ފުރުގާން މިސްކިތަށް ގެއްލުންދީ އެ މިސްކިތުގައި ހުރި މުސްޙަފުތަކެއް އުކާލި މައްސަލަ ފުލުހުން ބަލަން ފަށައިފިއެވެ.
މިއަދުގެ ފަތިސް ނަމާދު ކުރިން، މީހަކު ފުރްޤާން މިސްކިތަށް ވަދެ، އެ މިސްކިތުގެ ފަހަތުގައި ހުރި މުސްޙަފްތައް މުޅިތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ތަޅާލައި އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް ވަނީ އުކާލާފައެވެ.
މި މީހާއަކީ ނަފްސާނީ ބައްޔެއްގެ ސަބަބުން ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގައި ފަރުވާދިން މީހެއް ކަމަށް ވޮއިސްްއަށް މައުލޫމާތު ލިބިފައިވާއިރު، އޭނާ ވަނީ،  މީގެ ކުރިންވެސް އެތައް ފަހަރަކު މުސްޙަފްތައް އުކާލުމާއި މިސްކިތަށް އެކިއެކި ގެއްލުންދީފައި ކަމަށް އެ މިސްކިތަށް ދާމީހުން ބުނެފައިވެއެވެ. 
Advertisement
އަދި މީނާގެ މި މައްސަލަ، އިޖުތިމާޢީ ތަރައްގީއާއި ބެހޭ ވުޒާރާއާއި، މާލެ ސިޓީ ކައުންސިލްގެ އިތުރުން ފުލުހުންނަށްވެސް ތަކުރާރުކޮށް ހުށަހަޅާފައިވާކަން މިސްކިތަށް ދާމީހުން ވޮއިސް އަށް މައުލޫމާތު ދީފައިވެއެވެ.
ރޭގެ ހާދިސާއާއި ގުޅިގެން ފުލުހުން ބުނީ، މި މައްސަލަ މިއަދު ފަތިހު ރިޕޯޓް ކޮށްފައިވާ ކަމަށާ މައްސަލަ ތަހުގީގު ކުރަމުންދާ ކަމަށެވެ. 
މިފަދަ ހާދިސާ ތަކުރާރުވާއިރު، ފުރުގާން މިސްކިތަކީ ސީސީޓީވީ ހަރުކޮށްގެން 24 ގަޑި އިރު މާލެ ސިޓީ ކައުންސިލްގެ ފާރަވެރިކަމުގެ ދަށުގައި ހުންނަ މިސްކިތެއްކަން ފާހަގަކޮށްލަންޖެހެއެވެ.