ބައެއް ނޫސްވެރިން އުލުބައިންދަންޖެހޭ ކަމަށް ސަރުކާރު ހިންގާ، ޕީއެންސީގެ ޕާލިމެންޓަރީ ގްރޫޕްގެ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު ރައްޔިތުންގެ މަޖިލީހުގައި ދެއްކެވި ވާހަކައަށް މައާފަށް އެދިވަޑައިނުގެން، "އުލުބޭންދުމަށް" އަމިއްލަ މާނަކުރުމުގެ ދައްކައި، ވާހަކަ ދިފާއު ކުރައްވައިފި އެވެ.
އުލުބޭންދުމަކީ އިހުޒަމާނުގައި މަރުގެ އަދަބު ތަންފީޒުކުރަން ގެންގުޅުނު އެއް ގޮތެވެ. މިކަންކުރާ ގޮތަކީ ކޮޅުތޫނުކުރި ދަގަނޑު އުލެއްގައި މީހާ ބައިންދަނީއެވެ. ބޭންދީމާ އެ އޫ ފުރަގަސް ފަރާތުން ވަދެގެން ގޮސް ބޮލުން ނުކުންނަ ގޮތަށެވެ.
މި އަދަބު ގަދީމީ ރޫމާއި، ޔޫރަޕުގެ ބައެއް ގައުމުތަކުގެ އިތުރުން އޮޓޮމަން ވެރިކަމުގެ ކުރީކޮޅު ވެސް ދީފައިވެ އެވެ.
އޮގަސްޓު 27 ވަނަ ދުވަހު ބޭއްވި ރައްޔިތުންގެ މަޖިލީހުގައި ފަލާހު ދެއްކެވި މި ވާހަކަ ތަހުގީގުކޮށް ދިނުމަށް އެދި މޯލްޑިވްސް ޖާނަލިސްޓު އެސޯސިއޭޝަނުން ހުށަހެޅި މައްސަލައިގައި ޕްރޮސެކިއުޓާ ޖެނެރަލްގެ ގެ ލަފައެއް ހޯދަން ހުށަހަޅާފައިވާ ކަމަށް ފުލުހުން ބުނި ވާހަކަ ނޫސްތަކުން ގެނެސްދިނުމާ ގުޅިގެން އެކަމަށް ރައްދު ދެއްވައި ފަލާހު އެކްސްގައި ކުރެއްވި ޕޯސްޓެއްގައި ވިދާޅުވީ އެއީ "ވަރަށް ރަނގަޅު ނިންމެވުމެއް" ކަމަށެވެ.
"އަޅުގަނޑު ނޯންނާނެ މީހަކު މަރަން ބުނެފައެއް،" އޭނާ ވިދާޅުވި އެވެ.
ބައެއް ނޫސްވެރިން އުލުބައިދަންޖެހޭ ކަމަށް ފަލާހު ރުޅިވެރިކަމާއެކު ވިދާޅުވި ވާހަކަ އަށް މީހުންގެ ފާޑުކިޔުން އޮހި، މައްސަލަ ޕޮލިހަށް ހުށަހަޅައި، ޖިނާއީ ތަހުގީގެއް ކުރަން ފަށާހިސާބަށް ދިޔުމުން "އުލުބޭންދުން" މި ބަހަށް އޭނާ ނެރުނު އަމިއްލަ މާނަ ކުރުމެކެވެ.
"އުލުބޭންދުން އަޅުގަނޑުމެން [ރ. އަތޮޅު] ހިސާބުގައި ބޭނުން ކުރަނީ ބަސްނާހާ މީހުން ބިމަށް ވުރެ މަތީ ތާކަށް އެރުވުމަށް،" ފަލާހު ވިދާޅުވި އެވެ.
އޭނާ ޖަލަށް ލައިފި ނަމަ ޖަލުގެ ރަހުމަތްތެރިންނަށް ވާނީ އެމްޑީޕީގެ ވެރިކަން ކުރި ރައީސުންނާއި އެމްޑީޕީގެ ގިނަ އަދަދެއްގެ މަޖިލީހުގެ މެންބަރުން ކަމަށް ފަލާހު ވިދާޅުވި އެވެ. އަދި އެންމެ ގިނަ ވާނީ ނޫސްވެރިން ކަމަށް ވެސް ވިދާޅުވި އެވެ.
"ސަބަބަކީ މިއަށްވުރެ ގިނައިން އިސްލާމްދީނުގެ އަސްލުތަކާ ހިލާފުވެ އެފަދަ ވާހަކަތައް ދައްކާފައިވާ ބައެއް މި ގައުމުގަ ނޫޅޭނެ،" އަބުރަކީ މުހިއްމު އެއްޗެއް ކަމަށް ވިދާޅުވެ ވާހަކަ ދައްކަވާފައިވާ ފަލާހު، ސާބިތު ހެއްކެއް ދެއްކުމެއް ނެތި ވިދާޅުވި އެވެ.
މިނިވަން މީޑިއާ ނެތިކޮށްލަން ހުށަހަޅާފައިވާ ބިލަށް ވާހަކަ ދައްކަވަމުން ފަލާހު ވިދާޅުވީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް މީގެ ކުރިން ފަތުރާފައިވާ ކަމަށެވެ. އަދި ވިދާޅުވީ އެގޮތަށް މަސައްކަތް ކުރާ މީޑިއާގެ މުވައްޒަފުން އުލުބައިންދަންޖެހޭ ކަމަށެވެ.
"... މި ލެވެލުގައި މަސައްކަތް ކުރީމަ މީޑިއާ ގެންގޮސް ޖަލަކަށް ނޫން [ލާންވީ]، އުލުބައިންދަންވަނީ. އުލުބައިންދަންވީ،" ފަލާހު ވިދާޅުވި އެވެ.
މި މައްސަލަ އެމްޖޭއޭއިން ޕޮލިހަށް ހުށަހަޅާފައިވާއިރު، ފަލާހު މައާފަށް އެދުމަށް ވެސް އެ ޖަމިއްޔާއިން ގޮވާލާފައިވެ އެވެ.