މިދިޔަ ހޮނިހިރު ދުވަހު ބޭއްވި ޕީޕީއެމްގެ ޕްރައިމަރީގެ ނަތީޖާ ގަބޫލުކުރައްވާ ކަމަށް އެ ޕްރައިމަރީގައި ބަލިވި އުމަރު ނަސީރު ވިދާޅުވި ކަމަށް އެ ޕާޓީގެ ރައީސް މައުމޫން އަބްދުލް ގައްޔޫމް މިރޭ ވިދާޅުވެއްޖެ އެވެ. ޕީޕީއެމްގެ ފުރަތަމަ ޕްރައިމަރީ އަށް ފަހު، އެއްބައިވަންތަކުގެ ޖަލްސާގެ ނަމުގައި މިރޭ އަލިމަސް ކާނިވާގައި ބޭއްވި ޖަލްސާގައި ކުރީގެ ރައީސް މައުމޫން ވިދާޅުވީ ޕްރައިމަރީގެ ނަތީޖާ، އުމަރަށް އެނގިވަޑަައިގެންނެވި ވަގުތު އޭނާ، އެ މަނިކުފާނަށް ފޯނުން ގުޅުއްވި ކަމަށެވެ. އަދި ޕްރައިމަައިރީ ކާމިޔާބުކުރެއްވި އަބްދުﷲ ޔާމީނަށް ފޯނުން ގުޅުއްވައި ތަހުނިޔާ ވިދާޅުވި ކަމަށާއި ޕްރައިމަރީގެ ކެމްޕޭނަށް އުމަރު ބޭނުންކުރެއްވި ޖަގަހަ ވެސް އެ ދުވަހުން ފެށިގެން ޕާޓީއަށް ދެއްވި ކަމަށް އުމަރު ވިދާޅުވި ކަމަށް މައުމޫނު ވިދާޅުވި އެވެ. އެއީ ޑިމޮކްރަސީގެ ނަމޫނާ ކަމަށް ވިދާޅުވެ އެކަމަށްޓަކައި އުމަރަށް، މައުމޫން ޝުކުރު ވެސް ދެންނެވި އެވެ. ނަމަވެސް ޕްރައިމަރީގައި އޮޅުވާލުމާއި މަކަރު ހެދުން ހިންގައި ވޯޓު ފޮއްޓަށް "ކަޅު ފަައިސާ" އަޅާފައިވާ ކަމަށް އުމަރު ރޭ ވަނީ ވިދާޅުވެފަ އެވެ. އުމަރަށް ސީދާ ގޮތެއްގައި ފާޑުވިދާޅު ނުވިޔަސް އޭނާ އަށް ނިސްބަތް ކުރައްވައި މައުމޫން މިރޭ ވިދާޅުވީ "އަސާސީ ގަވާއިދުގެ މަތީގައި އެއްްވެސް މެމްބަރަކަށް ނުހުރެވޭނެ" ކަމަށެވެ. މައުމޫން ވިދާޅުވީ ޕީޕީއެމްގެ ހުރިހާ މެމްބަރުން ވެސް އެންމެ ހުރުމަތްތެރިކޮށް ހިތަން ޖެހެނީ އަސާސީ ގަވާއިދަށް ކަމަށާއި މިފަދަ ޖަމާއަތެއްގައި ބޭނުން ގޮތަކަށް އުޅުމުގެ ހައްގެއް ނޯންނާނެ ކަމަށެވެ. އަސާސީ ގަވާއިދު ލާޒިމުކުރާ ގޮތުން ރިޔާސީ އިންތިހާބު ކާމިޔާބުކުރުމަށްޓަކައި ޕާޓީގެ މެމްބަރުން ތިބެން ޖެހޭނީ ރިޔާސީ ކެންޑިޑޭޓާއެކުގައި ކަމަށާއި އެހެންވެ، ރިޔާސީ ކެންޑިޑޭޓަށް އެހީތެރިކަން ދޭނީ ވަކި "މިވެނި ގޮތަކަށް އަމަލުކުރެއްވީމައޭ" އެއްވެސް ބޭފުޅަކަށް ވިދާޅުނު ނުވެވޭނެ ކަމަށް މައުމޫން ވިދާޅުވި އެވެ. ރޭގެ ޖަލްސާގައި އުމަރު ވިދާޅުވެފައިވަނީ ޔާމީނަށް ތާއިދުކުރައްވާނީ އެ މަނިކުފާނު ނަންގަވާ ޓީމެއްގެ ގޮތުން ކަމަށެވެ. ޕާޓީގެ މެމްބަރުންގެ އިހްލާސްތެރިކަން އަބަދު ޕާޓީއަށް އޮންނަންޖެހޭނެ ކަމަށައި އިހްލާސްތެރިކަމަކީ ވަކި ބޭފުޅަކަށް، އަދި "މައުމޫނަކަށް އޮންނަންވީ އެއްޗެއް ނޫން" ކަމަށް ވެސް މައުމޫން ވިދާޅުވި އެވެ. އަދި ރިޔާސީ އިންތިހާބުގެ ކުރިން ޕާޓީ މިހާރަށް ވުރެ ވަރުގަދަކުރުމަށްޓަކައި މިހާރު އެ ޕާޓީގައި ތިބި 31000 މެމްބަރުން، ކޮންމެ މެމްބަރަކު ދެ މެމްބަރުން ހޯދައި މެމްބަރުންގެ އަދަދު 93،000 މީހުންނަށް އިތުރުކުރުމަށް އެމަނިކުފާނު ގޮވާލެއްވި އެވެ. "ޕާޓީގެ ހުރިހާ މެމްބަރުން ވެސް އަޅުގަނޑު މިކުރި އިލްތިމާސް އަށް އަމަލީ ގޮތުން މަސައްކަތް ކުރުން އެދެން." މައުމޫން ވިދާޅުވި އެވެ. މިރޭގެ ޖަލްސާގައި އުމަރާއި އޭނާގެ ކެމްޕޭން ޓީމުގެ ގިނަ މެމްބަރުން ބައިވެރިއެއް ނުވެ އެވެ. އެހެން ނަމަވެސް އުމަރުގެ ޓީމުގައި ހިމެނިވަޑއިގަންނަވާ އިސްދޫ ދާއިރާގެ މެމްބަރު އަހުމަދު ރަޝީދު އިބްރާހީމާއި މުހަންމަދު ވަހީދު އިބްރާހީމް (ލޯޔަރު ވައްޑެ) ބައިވެރިވެވަޑައިގަތެވެ.