އިއްޔެ ބޭއްވިގެން ދިޔަ އައްޑޫ ސިޓީ ކައުންސިލްގެ ފޭދޫ ދާއިރާގެ މެދައިންތިޚާބުގެ ނަތީޖާއިން ދައްކުވައިދެނީ، ދިވެހި ރައްޔިތުން ނުފޫޒަށް ނުހެއްލޭނެ ކަން ކަމަށް އެމްޑީޕީގެ ޗެއަރޕާސަން އަލީ ވަހީދު ވިދާޅުވެއްޖެ އެވެ.
އިއްޔެ ބޭއްވުނު މެދައިންތިޚާބުގައި، ފޭދޫ ދާއިރާއަށް ކުރިމަތިލެއްވި އެމްޑީޕީގެ ކެންޑިޑޭޓު އަލީ ފަހްމީ މުހައްމަދަށް ލިބިވަޑައިގެންނެވީ 1،070 ވޯޓެވެ. އޭނާއާ ވާދަކުރެއްވީ ޕީޕީއެމްގެ އީނާ ނަސީރަށް ލިބިވަޑައިގެންނެވީ 868 ވޯޓެވެ.
އަލީ ވަހީދު ވިދާޅުވީ، ފޭދޫގައި ތާރު އެޅުމުގެ މަސައްކަތާއި ލެޕްޓޮޕް ބެހުމާއި، މިފަދަ ކަންކަން ކުރިޔަށް ދިޔަ ކަމަށާއި، ނަމަވެސް ފޭދޫއިން ސަރުކާރަށް ދިން މެސެޖަކީ، ދިވެހި ރައްޔިތުން ދެން މިފަދަ ކަންކަމަށް ހައްލުވައި ނުލެވޭނެ ކަން ކަމަށެވެ.
"ފޭދޫއިން ވަރަށް ބޮޑު އަޣުލަބިއްޔަތެއް އެމްޑީޕީއިން ލިބިގެން ދިޔަ. މިއީ އެމްޑީޕީއަށް ފޭދޫއިން މީގެ ކުރިން ނުލިބޭ ވަރުގެ ބޮޑު އަޣުލަބިއްޔަތެއް. ހަމަ އެއާ އެކު އަޅުގަނޑުމެންނަށް ފެނިގެން ދިޔަ ފޭދޫއިން ތާރުއަޅަން ގެންދިޔަ ސާމާނު ވަގުތުން ބާލައި ހެދި މަންޒަރު. އަޅުގަނޑު ދެކޭ ގޮތުގައި މިއީ ކުރިޔަށް އޮތް ދުވަސްތަކުގައި ރާއްޖޭގެ ހުރިހާ ރަށްތަކަށް ސަރުކާރުން ޢަމަލުކުރަމުން ގެންދާނެ ގޮތުގެ ދަލީލެއް،" އަލީ ވަހީދު ވިދާޅުވި އެވެ.
އޭނާ ވިދާޅުވީ، މިތަކެތި އެރަށުން ބޭލީ، ސިޓީ ކައުންސިލަށް އިންތިޚާބުވި އަލީ ފަހުމީ އަހްމަދު ވިދާޅުވެގެން ނޫން ކަމަށާއި، ރަށުން އެތަކެތި ބޭލީ ކެމްޕޭނަށް އެރަށަށް އެތަކެތި ގެންދިޔަ މީހުން ކަމަށެވެ.
އަދި އޭނާ ވިދާޅުވީ މިހެން ދިމާވަނީ ޕީޕީއެމްގެ ތެރޭގައި ބޮޑެތި މައްސަލަތަކެއް އުޅޭތީ ކަމަށެވެ. އެގޮތުން، ޕީޕީއެމް މިހާރު ހިންގަނީ ދެ ތިން ބޭފުޅެއް ކަމަށް ޤަބޫލު ކުރެވޭ ކަމަށާއި، ވަރަށް ބޮޑަށް ހުށިޔާރު ވާން ޖެހުނު އިންތިޚާބެއްގައި އެބޭފުޅުންގެ ހުށިޔާރުކަން ވެސް ގެއްލިގެން ދިޔަ ކަމަށް އޭނާ ވިދާޅުވި އެވެ.
"އަޅުގަނޑުމެން ކުރިން ވެސް ދެންނެވިން އެއީ ޒަޢާމަތެކޭ، ފިކުރެއް ނޫނޭ. އަޅުގަނޑުމެންނަށް ލިބުނު ކާމިޔާބަކީ ފިކުރެެއްގެ ގޮތުގައި އެމްޑީޕީ އަނެއްކާވެސް އެނބުރި އަންނަ ކަން. އައްޑޫ ސިޓީއިން ހަޤީޤަތުގައި މި ފިކުރަށް ވޯޓު ދެއްވީ،" އަލީ ވަހީދު ވިދާޅުވި އެވެ.
އަލީ ވަހީދު ވިދާޅުވީ، އެ ޕާޓީގެ އެތެރޭގެ ލީޑަރޝިޕް އިންތިޚާބު ކުރުމަށް ފަހު ބޭއްވި ފުރަތަމަ އިންތިޚާބުގައި ޕީޕީއެމްއާ ވާދަކޮށް ކާމިޔާބު ލިބުމަކީ އެމްޑީޕީއަށް ލިބުނު ކުރިއެރުމެއް ކަމަށާއި އެމްޑީޕީ މިހާރު އަނެއްކާވެސް އެނބުރި އަންނަނީ ކަމަށެވެ.
އޭނާ އިތުރަށް ވިދާޅުވީ، މިއީ ސަރުކާރަށް ލިބުނު ބޮޑު ނާކާމިޔާބީއެއް ކަމުގައި ދެކެވޭ ކަމަށެވެ. އެގޮތުން، ފޭދޫ ދާއިރާގެ ކެމްޕޭނުގައި ރައީސުލްޖުމްހޫރިއްޔާއިން ފެށިގެން ސަރުކާރުގެ އެންމެ މަތީ ބޭފުޅުން ފޭދޫއަށް ވަޑައިގެން، "އިންތިޚާބަކަށް ނުފޫޒު ފޯރުވޭނެ އެންމެ މަތީ ދަރަޖައިގައި ނުފޫޒު ފޯރުއްވި" ކަމަށާއި، ނަމަވެސް އެ އިންތިޚާބު އެމްޑީޕީއިން ވަނީ ބޮޑު ތަފާތަކުން ކާމިޔާބު ކޮށްފައި ކަމަށް އަލީ ވަހީދު ވިދާޅުވި އެވެ.
އަލީ ވަހީދު ވިދާޅުވީ އިއްޔެ ބޭއްވި ވާދަވެރި ފޭދޫ މެދައިންތިޚާބުގައި ވާދަ ކުރެއްވި ޕީޕީއެމްގެ ކެންޑިޑޭޓް އީނާ ނަސީރު ކުރެއްވި ހިތްވަރަށާއި، އިންތިޚާބަށް ފަހު ނަތީޖާއާ އެކު ކޯޓަށް ވަޑައިނުގެންނެވި ކަމަށްޓަކައި ޝުކުރު އަދާ ކުރާ ކަމަށެވެ.
"އަޅުގަނޑުމެންގެ ފުލް ސިޓީ ކައުންސިލެއް އޮތަސް އީނާގެ ވެސް ޚިޔާލު އަޅުގަނޑުމެން ބޭނުންވޭ އައްޑީ ސިޓީ ތަރައްޤީ ކުރަން. އިދިކޮޅު ޕާޓީ އޮވެގެން ތަރައްޤީއަށް އެޅޭނެ ހުރަހެއް ނޯންނާނެ." އަލީ ވަހީދު ވިދާޅުވި އެވެ.