ސްޓެލްކޯއަށް އަލަށް ގެނެސް ބެހެއްޓި 8.9 މެގަވޮޓްގެ ޖަނަރޭޓަރުގެ ޓެސްޓުތައް ނިމި ކަރަންޓުގެ މައްސަލައަށް ހައްލެއް އަންނާނީ އަންނަ މަހުގެ ފަހުކޮޅު ކަމަށް ސްޓެލްކޯ އިން ބުނެފިއެވެ. މާލެއަށް ފޯރުކޮށްދޭ ކަރަންޓުގެ ހިދުމަތް އިތުރަށް ފުރިހަމަކޮށް ކަރަންޓު ކެނޑުމުގެ މައްސަލައަށް ހައްލެއް ހޯދުމަށް ސަރުކާރުގެ މައި ކަރަންޓް ކުންފުނި، ސްޓެލްކޯއަށް ގެނައި އާ ޖަނަރޭޓަރު ހަރުކޮށް ކަރަންޓް ދިނުމަށް ޓެސްޓުތައް ހަދަން ފަށާފައިވަނީ މީގެ ހަފްތާއެއް ކުރިންނެވެ. އަދި ޖަނަރޭޓަރުގެ ޓެސްޓުތައް ކުރިއަށްދާއިރު މާލޭގެ އެކި ހިސާބުތަކުން އަންނަނީ ދޭތެރެދޭތެރޭން ކަރަންޓު ކެނޑެމުންނެވެ. ސްޓެލްކޯގައި މިއަދު ބޭއްވި ޕްރެސް ކޮންފަރެންސެއްގައި އެ ކުންފުނީގެ މެނޭޖިން ޑައިރެކްޓަރު އަބްދުއްޝުކޫރު ވިދާޅުވީ، ހައި ވޯލްޓޭޖް ކޭބަލަކަށް ލިބުނު ގެއްލުމެއްގައި ދެ ޖެނެރޭޓަރު ނިވެގެން މާލޭގެ ބޮޑު ބަޔަކުން ރޭ ދަންވަރު ކަރަންޓް ކެނޑިގެންދިޔަ މައްސަލަ ހައްލަކަށް އަންނަންދެން އާ ޖެނެރޭޓަރުގެ ޓެސްޓުތައް ކުރުން މަޑު ޖައްސާލާފައިވާ ކަމަށެވެ. "އެހެންނަމަވެސް ކޮންޓްރެކްޓަރުން ބޭނުންވަނީ އެމީހުންގެ ބައި ނިންމާފައި ދާން. އެމީހުންނަށް އެ ފުރުސަތު ނުލިބިއްޖެއްޔާ ގިނަ ވަގުތު ނަގަންޏާ ގަޑި ފަސްކުރަންޏާ އިތުރަށް އެމީހުން ލާރިވެސް ނަގާނެ އަޅުނގަޑުމެން އަތުން. އެއީ ވެސް ވިސްނަންޖެހޭ ކަމެއް. ނަމަވެސް ފޯރުކޮށްދެމުންދާ ހިދުމަތް މެދުކެނޑި ދަތިތައް ފޯރުވަންޏާ ކޮންމެހެން ގޮތެއް އެބަޖެހޭ ހައްލުކުރަން،" އަބްދުއްޝުކޫރު ވިދާޅުވިއެވެ. އޭނާ ވިދާޅުވި ގޮތުގައި، ރޭގެ ހާދިސާގައި ގެއްލުން ލިބުނު ކަރަންޓް ކޭބަލް މަރާމާތުކޮށް އެ މައްސަލަ ހައްލުކުރެވުނު ނަމަވެސް އާ ޖަނަރޭޓަރުގެ ޓެސްޓުތައް ކުރިއަށްދާނަމަ ކަރަންޓް ކެނޑިގެން ހިނގައިދާނެއެވެ. އޭޑީބީގެ ހިލޭ އެހީގައި ފިންލޭންޑްގެ ވަޓްސަލާ ކުންފުންޏާ ހަވާލުކޮށްގެން ސްޓެލްކޯއަށް އާ ޖަނަރޭޓަރެއް ގެނައީ މިއަހަރުގެ ޖަނަވަރީ މަހުގެ ތެރޭގައެވެ. މިއަދުގެ ޕްރެސްގައި ބައިވެރިވެވަޑައިގަތް ޕްރޮޖެކްޓްސްއާ ބެހޭ އިސްވެރިޔާ ސައިފް ވިދާޅުވީ، މިހާރު ކުރަމުންދާ ޓެސްޓުތަކަކީ ކޮންޓްރެކްޓަރާއި އިންޖީނު ވިއްކި ފަރާތުން ކުރަމުންދާ ޓެސްޓުތަކެއް ކަމަށާއި އެ ޓެސްޓުތައް މިމަހުގެ 30 ވަނަ ދުވަހު ނިމޭނެ ކަމަށެވެ. އަދި ކޮންޓްރެކްޓް އިންނަ ގޮތުން ރިލަޔަބަލް ޓެސްޓުތަކަށް 21 ދުވަސް ނަގާއިރު، އެ ޓެސްޓުތައް ކުރާނީ އަންނަ މަހުން ފެށިގެން ކަމަށް އޭނާ ވިދާޅުވިއެވެ. ސްޓެލްކޯއިން މީގެ ކުރިން ބުނީ، މާލޭގައި ބަހައްޓާފައިވާ އެ ކުންފުނީގެ 26 ޖަނަރޭޓަރުން މިވަގުތު 64 މެގަވޯޓުގެ ޖަނަރޭޓަރު ހިންގަމުންދާ އިރު އަލަށް ބަހައްޓާ ޓެސްޓުތައް ހަދަން ފެށި ޖަނަރޭޓަރާ އެކު ކެޕޭސިޓީ 72 މެގަވޯޓަށް އިތުރުވާނޭ ކަމަށެވެ. ސްޓެލްކޯއިން ބުނާ ގޮތުގައި، މިހާރު މާލޭގައި އެންމެ ގިނައިން ކަރަންޓް ބޭނުންކުރާ ވަގުތުތަކުގައި 55 މެގަވޯޓުގެ ކަރަންޓް ބޭނުންކުރެ އެވެ.