ހއ. އިހަވަންދުއަށް ނިސްތަބްވާ ކުލަބު ޕޯލްސްޓާއިން އިންތިޒާމުކޮށްގެން ބޮޑުތިލަދުންމަތީގައި މިހާތަނަށް ބާއްވާ އެންމެ އަގުބޮޑު ފުޓްބޯޅަ މުބާރާތް ކަމަށްވާ "މައި ކަޕް 2024" ގެ ފައިނަލަށް އެންވީކޭ އާއި ކުޅިމަގު ދަތުރުކޮށްފިއެވެ.
މުބާރާތުގެ ފައިނަލުގެ ފުރަތަމަ ޖާގަ ހއ. ދިއްދުއަށް ނިސްބަތްވާ ހީވެސްނުވޭ ބަލިކޮށް ކުޅިމަގުން ހޯދީ އިއްޔެ ހަވީރު ކުޅުނު ސެމީ ފައިނަލް މެޗު 4-1 ގެ ނަތީޖާއަކުން ކާމިޔާބުކޮށްގެންނެވެ.
މި މެޗުގެ 27 ވަނަ މިނިޓުގައި ކުޅިމަގުގެ ނައިޖީރިއާ ކުޅުންތެރިޔާ ޖިމޯހް އިބްރާހީމް ކާމިޔާބުކޮށްދިން ލަނޑާއެކު އެ ޓީމަށް އުއްމީދެއް ލިބުނެވެ. އަދި ފުރަތަމަ ހާފުގެ 32 ވަނަ މިނެޓްގައި އިބްރާހިމް ކާމިޔާބުކޮށްދިން ދެވަނަ ލަނޑާއެކު ކުޅިމަގަށް ވަނީ ބޮޑު އިތުބާރެއް ލިބިފައެވެ.
ކުޅިމަގުގެ ތިންވަނަ ލަނޑު އަލީ ނާއިޝް ކާމިޔާބުކޮށްދިންއިރު، ހަތަރުވަނަ ލަނޑު ޖަހައިދިނީ މެޗުގައި ލަނޑު ޖަހަން ގިނަ ފުރުސަތުތަކެއް ލިބުނު އާދަމް ނާއިލްއެވެ. މި މެޗުގައި ހީވެސްނުވޭއިން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އަހުޒަމް ރަޝީދެވެ. މެޗުގެ މޮޅު ކުޅުންތެރިއަކަށް ހޮވުނީ ނައިޖީރިއާގެ ޖިމޯހް އިބްރާހީމެވެ.
މި މުބާރާތުގެ ފައިނަލުގެ ދެވަނަ ޖާގަ އެންވީކޭއަށް ލިބުނީ ރޭ ކުޅުނު ސެމީ ފައިނަލް މެޗުގެ ދެވަނަ ހާފުގެ ބޮޑުބައި ކުޅެ ނިމުނު ފަހުން ހިނގައިދިޔަ ކަންކަމަށް ބެލުމަށްފަހު، މުބާރާތުގެ އިންތިޒާމު ކޮމިޓީން ނިންމުމުންނެވެ. ހޯރަ ޔުނައިޓެޑާ ދެކޮޅަށް މެޗުގެ 74 ވަނަ މިނިޓުގައި ކުޅުން ހުއްޓާލިއިރު، 2-0 ގެ ނަތީޖާއަކުން ލީޑުގައި އޮތީ އެންވީކޭ އެވެ.
މެޗުގެ ފުރަތަމަ ހާފްގައި އެންވީކޭއިން ވަނީ ދެ ލަނޑު ޖަހާފައެވެ. މެޗުގެ ކުޅުން މެދުކަނޑާލީ ފަހު ހާފުގައި އެންވީކޭގެ ޕެނަލްޓީ އޭރިއާ ތެރެއިން ކުޅުންތެރިއެއްގެ އަތުގައި ބޯޅަ ޖެހުމުން، ރެފުރީ ޕެނަލްޓީ ނުދިނުމާ ގުޅިގެން އުފެދުނު ހިތްހަމަނުޖެހުމުގެ ތެރެއިންނެވެ. ނަމަވެސް މެޗު އިތުރަށް ކުރިއަށްގެންދެވޭނެ މާހައުލެއް ނެތުމުގެ ސަބަބުން މެޗު ނިންމުމަށްފަހު، މުބާރާތުގެ އިންތިޒާމު ކޮމިޓީން ވަނީ މެޗު ކުޅުން ހުއްޓާލިއިރު ދެ ލަނޑުގެ ލީޑުގައި އޮތް އެންވީކޭ މެޗުން މޮޅުވީ ކަމަށް ނިންމާފައެވެ.
މައި ކަޕް ފުޓްބޯޅަ މުބާރާތުގެ ގްރޫޕް ފިޔަވަހި މި އަހަރު ކުރިއަށްދިޔައީ ދެ ގްރޫޕަކަށް ބަހާލައިގެންނެވެ. އިހަވަންދޫ ޓީމްތައް ހިމެނުނީ ގްރޫޕް އޭގައެވެ. އަދި ރަށުން ބޭރު ޓީމުތައް ހިމެނީ ގްރޫޕް ބީގައެވެ. މުބާރާތުގައި ޖުމްލަ ނުވަ ޓީމު ވަނީ ވާދަކޮށްފައެވެ.
2007 ވަނަ އަހަރުން ފެށިގެން މިހާތަނަށް މައި ކަޕުގެ 13 މުބާރާތެއް ބާއްވާފައިވާއިރު، މިއީ މި ސަރަހައްދުގައި ބާއްވަމުން އަންނަ އެންމެ ވަރުގަދަ އެއް މުބާރާތެވެ. މި އަހަރުގެ މުބާރާތުގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމާފައެވެ.