އިޒްރޭލާއި ލުބްނާނާ ދެމެދު 10 ދުވަހުގެ މުއްދަތަށް ހަމަލާ ބަދަލުކުރުން ހުއްޓާލުމަށް އެއްބަސްވެއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ދެންމެއަކު އިއުލާނު ކުރައްވައިފި އެވެ.
މި އެއްބަސްވުމަށް އަމަލުކުރަން ފެށުމަށް ހަމަޖެހިފައިވަނީ އެމެރިކާ ގަޑިން މިއަދު ހަވީރު 5 ޖަހާއިރެވެ.
ޓްރަމްޕް ވިދާޅުވީ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ލުބްނާނުގެ ރައީސް ޖޯސެފް އައުންއާ އެކު ކުރެވުނު މަޝްވަރާތަކަށް ފަހު، 10 ދުވަހުގެ މުއްދަތަށް ހަމަލާ ބަދަލުކުރުން މެދުކަނޑާލުމަށް ދެ ފަރާތުން އެއްބަސްވެފައިވާ ކަމަށެވެ.
ލުބްނާނުގެ ބޮޑުވަޒީރު ނަވާފް ސަލާމް މި އެއްބަސްވުމަށް މަރުހަބާ ވިދާޅުވަމުން ހާމަކުރެއްވި ގޮތުގައި، މިއީ ލުބްނާނުން އެންމެ ބޮޑަށް ބޭނުންވި ކަންތައް ކަމަށާއި، ވޮޝިންޓަންގައި ދެ ފަރާތުގެ ދެމެދުގައި ކުރިއަށްދިޔަ މަޝްވަރާތަކުގެ މައިގަނޑު މަގްސަދަކީ ވެސް މިއީ ކަމަށެވެ.
މި އެއްބަސްވުމާ ހަމައަށް އާދެވުނީ، މިދިޔަ މަހުގެ ކުރީކޮޅު ހިޒްބުއްލޯ އިން އިޒްރޭލަށް ދޭން ފެށި ހަމަލާތަކާ ގުޅިގެން، އިޒްރޭލުން ލުބްނާނުގެ އެކި ސަރަހައްދުތަކަށް ދެމުންދިޔަ ވައިގެ ހަމަލާތަކާ އެކު ހަ ހަފުތާއަށް ވުރެ ގިނަ ދުވަހު ހިނގި ވަރުގަދަ ކުރިމަތިލުންތަކަށް ފަހުގަ އެވެ.
ލުބްނާނުގެ އޮފިޝަލުން ހާމަކުރާ ގޮތުގައި، މި ހަމަނުޖެހުންތަކުގައި މިހާތަނަށް 2,100އަށް ވުރެ ގިނަ މީހުން މަރުވެ، މިލިއަނަކަށް ވުރެ ގިނަ މީހުން ވަނީ ގެދޮރު ދޫކޮށް ދާންޖެހިފަ އެވެ.
މި އެއްބަސްވުން އެކުލަވާލެވުނު ނަމަވެސް، ހިޒްބުއްލޯއަކީ މި އެއްބަސްވުމުގައި ބައިވެރިވާ ފަރާތެއް ނޫނެވެ. އަދި އެ ޖަމާއަތުން ވަނީ މި ޑިޕްލޮމެޓިކް މަރުހަލާ ބަލައިގަތުމަށް އިންކާރުކޮށްފަ އެވެ. މީގެ ސަބަބުން މި އެއްބަސްވުން ފުރިހަމައަށް ތަންފީޒުކުރެވިދާނެތޯ ވަނީ ސުވާލު އުފެދިފަ އެވެ.
ޓްރަމްޕް އިތުރަށް ވިދާޅުވީ، ކުރިއަށް އޮތް ތަނުގައި އިތުރު މަޝްވަރާތައް ކުރެވޭނެ ކަމަށް އުންމީދު ކުރައްވާ ކަމަށާއި، ދެ ފަރާތުން ވެސް ބޭނުންވަނީ މައްސަލަތަކަށް ހައްލެއް ހޯދުމަށް ކަމަށް ގަބޫލު ކުރައްވާ ކަމަށެވެ. މިކަމުގައި ވަރަށް އަވަހަށް ކުރިއެރުންތަކެއް ލިބޭނެ ކަމަށް ވެސް އޭނާ ވިދާޅުވި އެވެ.
މީގެ އިތުރުން، މިއަށް ވުރެ ފުޅާ ދާއިރާއެއްގައި ދާއިމީ ހައްލެއް ހޯދުމަށް މަސައްކަތް ކުރުމަށް އެމެރިކާގެ އިސް އޮފިޝަލުންނަށް ޓްރަމްޕް ވަނީ އިރުޝާދު ދެއްވާފަ އެވެ.
މި ކުރިއެރުންތައް އައިސްފައިވަނީ ސަރަޙައްދީ މަސްލަހަތު ނުތަނަވަސްވެފައިވާ ދަނޑިވަޅެއްގަ އެވެ. އެގޮތުން، އެމެރިކާ އާއި އީރާނާ ދެމެދު ހަމަލާތައް ބަދަލުކުރުން ދެ ހަފްތާއަށް މެދުކަނޑާލަން ވެފައިވާ އެއްބަސްވުމުގެ މުއްދަތު އަންނަ ހަފުތާގައި ހަމަވާނެތީ، އެކަމާ ގުޅޭ އާ މަޝްވަރާތައް އަލުން ފެށޭނެ ކަމަށް ވެސް ބެލެވެ އެވެ.