ލުބުނާނަށް ދެމުންގެންދިޔަ
އުދުވާނީ ހަމަލާތައް ހުއްޓާލުމަށްފަހު އިސްތިއުމާރީ އިސްރާއީލުން ޣައްޒާއާ ދެކޮޅަށް
ހިންގާ އުދުވާނު އިތުރަށް ފުޅާކޮށް ވަރުގަދަ ކޮށްފިއެވެ.
އެގޮތުން، އިއްޔެއިން
ފެށިގެން ޣައްޒާއަށް ބޮންއެޅުން އިތުރުކޮށްފައިވާއިރު، ރެއާއި މިއަދުވެސް،
ޚާއްސަކޮށް ޣައްޒާގެ އުތުރުގެ ސަރަހައްދުތަކަށް ދެމުންގެންދާ ހަމަލާތައް ވަރުގަދަ
ކޮށްފައިވާ ކަމަށް، ފަލަސްތީނު ރެފިއުޖީންނާބެހޭ އދގެ އޭޖެންސީން ބުނެފައި ވެއެވެ.
މިއަދު ހެދުނު
ޣައްޒާގެ ޚާން ޔޫނިސްގެ ރެފިއުޖީ ކޭމްޕެއް ކައިރީގައި ތިބި އާންމުންނަށް ޑްރޯން
ހަމަލާއެއްދީ 4 މީހުން ޝަހީދު ކޮށްލާފައި ވާއިރު، މި ހަމަލާގައި އިތުރު އެތައް
ބަޔަކު ޒަޚަމްވި ކަމަށް ފަލަސްތީނު ރަސްމީ ނޫސް އޭޖެންސީ، ވަފާއިން ބުނެފައި
ވެއެވެ.
ގާޒާ ސިޓީގެ ޒައިތޫން
އަވަށަށް ދިން ހަމަލާގައި ދެމީހުން ޝަހީދުވެފައި ވާއިރު، އޭގެ ތެރޭގައި ތުއްތު
ކުއްޖަކުވެސް ހިމެނެއެވެ. ޖަބަލިއާ ރެފިއުޖީ ކޭމްޕަށް ދިން ހަމަލާގައި އެކަކު
ޝަހީދުވެފައި ވެއެވެ. ބައިތު ލާހިޔާއަށް ދިން ހަމަލާތަކުގައި ހަތަރު މީހުން ޝަހީދު
ކޮށްލާފައި ވެއެވެ.
މީޑިއާ ރިޕޯޓްތައް
ބުނާގޮތުގައި، މިއަދު ހެނދުނުން ފެށިގެން ޣައްޒާގެ އެތަން މިތަނަށް، އިސްތިއުމާރީ
އިސްރާއީލުން ޓެރަރިސްޓު ހަމަލާތައް ދީފައި ވެއެވެ.
ޓެރަރިސްޓުންގެ
ޖެޓުތައް ޣައްޒާގެ އެކި ރަށްތަކުގެ ވަރަށް ތިރިން މިހާރުވެސް އުދުހެމުންދާ ކަމަށާއި،
ޣައްޒާގެ އެކި ރަށްތަކުގައި މިހާރު ކޮޅަށް ހުރި ހުރިހާ އިމާރާތަކަށްވެސް
ބޮންއަޅަމުން ގެންދާ ކަމަށް ރިޕޯޓްތައް ބުނެއެވެ.
ޣައްޒާގެ އުތުރު އެއްކޮށް
ބަންދުކޮށްފައި އޮންނަތާ 50 ދުވަސް ފާއިތުވެގެން ދިޔައިރު، އުތުރުގައި 75،000
އެއްހާ އާންމުން އަދިވެސް ތާށިވެފައި އެބަތިއްބެވެ. އެމީހުންނަށް ބޭނުންވާ
އެއްވެސް އިންސާނީ އެހީއެއް، އުތުރަށް އެތެރެކުރަން އިސްރާއީލުން ހުރަސްއަޅަމުން
ގެންދާ ކަމަށް އދއިން މިއަދުވެސް ބުނެފައި ވެއެވެ.
ފަލަސްތީނު
ރެފިއުޖީންނާބެހޭ އދގެ އޭޖެންސީން ބުނެފައިވަނީ އިންސާނީ އެހީ ނުލިބި، ޣައްޒާގެ
އުތުރުގައި ތިބި އާންމުންގެ ހާލަތު ވަރަށް ގޯސްވަމުންދާ ކަމަށެވެ. އެމީހުންގެ
ދިރިތިބުމަށް ނުރައްކާވަމުންދާ ކަމަށްވެސް ބުނެފައި ވެއެވެ.