މިހާރު ކުރިއަށްދާ އަކުއާސްޕްރިންގް ސައުތު އެފްރިކާ އިންޓަނޭޝަނަލްގެ ފައިނަލުން ރިވައިވަލް ސްޕޯޓްސްގެ ރާއްޖޭގެ ގައުމީ ޓީމުގެ ޕެއާ، އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ފައިނަލަށް ދަތުރުކޮށްފި އެވެ.
އަންހެން ޑަބަލްސް ކުއާޓާގައި ނަބާ އާއި ނަބީގެ ޕެއާ އިން، ބައްދަލުކުރީ ދެކުނު އެފްރިކާގެ ޑެބޯރާ ގޮޑްފްރޭ އާއި އަންރީ ޝޫންސްއާ އެވެ. އެ މެޗުން ނަބީ އާއި ނަބާގެ ޕެއާ އިން 21-17 އާއި 21-13 އިން މޮޅުވިއިރު، ސެމީ ފައިނަލުގައި ވަނީ މޮރިޝަސްގެ ޝިއާރާ ހައު ހޮން އާއި އެލްސާ ހައު ހޮން އަތުން ތިން ސެޓު ކުޅެގެން މޮޅުވެފަ އެވެ. މެޗުގެ ސެޓުތައް ދިޔައީ، 21-19، 18-21 އަދި 21-14 އިންނެވެ. ފައިނަލުގައި މިއަދު ނަބާ އާއި ނަބީގެ ޕެއާ އިން ކުޅޭނީ ދެކުނު އެފްރިކާގެ އެމީ އެކަމަން އާއި ޖޮހަނިޓާ ޝޯލްޓްޒްގެ ޕެއާއާ އެވެ.
ނަބާ އާއި ނަބީ ވަނީ، ރިވަައިވަލް އިން މި ފަހަރު ޒެމްބިއާ އާއި ބޮޓްސްވާނާ އިންޓަނޭޝަނަލްގައި ވާދަކުރިއިރު، އަންހެން ޑަބަލްސް އިން ރިހި މެޑަލް ހޯދައިފަ އެވެ.
އަންހެން ސިންގަލްސްގެ ކުއާޓާގައި މޮރިޝަސްގެ ތިޔާ ބުރުތުންއާ ދެކޮޅަށް ތިން ސެޓު ކުޅެ، މޮޅުވެގެން ނަބާ ވަނީ ސެމީ ފައިނަލުގައި ކުޅެފަ އެވެ. ސެމީގައި ޖޮހަނިޓާއާ ކުޅެގެން ނަބާ ބަލިވީ 21-12، 21-08 އިންނެވެ.
ފިރިހެން ޑަބަލްސްގެ ކުއާޓާ ފައިނަލުގައި ޒަޔާން ޒަކީ އާއި ނިބާލް އަހުމަދުގެ ޕެއާ އިން އޮސްޓްރޭލިއާގެ އަވިނާޝް ސްރިނިވާސް އާއި އެފްރައިމް ސްޓެފެންގެ ޕެއާއާ ކުޅެގެން ވަނީ 21-14، 21-13 އިން ބަލިވެފަ އެވެ.
މިކްސް ޑަބަލްސްގައި، ޒަޔާން އާއި ނަބާގެ ޕެއާ އިން ކުއާޓާގައި ދެކުނު އެފްރިކާގެ އެންތަނީ ފިލިޕްސް އާއި އަންރީ ޝޫނީސްގެ ޕެއާ ބަލިކޮށް ސެމީ ފައިނަލަށް ދަތުރުކުރި އެވެ. ސެމީގައި ދެކުނު އެފްރިކާގެ ރޮބަޓް ސަމާސް އާއި އެމީ އެކަމަން އަތުން ވަނީ 21-08، 21-14 އިން ބަލިވެފަ އެވެ.