ގާޒާއަށް ކަރަންޓުގެ ހިދުމަތް ފޯރުކޮށްދިނުން ހުއްޓާލަން ނިންމައިފި ގާޒާއަށް ކަރަންޓުގެ ހިދުމަތް ފޯރުކޮށްދިނުން ހުއްޓާލަން ނިންމައިފި

ބަރަކާތްތެރި ރޯދަ މަހު އިޒްރޭލުގެ އެނާޖީ މިނިސްޓްރީން ފަލަސްތީނުގެ ގާޒާއަށް ކަރަންޓުގެ ހިދުމަތް ފޯރުކޮށްދިނުން ހުއްޓާލަން އަމުރުކޮށްފި އެވެ.
އިޒްރޭލުގެ އެނާޖީ މިނިސްޓަރު އެކްސް ގައި ކުރެއްވި ޕޯސްޓެއްގައި ވިދާޅުވީ ވަރަށް ގިނަ ވާހަކަތައް ދެއްކިއްޖެ ކަމަށާއި މިއީ އަމަލުން ކަންކަން ކުރަންވީ ވަގުތު ކަމަށެވެ.
އިޒްރޭލުން ގާޒާއަށް ކަރަންޓުގެ ހިދުމަތް ފޯރުކޮށްދިނުން ހުއްޓާލަން ނިންމީ، ގާޒާއަށް ޒަރޫރީ ބޭނުންތައް ފުއްދުމަށް ބޭނުންވާ ތަކެތި ފޯރުކޮށްދިނުން އިޒްރޭލުން ހުއްޓާލިތާ ހަފްތާއެއް ފަހުންނެވެ.
އިޒްރޭލުން ގާޒާގައި ހިންގަމުންދާ ނަސްލުހޭދަ 15 މަހަށް ފަހު އެއްބަސްވުމެއްގެ ދަށުން ވަނީ ހުއްޓާލައިފަ އެވެ. އެކަމަކު އެ އެއްބަސްވުމުގެ ދަށުން އިޒްރޭލުން ގާޒާއަށް ފޯރުކޮށްދޭން އެއްބަސްވި އަސާސީ ހިދުމަތްތަކުން އަންނަނީ މަހުރޫމް ކުރަމުންނެވެ.
ރިޕޯޓްތައް ބުނާ ގޮތުން ހަނގުރާމަ މެދުކަނޑާލަން އިޒްރޭލުން އެއްބަސްވި ފުރަތަމަ މަރުހަލާގެ މުއްދަތު އެ ގައުމުން ބޭނުންވަނީ އިތުރު ކުރުމަށެވެ. ނަމަވެސް ހަމާސް އިން ބޭނުންވަނީ ފުރަތަމަ މަރުހަލާގެ މުއްދަތު އިތުރުނުކޮށް އެއްބަސްވުމުގެ ދެވަނަ މަރުހަލާއަށް ދިއުމަށެވެ.
ގާޒާއިން މިވަގުތު ކާބޯތަކެތި ހޯދުމަށް އޮތް ދޮރުތައް އިޒްރޭލުން ބަންދު ކުރުމުން، ފަލަސްތީނުގެ ރައްޔިތުންނަށް ކާބޯތަކެތި ހޯދަން އަންނަނީ ބޮޑެތި ގޮންޖެހުންތައް ކުރިމަތިވަމުންނެވެ.
އިޒްރޭލުން ގާޒާއަށް ދެމުންދާ ހަމަލާތައް އަދިވެސް އެއްކޮށް ހުއްޓުމަކަށް އައިސްފައި ނުވާއިރު، ހަނގުރާމައިގައި މިހާތަނަށް ފަލަސްތީނުގެ 50،000 އާ ގާތްކުރާ އަދަދަކަށް މީހުން ވަނީ މަރުވެފަ އެވެ. އޭގެ ތެރޭގައި ގިނައީ ކުޑަކުދިންނާއި އަންހެނުންނެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ