އެމެރިކާ އާއި އިސްރާއީލުން ދިން ހަމަލާތަކުގައި އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުން، ކުރީގެ ރައީސް މައުމޫން އަބްދުއްގައްޔޫމް ރޭ ކުށްވެރިކުރައްވައިފިއެވެ. މައުމޫން 'އެކްސް' ގައި ކުރެއްވި ޕޯސްޓެއްގައި ވިދާޅުވީ، އިޚްލާސްތެރި މުސްލިމެއްގެ ހައިސިއްޔަތުން ޚާމަނާއީ އަވަހާރަކޮށްލުން ކުށްވެރިކުރައްވާ ކަމަށެވެ. އަދި މި ހިތާމަވެރި ދަނޑިވަޅުގައި ޚާމަނާއީގެ އާއިލާއަށް ތައުޒިޔާ ފޮނުއްވައި، އީރާނުގެ ރައްޔިތުންނަށް ކެތްތެރިކަމާއި ހިތްވަރު ދެއްވުން އެދި ދުއާކުރައްވާކަމަށް ވެސް އެމަނިކުފާނު ވިދާޅުވިއެވެ. ޚާމަނާއީ އަވަހާރަކޮށްލި މައްސަލައިގައި ރައީސް މައުމޫން ކަންބޮޑުވުން ފާޅުކުރެއްވިއިރު، މިހާތަނަށް ދިވެހި ސަރުކާރުން ރަސްމީކޮށް އެއްވެސް މޭރުމަކުން އެ ކަން ކުށްވެރިކުރައްވައިފައިނުވެއެވެ. އަދި ރައީސް ޑރ. މުޙައްމަދު މުއިއްޒަށް ވެސް އެކަން ކުށްވެރިކުރައްވަން ކެރިވަޑައިގެންފައިނުވެއެވެ. ރާއްޖޭގެ ސިޔާސީ އިސް އެހެން ލީޑަރަކު ވެސް މިކަމުގައި ވަކި އެއްޗެއް ވިދާޅުވެފައެއް ނުވެއެވެ. މީގެ އިތުރުން، އީރާނުގެ އިސް ލީޑަރުން އަވަހާރަވުމުން މީގެ ކުރިން އަމަލުކުރަމުން އައި އުސޫލުން ގައުމީ ދިދަ ބައިދަނޑިއަށް ތިރިކުރުން ފަދަ ރަސްމީ ހިތާމަފާޅުކުރުމުގެ އެއްވެސް ކަމެއް ވެސް ކޮށްފައިނުވެއެވެ. އިއްޔެ ރައީސް އޮފީހުގައި މިކަމާ ގުޅޭގޮތުން ނޫސްވެރިން ސުވާލުކުރުމުން ރައީސް މުއިއްޒު ވިދާޅުވީ، ހަނގުރާމައިގެ ތެރޭގައި ކޮންމެ މުސްލިމަކު މަރުވުމަކީ ވެސް ލިބޭ ވަރަށް ބޮޑު ހިތާމައެއް ކަމަށެވެ. ޚާމަނާއީ އަވަހާރަވުމާ ގުޅޭގޮތުން ސީދާ ޖަވާބެއް ނުދެއްވި ނަމަވެސް، ރައީސް ވިދާޅުވީ މިކަމުގައި ރާއްޖެއިން ތިބޭނީ އަރަބި އިސްލާމީ ގައުމުތަކުން ނިންމާ ގޮތެއްގެ މަތީގައި ކަމަށެވެ. އަދި އެމެރިކާއާއި އިސްރާއީލުގެ އިތުރުން އީރާނުން ދެމުންދާ ހަމަލާތައް ވެސް ކުށްވެރިކުރައްވާ ކަމަށް ރައީސް ވިދާޅުވިއެވެ. https://sun.mv/218582 މެދުއިރުމަތީގެ މަސްރަހު ގޯސްވެފައިވާ މި ދަނޑިވަޅުގައި، ރާއްޖޭގެ ތާއީދު އޮތީ އަރަބި ގައުމުތަކާއެކުކަން ހާމަކުރެއްވުމަށް އެ ގައުމުތަކުގެ ވެރިންނާ މުއާމަލާތް ކުރައްވަމުން ގެންދަވާ ކަމަށް ވެސް ރައީސް ވިދާޅުވިއެވެ. އެމެރިކާއާއި އިސްރާއީލުން އީރާނަށް ދިން ހަމަލާތަކުގެ ރައްދުގައި، އީރާނުން ދަނީ އަވަށްޓެރި އަރަބި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލް ހަމަލާތައް ފޮނުވަމުންނެވެ. މި ހަމަލާތަކުގެ ސަބަބުން ޔޫއޭއީ، ސައުދީ އަރަބިއްޔާ، ގަތަރު، ބަހްރައިން އަދި އޮމާންއަށް އެކިވަރުގެ ގެއްލުންތައް ލިބި، އެ ގައުމުތަކުގެ ވައިގެ ސަރަހައްދުތައް ބަންދުކުރަން ޖެހިފައިވެއެވެ.