ހައްޖު ކޯޕަރޭޝަންގެ ހަވާލުގައި މިއަހަރު އުމްރާއަށް ދިޔަ އުމްރާވެރިންގެ ތެރޭގައި ހިމެނޭ ތުއްތު ކުދިންނަށް ޚާއްސަ ހަވީރެއް ބާއްވައިފި އެވެ.
އެކްސްގައި ކުރެއްވި ޕޯސްޓެއްގައި ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ވިދާޅުވީ ސައުދީގައި ކުރިޔަށް ގެންދިޔަ މި ހަވީރަކީ ހައްޖު ކޯޕަރޭޝަންގެ ހަވާލުގައި ޑިސެމްބަރު އުމްރާގެ އަޅުކަމަށް މައްކާއަށް އައި އުމްރާވެރިންގެ ތެރޭގައި ހިމެނޭ ތުއްތު ކުދިންނަށް ހާއްސަކޮށްގެން "ހައްޖު ކޯޕަރޭޝަން ތުއްތު އުމްރާ ވެރިންނާއެކު" ނަމުގައި ކުރިޔަށް ގެންދިޔަ ހަވީރެއް ކަމަށެވެ.
މި ހަވީރުގައި ދީނީ މައުލޫމާތު ދިނުމާއި ތުއްތު ކުދިންގެ ހިތުގައި އިސްލާމްދީނަށް ލޯބި ޖެއްސުމަށް ޚާއްސަ ހަރަކާތްތަކެއް ކުރިޔަށް ގެންދެވުނު ކަމަށް ޝަކީލް ވިދާޅުވި އެވެ.
މިއަހަރު އުމްރާގެ އަޅުކަމަށް ހައްޖު ކޯޕަރޭޝަންގެ ހަވާލުގައި 822 އުމްރާވެރިން ވަނީ ގޮސްފަ އެވެ. އުމްރާގެ އަޅުކަން ފުރިހަމަކުރުމަށްފަހު އުމްރާވެރިން މިއަދުން ފެށިގެން ރާއްޖެ އަންނަން ފަށާނެ އެވެ.