ދެ އަހަރަށް ވުރެ ގިނަ ދުވަސްވަންދެން އިޒްރޭލާއި ފަލަސްތީނުގެ ހަމާސްއާ ދެމެދު ހިނގި ހަނގުރާމައަށް ފަހު، ގާޒާ އަވަސް މުއްދަތެއްގައި އާރާސްތުކުރުމުގެ މަސައްކަތްތަކަށް އެހީތެރިވުމުގެ ގޮތުން، 900 މިލިއަން ޔޫރޯ (ގާތްގަނޑަކަށް 1 ބިލިއަން ޑޮލަރު)ގެ އެހީގެ ފަންޑެއް ޔޫރަޕިއަން ކޮމިޝަނުން ތައާރަފުކޮށްފި އެވެ.
ބްރަސަލްސްގައި އިއްޔެ ބޭއްވި އެހީދޭ ފަރާތްތަކުގެ ކޮންފަރެންސެއްގައި އިއުލާންކުރި 'ޓީމް ގާޒާ އިނިޝިއޭޓިވް'ގެ ދަށުން، ފެނާއި ނަރުދަމާގެ ނިޒާމުތައް މަރާމާތުކުރުމާއި އިމާރާތްތަކުގެ ކުނިބުނިތައް ސާފުކުރުމުގެ އިތުރުން ސިއްހީ، ހަކަތަ، ދަނޑުވެރިކަން އަދި ކާބޯތަކެތީގެ އޮނިގަނޑުތައް އަލުން ބިނާކުރުމުގެ މަޝްރޫއުތަކަށް ފައިސާ ފޯރުކޮށްދޭނެ އެވެ.
މި ފަންޑުގައި ބައިވެރިވާ ގައުމުތަކާއި އިދާރާތަކުގެ ތެރޭގައި ސްޕެއިން، ފްރާންސް، ޖަރުމަނު، އިނގިރޭސިވިލާތް، ޖަޕާން، ވޯލްޑް ބޭންކް އަދި ޔޫރަޕިއަން އިންވެސްޓްމަންޓް ބޭންކް ހިމެނެ އެވެ. އަދި އޮސްޓްރޭލިއާ އާއި ކެނެޑާ ވެސް މީގެ ތެރޭގައި ފަހުން ބައިވެރިވާނެ ކަމަށް ބެލެވެ އެވެ.
"އަޅުގަނޑުމެން މިއަދު މި ހުށަހަޅަނީ ގާތްގަނޑަކަށް 900 މިލިއަން ޔޫރޯ ނުވަތަ އެއް ބިލިއަން ޑޮލަރުގެ ފުރަތަމަ އެހީގެ ޕެކޭޖު،" މެޑިޓަރޭނިއަން ސަރަހައްދާ ބެހޭ އީޔޫގެ ކޮމިޝަނަރު ޑުބްރާވްކާ ޝުއިސާ ވިދާޅުވި އެވެ.
"އަޅުގަނޑުމެންގެ އަމާޒަކީ ފަލަސްތީނުގެ ރައްޔިތުންނަށް އުންމީދާއި ކެތްތެރިކަމާ އަދި މިއަށް ވުރެ ރަނގަޅު މުސްތަގުބަލެއް ބިނާކުރުމަށް އެހީތެރިވެދިނުން."
ޝުއިސާ ވިދާޅުވީ އެހީދޭ ފަރާތްތަކުގެ މައިގަނޑު އަމާޒަކީ އަވަސް މުއްދަތެއްގައި އަލުން އާރާސްތުކުރުން ކަމަށެވެ.
"މި އެހީތެރިކަން ގާޒާގެ ރައްޔިތުންނާ ހަމައަށް ފޯރުކޮށްދިނުމަށްޓަކައި، އެ ބިމުގައި އެކަމަށް އެކަށޭނަ ގޮތްތަކެއް މިހާރު ވެސް ތަނަވަސްވާން އެބަޖެހޭ."
ހަމަހަމަކަމާއި ތައްޔާރުވެތިބުމާ އަދި ކާރިސާތައް ބެލެހެއްޓުމާ ބެހޭ އީޔޫގެ ކޮމިޝަނަރު ހަޖާ ލަހްބީބް ގާޒާގެ ހާލަތު ސިފަކުރެއްވީ ކެތްނުކުރެވޭ ފަދަ ހާލަތެއްގެ ގޮތުގައެވެ.
"ހަމަލާ ބަދަލުކުރުން ހުއްޓާލި ކަމަށް ބުނާ ބުނުމަށް ނުވަ މަސް ފާއިތުވެގެންދިޔައިރު ވެސް، ބޮންއެޅުންތައް އަދިވެސް ދަނީ ކުރިއަށް. ބަލިމަޑުކަން ދަނީ ފެތުރެމުން އަދި މީހުން ދަނީ މަރުވަމުން،" އޭނާ ވިދާޅުވި އެވެ.
މި އެހީގެ ޕެކޭޖު އިއުލާންކުރި ނަމަވެސް، ޔޫރަޕިއަން ޔޫނިއަން (އީޔޫ) އާއި އދ. އިން އަންދާޒާކުރާ ގޮތުގައި، ކުރިއަށް އޮތް 10 އަހަރުގެ ތެރޭގައި ގާޒާ އެއްކޮށް އަލުން ބިނާކުރުމަށް 71 ބިލިއަން ޑޮލަރަށް ވުރެ ގިނަ ފައިސާ ބޭނުންވާނެ އެވެ. މީގެ ތެރެއިން، އަސާސީ ހިދުމަތްތަކާއި މުހިންމު ކަންކަން އަލުން ގާއިމުކުރުމަށްޓަކައި ފުރަތަމަ 18 މަސްދުވަހުގެ ތެރޭގައި އެކަނި ވެސް 26.3 ބިލިއަން ޑޮލަރު ބޭނުންވެ އެވެ.