ވިޔަފާރިއަކަށް ހެދުމަށްޓަކައި މުވައްޒަފުންގެ އަދަދު އެކަށީގެންވާ މިންވަރަކަށް މަދުކުރުމަކީ ކޮންމެހެން ކުރަންޖެހޭ ކަމެއް ކަމަށް އޭނާ ވިދާޅުވިއެވެ.
"ރަށްރަށަށް ދަތުރުކުރާއިރު، މުވައްޒަފުންނާއި ރަށްރަށުގެ ރައްޔިތުންވެސް އެދެނީ މި އިސްލާހީ މަސައްކަތް އަވަސްކުރުމަށް. މި މަސައްކަތް ނިމުމުން، ކުންފުނީގެ ވަސީލަތްތައް ރަނގަޅު ގޮތުގައި ބޭނުންކުރެވި، ހިންގުން މިހާރަށްވުރެ ހަރުދަނާވެގެންދާނެ،" އަފީފް ވިދާޅުވިއެވެ.
އަފީފް އިތުރަށް ތަފްސީލުކޮށްދެއްވި ގޮތުގައި، މުވައްޒަފުން މަދުކުރުމުގެ ޕްރޮގްރާމް ކުރިއަށްގެންދަނީ ގައުމީ ނަޒަރަކުން ބަލައިގެން ކަމަށާއި، މީގެ ފައިދާ މުޅި ކުންފުންޏަށް ކުރާނެއެވެ. އޭނާ ވިދާޅުވި ގޮތުގައި ބޭނުންވާ ވަރަށްވުރެ ގިނައިން މުވައްޒަފުން ތިބުމުގެ ސަބަބުން ހިންގުމުގެ ޚަރަދު ބޮޑުވެ، މަސައްކަތުގެ ފެންވަރު ދަށްވެ، އަވަހަށް ނިންމަންޖެހޭ ކަންކަން ލަސްވުމަށް މެދުވެރިވެއެވެ.
ފެނަކައިގެ ޚިދުމަތްތައް ރަނގަޅުކުރުމަކީ ރާއްޖޭގެ ހުރިހާ ރަށެއްގެ ރައްޔިތުންގެވެސް އުންމީދެއްކަން ފާހަގަކުރައްވަމުން އަފީފް ވިދާޅުވީ، ކުންފުނި ހިންގުމުގައި ދިމާވާ މައްސަލަތަކުގެ ނޭދެވޭ އަސަރު މުޅި މުޖުތަމައަށް ކުރާނެ ކަމަށެވެ. މިހާރު ކުރިއަށްދާ ރީސްޓްރަކްޗަރިންގް މަސައްކަތުގެ ދަށުން، އަމިއްލައަށް ވަޒީފާއިން ވަކިވާން ބޭނުންވާ މުވައްޒަފުންނަށް މާލީ އިނާޔަތްތަކާއެކު އެ ފުރުސަތު ވަނީ ހުޅުވާލާފައެވެ.
މި ސްކީމްގެ ދަށުން ވަޒީފާއިން ވަކިވުމަށް މިހާތަނަށް 97 މުވައްޒަފަކު ވަނީ ހުށަހަޅާފައެވެ. ފެނަކައިން މިހާރު ދަނީ އެ މުވައްޒަފުން ވަޒީފާއިން ވަކިކުރުމަށް ބޭނުންވާ އިދާރީ މަސައްކަތްތައް ކުރަމުންނެވެ.