ކޯރުތަކުގެ ވަކި ހިސާބުތަކުން ރީތިފެނާއި ލޮނުފެން އެއްވާ ސަރަހައްދުތައް ފެންނާނެ އެވެ. ބަލައިބެލުމަށް އެއީ މާއަޖައިބު ކުރަވަނިވި ކަމެއް ކަމަށް ފާހަގަނުވި ނަމަވެސް، ފަހުގެ ދިރާސާތަކުން ހާމަވާ ގޮތުގައި ކޯރުތަކުގެ މިފަދަ ސަރަހައްދުތަކަކީ ކަރަންޓު އުފެއްދޭނެ މާސިންގާ ވަސީލަތެއް ކަމަށެވެ.
ސެމި-ޕާމިއަބަލް މެމްބްރޭނަކުން (އޭގެތެރެއިން އެއްކޮޅުން އަނެއްކޮޅަށް މަދު ފެންފޮދެއް ނޫނީ ދައުރުނުކުރާ ފަދަ ފަށަލައަކުން) ދެބަޔަށް ބައިކޮށްފައިވާ ބޮޑު ތަށްޓެއް ސިފަކުރާށެވެ. ތަށީގެ އެއްފަޅިއަށް އަޅާފައިވަނީ ރީތިފެނެވެ. އަނެއް ފަޅީގައި ލޮނުފެނެވެ. ރީތިފެން ފަށަލައިގައި ހުންނަ ފެނުގެ މޮލެކިއުލްތައް ފަށަލަ ތެރެއިން ލާފައި ގޮސް ލޮނުފެން ހުރި ބައި ޑައިލޫޓް ކޮށްލާނެ އެވެ. މިއީ ގުދުރަތީގޮތުން ފެނަށް ލިބިފައިވާ ސިފައެއްގެ ސަބަބުން ހިނގާ ކަމެކެވެ. މި ޕްރޮސެސްއަށް ކިޔާ ނަމަކީ އޮސްމޯސިސް އެވެ.
އޮސްމޯސިސް އަކީ ކަރަންޓު އުފެއްދުމަށް ބޭނުންކުރެވިދާނެ އެއްޗެކެވެ. ރީތިފެން، ދެފެން ދެމެދުގައިވާ ފަށަލަ ތެރެއިން ލާފައި ގޮސް ލޮނުފެނުގެ ތެރެއަށް ވަނުމުން، ލޮނުފެން ހުރި ފަރާތުގައި ހުންނަ ފެނުގެ މިންވަރު އިތުރުވެ އެވެ. މިގޮތަށް ފެނުގެ މިންވަރު އިތުރުވެ ފެން ފަށަލަ މައްޗަށް ޖެހޭ އިރު، ކަރަންޓް އުފައްދާ ޖަނަރޭޓަރު ތަކުގައި ހުންނަ ބުރަފަތިތައް އަނބުރާލެވޭވަރު ވާނެ އެވެ. އެހެންނަމަވެސް މިހާތަނަށް އައި އިރު އޮސްމޯސިސް ބޭނުންކޮށްގެން މަސައްކަތްކުރާ ކަރަންޓު އުފައްދާ ޕްލާންޓުތަކުން އާއްމު ބޭނުންތަކަށް ބޭނުންކުރެވޭ ވަރަށް ކަރަންޓް އުފައްދާފައެއް ނުވެ އެވެ.
އެހެންނަމަވެސް ދާދިފަހުން ސްވިޒަލެންޑާއި އެމެރިކާގެ ސައިންސްވެރިންތަކެއް ވަނީ އާ ވައްތަރެއްގެ އޮސްމޯޓިކް ޕަވާ ޖަނަރޭޓާ (އޮސްމޯސިސް ބޭނުންކޮށްގެން ކަރަންޓު އުފައްދާ ޖަނަރޭޓަރެއް) ތަރައްގީކޮށްފަ އެވެ.
މިޖަނަރޭޓަރުގައި ޓޭންކުގެ އެއްފަޅީގައި ހުންނަ ލޮނުފެނުގައި އެކުލެވޭ ލޮނުފެން، އަޔޮންގެ މިންވަރު އަނެއް ފަރާތަށް ވުރެ މާބޮޑުތަން އިތުރެވެ. ދެފެން ދެމެދުގައިވާ ފަށަލައިގެ ބޯމިނުގައި ހުންނަނީ އެންމެ ތިން އެޓޮމުގެ ބޯމިނެވެ. ހަމައެއާއެކު، މިފަށަލައިގައި އެކުލެވޭ ކުޑަކުޑަ އެންމެ ލޯވަޅަކުން އެތެރެވިޔަ ދެނީ ހަމައެކަނި ޕޮޒިޓިވް އަޔޮންސް އެވެ. ޓޭންކުގެ ދެފަރާތް ގުޅުވައިދެނީ އިލެކްޓްރޯޑެއް ނުވަތަ ދެ އެއްޗެއް ދެމެދު ކަރަންޓު ދައުރުކުރުމަށް ބޭނުންކުރާ އެއްޗަކުންނެވެ. މިޖަނަރޭޓަރުން ކަރަންޓު އުފެއްދުމަށް ފަށަލައިގައިވާ ލޯވަޅުން ޕޮޒިޓިވް އަޔޮންސް ފޮނުވާލާއިރު، އެ އަޔޮންސްގައި ހުންނަ އިލެކްޓްރޯންތައް، އިލެކްޓްރޯޑް ތެރެއަށް ފޮނުވާލަ އެވެ. އެއާއެކު ކަރަންޓު އުފެދެ އެވެ.
އޮސްމޯސިސް ބޭނުންކުރާ އެހެން ޖަނަރޭޓަރުތަކަށް ވުރެ މިޖަނަރޭޓަރު ބާރުގަދަވާ ސަބަބަކީ އޭގައި އެކުލެވޭ އާދަޔާ ހިލާފަށް ތުނި ފަށަލައާއި އެފަށަލައިގައިވާ ކުޑަކުޑަ ލޯވަޅެވެ. ބޮޑެތި މެމްބްރޭންތަކުގައި ގިނަ ލޯވަޅު އަޅައިގެން މިހާރަށް ވުރެ ގިނައިން ކަރަންޓު އުފެއްދޭނެ ކަމަށް ސައިންސުވެރިން ލަފާކުރެ އެވެ. އެގޮތުން ދިރާސާކުރާ ފަރާތްތަކުން ބުނާ ގޮތުގައި އެއް އަކަމީޓަރުގެ މެމްބްރޭނެއް ބޭނުންކޮށްގެން އެއް މެގަވޮޓުގެ ކަރަންޓު އުފެއްދިދާނެ އެވެ. އެއީ ގާތްގަނޑަކަށް 750 ގެއަށް ބޭނުންވާ ވަރުގެ ކަރަންޓެވެ.
މި ޓެކްނޮލޮޖީގެ ވައްތަރެއް ކޯރުތަކާއި ދެންވެސް ރީތިފެނާއި ލޮނުފެން ގުޅޭ ހިސާބުތަކުގައި އަވަސް މުސްތަގުބަލެއްގައި ބޭނުންކުރަން ފަށާނެ ކަމަށް ބައެއް މަސްދަރުތަކުން ބުނެ އެވެ. ވައިން ހަކަތަ އުފެއްދުމަށް ބޭނުންކުރާ ވިންޑް ޓާބައިންސް އާއި އަވިން ހަކަތަ އުފެއްދުމަށް ބޭނުންކުރާ ސޯލާ ޕެނަލްތަކާއި ހިލާފަށް އޮސްމޯސިސް ބޭނުންކުރާ ޖެނަރޭޓަރުތަކުން ދުވަހުގެ ހުރިހާ ވަގުތެއްގައި ވެސް ފުރިހަމައަށް ކަރަންޓު އުފެއްދުމުގެ ގާބިލުކަން ލިބިފައިވާ ކަމަށް މާހިރުން ދެކެ އެވެ. އަދި އެފަދަ ޖަނަރޭޓަރުތަކުން ދުނިޔޭގެ ބޮޑެތި ސިޓީތަކަށް ދާދި ފަސޭހައިން ކަރަންޓު ފޯރުކޮށްދޭނެ ކަމަށްވެސް މާހިރުން ގަބޫލުކުރެ އެވެ.