މީރާގެ ކޮމްޕްލަޔަންސް ރިސްކް މެނޭޖްމަންޓް ޕޮލިސީގެ ދަށުން 2025-2026ގެ ކޮމްޕްލަޔަންސް އިމްޕްރޫވްމަންޓް ޕްލޭން އާންމުކޮށްފިއެވެ.
މި ޕްލޭންއަކީ ކުރިއަށް އޮތް ދެ އަހަރަށް ކަނޑައެޅި ކޮންޕްލަޔަންސް އިމްޕްރޫވްމަންޓް ޕްލޭންގައި ރާވާފައިވާ ހަރަކާތްތައް އަމާޒުކޮށްފައި ވަނީ ޓެކްސް ދައްކާ ފަރާތްތަކުގެ ސައްހަ އަދި އަދާހަމަ ރަޖިސްޓްރީއެއް ބެލެހެއްޓުމާއި، ސުންގަޑިއަށް ބަޔާން ހުށަހަޅާ މިންވަރު އިތުރުކުރުމުގެ އިތުރުން ހުށަހަޅާ ބަޔާންތަކުގެ ފުރިހަމަކަން ކަށަވަރުކުރުމަށް ކަމަށް މީރާއިން ބުންޏެވެ.
އެ އޮތޯރިޓީން ބުނީ ކޮމްޕްލަޔަންސް އިމްޕްރޫވްމަންޓް ޕްލޭން އެކުލަވާލައިފައި ވަނީ ވަކިވަކި ސިނާއަތްތަކުން ޓެކްސް ދެއްކުމުގައި ހުރި ރިސްކުތަކާއި އެ ރިސްކުތަކާ މުނާސަބު ފިޔަވަޅު އެޅުމަށް ހިންގޭނެ ހަރަކާތްތައް ހިމަނައިގެން ކަމަށެވެ.
ޓެކްސް ދައްކާ ފަރާތްތައް ޓެކުހާ ގުޅޭ އިލްތިޒާމްތައް ފުރިހަމަކުރަމުންދާ މިންވަރު ގަވާއިދުން މޮނިޓާކުރުމާއި ދައްކަންޖެހި ނުދައްކައިވާ ފައިސާ ހޯދުމުގެ މަސައްކަތްތައް އިތުރަށް ހަރުދަނާ ކުރުމަށްޓަކައި އެންފޯސްމަންޓް އުސޫލުތައް ވަރުގަދަކުރުމުގެ އިތުން ޓެކުހަށް މަކަރު ހަދާ ފަރާތްތައް ދެނެގަނެ އެ ފަދަ ފަރާތްތައް ހުއްޓުވުމަށް އެކަށީގެންވާ ފިޔަވަޅުތައް އެޅުން ހިމެނޭކަމަށް މީރާއިން ބުންޏެވެ.