ސާނަވީ އަދި މަތީ ސާނަވީ އިމްތިހާނުތަކުން އެންމެ ރަނގަޅު ނަތީޖާ ހޯދި ދަރިވަރުންނަށްދޭ “މަތީ އަރުތަވެރީންގެ އިނާމު” 441 ދަރިވަރުންނަށް ދީފިއެވެ.
3 ދަންފަޅިއަކަށް ބަހާލައިގެން ދަރުބާރުގޭގައި އިއްޔެ ކުރިއަށް ގެންދިޔަ ހުރިހާ ދަންފަޅިތަކެއްވެސް ޝަރަފްވެރިކޮށްދެއްވަވާފައިވަނީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއެވެ.
މި ރަސްމިއްޔާތުގައި، މަތީ ޘާނަވީ ތަޢުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ޤައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާއެވެ.
2023-2022 ވަނަ އަހަރު މަތީ ސާނަވީ ނިންމި އިމްތިހާނުތަކުން އެންމެ ރަނގަޅު ނަތީޖާ ހޯދައިގެން، ޤައުމީ ގަދަ 10 ގައި 376 ދަރިވަރުން ވަނީ ހިމެނިފައެވެ. އަދި ސާނަވީ ނިންމާ އިމްތިހާނުތަކުން ދުނިޔޭގެ ފެންވަރުގައި މަތީ ވަނަ ހޯދި ދަރިވަރުންނާއެކު ޖުމްލަ 441 ދަރިވަރުން ވަނީ އިނާމް ހާސިލްކޮށްފައެވެ.
މަތީ ސާނަވީ އިމްތިހާނު ނުވަތަ އޭލެވެލް ނިންމާ އިމްތިހާނުން ރަނގަޅު ނަތީޖާ ހާސިލްކުރި ދަރިވަރުންގެ ތެރެއިން 18 ދަރިވަރުން ވަނީ ދުނިޔޭގެ އެންމެ މޮޅު ނަތީޖާ ހާސިލްކޮށްފައެވެ. އޭލެވެލްއިން ޤައުމީ ފެންވަރުގެ އެންމެމަތީ ވަނަ 12 ދަރިވަރުން ހާސިލްކުރިއިރު، އޭލެވެލް ސެޓިފިކެޓް އޮފް އެކްސެލެންސް 27 ދަރިވަރުން ވަނީ ހާސިލްކޮށްފައެެވެ. މީގެ އިތުރުން އޯލެވެލްއިން ދުނިޔޭގެ އެންމެ މޮޅު ނަތީޖާ 25 ދަރިވަރުން ހާސިލްކުރިއެވެ. އަދި އޯލެވެލްއިން ރާއްޖޭގެ އެންމެ މަތީ ވަނަ 23 ދަރިވަރުން ހާސިލްކުރިއެވެ.
މީގެ ކުރީގެ އަހަރުތަކުގައި މި ރަސްމިއްޔާތު ބާއްވަމުން އައީ، ސަރުކާރުގެ ނުވަތަ އަމިއްލަ ބޮޑެތި ކުންފުނިތަކުން ސްޕޮންސަރކޮށްގެންނެވެ. އަދި ދަރިވަރުންނަށް ވެސް ސްޕޮންސަރުންގެ އަތުން އިނާމު ހޯދައިގެންނެވެ. ނަމަވެސް މިކަމަކީ ސީދާ ދައުލަތުގެ ބަޖެޓުން ހޭދަކޮށްގެން ވަރަށް ރަނގަޅު ފެންވަރުގައި ކުރިއަށްދާ ރަސްމިއްޔާތެއްގެ ގޮތުގައި ހެދުމަށް ރައީސުލްޖުމްހޫރިއްޔާ ވަނީ މިފަހަރު ހަމަޖައްސަވާފައެވެ. އަދި ވަނަތަކަށް ހޮވި އިނާމު ލިބޭ ދަރިވަރުންނަށްވެސް، ސީދާ ސަރުކާރުގެ ފަރާތުން ރަނގަޅު ފެންވަރުގެ އަދި ދަރިވަރުންނަށް ބޭނުންވާނެ އިނާމު ދެއްވުމަށް ރައީސުލްޖުމްހޫރިއްޔާ ވަނީ އިރުޝާދުދެއްވާފައެވެ.