މުއިއްޒުގެ ބޮޑު ސްކޭމެއް، ރަށްރަށުގައި ޕާސްޕޯޓު ޕްރިންޓެއް ނުކުރޭ! މުއިއްޒުގެ ބޮޑު ސްކޭމެއް، ރަށްރަށުގައި ޕާސްޕޯޓު ޕްރިންޓެއް ނުކުރޭ!

ރައީސް މުހައްމަދު މުއިއްޒުގެ ވައުދެއްގެ ގޮތުގައި، ޕާސްޕޯޓު ހެއްދުމުގެ ހިދުމަތް މުޅި ރާއްޖެއަށް ފުޅާކުރުމުގެ ނަމުގައި ބޮޑު މަޝްރޫއުއެއް ކުރިޔަށް ގެންދިޔަ ނަމަވެސް، އެއީ ބޮޑު އޮޅުވާލުމެއްކަން އަދަދު އަށް ހާމަވެއްޖެ އެވެ.
ސަރުކާރުގެ ބައެއް އޮފިޝަލުންނާއި ބައެއް ކައުންސިލްތަކުގެ އިސްވެރިން މި ނޫހާ ވާހަކަ ދައްކަމުން ބުނީ ޕާސްޕޯޓު ހެއްދުމުގެ ހިދުމަތް ފެށި ކަމަށް ސަރުކާރުން ބުނި ނަމަވެސް، އެއީ ހަގީގަތެއް ނޫން ކަމަށާއި، މާލެ ފިޔަވައި އެއްވެސް ރަށެއްގައި ޕާސްޕޯޓު ޕްރިންޓު ނުކުރާ ކަމަށެވެ.
"މާލެ ފިޔަވައި އެހެން އެއްވެސް ރަށެއްގައި އަދި ޕާސްޕޯޓެއް ޕްރިންޓެއް ނުކުރޭ،" އެ މައުލޫމާތު އެނގޭ އޮފިޝަލަކު، ނަން ނުޖެހުމަށް ޝަރުތުކޮށް ބުންޏެވެ.
މުއިއްޒު އަތޮޅުތަކަށް ކުރެއްވި ދަތުރުތަކުގައި ޕާސްޕޯޓު ހެއްދުމުގެ ހިދުމަތް ފެށި ބައެއް ރަށްތަކުގެ ކައުންސިލުން ބުނީ އެ ރަށްރަށުގައި ޕާސްޕޯޓު ޕްރިންޓުކުރުން ކުރިއަށް ނުގެންދާ ކަމަށެވެ.
"މިރަށުގެ ކައުންސިލުން ވެސް ސަރުކާރުން އަންގައިގެން 400،000 ރުފިޔާ ހަރަދުކުރަން ޖެހުނު ހާއްސަ ކޮޓަރިއެއް ތަރައްގީކުރުމަށާއި ބައެއް ސާމާނު ހޯދަން. ރަށުގައި ޕާސްޕޯޓު ހައްދާ ވާހަކަ އިއުލާނު ކުރިޔަސް އެއީ އަދި ނުވާ ކަމެއް. މިހާރު ވެސް ފްލައިޓު އޮންނަ ދުވަސްތަކުގައި ޕާސްޕޯޓު ފޮނުވަނީ ޕްރިންޓުކޮށްފައި،" ޕާސްޕޯޓުގެ ހިދުމަތް ފެށި ކަމަށް ބުނާ ކައުންސިލެއްގެ ރައީސް ވިދާޅުވި އެވެ.
އިމިގްރޭޝަން ދާއިރާގެ ކަންކަން އެނގޭ މީހަކު ބުނީ ޕާސްޕޯޓު ހެއްދުމަކީ އާދައިގެ މަސައްކަތެއް ނޫން ކަމަށާއި، ޕާސްޕޯޓު ޕްރިންޓުކުރާ މަރުކަޒަކީ ބައިނަލްއަގުވާމީ މިންގަނޑުތަކަށް ހުންނަންޖެހޭ ތަނެއް ކަމަށެވެ.
"އެއީ ކޮންމެ ރަށެއްގައި ކޮންމެ ތަނެއްގައި ކުރެވޭނެ ކަމެއް ނޫން. އެގޮތަށް ދޫކޮށްލުމަކީ ގައުމީ ސަލާމަތަށް ވެސް ގެއްލުމެއް،" އޭނާ ބުންޏެވެ.
ރަށްރަށުގައި ތިބެ ޕާސްޕޯޓަށް ހުށަހެޅޭއިރު، ރަށްރަށުގެ އޮފީސް މެދުވެރިކޮށް ޕާސްޕޯޓު ލިބޭ ގޮތް ކުރިން ވެސް ރާވާފައި އޮވެ އެވެ.
ޕާސްޕޯޓު ހެއްދުމުގެ ހިދުމަތް ފެށި ކަމަށް އިއުލާނު ކުރި ބައެއް ރަށްތަކަކީ އެއްވެސް ވަރަކަށް އެކަމުގެ ބޭނުމެއް ނެތް ރަށްރަށް ކަމަށް، އިތުބާރު ކުރެވޭ ސަރުކާރުގެ މަސްދަރަކުން ބުންޏެވެ. އޭގެ މިސާލެއްގެ ގޮތުގައި އޭނާ ނެގީ ކ. ތުލުސްދޫ އެވެ.
ރަށްރަށުގައި ޕާސްޕޯޓު ހައްދައިގެން ދޫނުކުރާއިރު، ބައެއް ރަށްރަށުގައި މުއިއްޒު ވިދާޅުވެފައި ވަނީ ޕާސްޕޯޓު ހެއްދުމުގެ ހިދުމަތް ފެށުމަކީ ރައްޔިތުން ވަރަށް ބޮޑު ހިތްހަމަޖެހުމެއް ގުނުވާނެ ކަމެއް ކަމަށެވެ.
"މިއަދު މި ފެށިގެންދިޔަ އައި.ޑީ.ކާޑު އަދި ޕާސްޕޯޓް ޚިދުމަތަކީ އިރާދަކުރެއްވިއްޔާ ތިޔަބޭފުޅުންނަށް ވަރަށް ބޮޑު ހިތްހަމަޖެހުމެއް، އެއިން ލިބިގެންދާނެ ކަމަކަށްވާނެކަން ޔަޤީން،" ހއ. އިހަވަންދޫގައި ޖެނުއަރީ 29، 2025 ގައި ބޭއްވި ޖަލްސާގައި މުއިއްޒު ވިދާޅުވި އެވެ.
ޕާސްޕޯޓު ހެއްދުން މުޅި ރާއްޖެއަށް ފުޅާކުރުމުގެ މަޝްރޫއު ފެށީ ނޮވެމްބަރު 16، 2024، ގަ އެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ