ޗައިނާއާ އެކު ވިޔަފާރީގެ ގުޅުން އިތުރަށް ބަދަހިކުރުމާ މެދު އެމެރިކާގެ ރައީސް ޑޮނަލްޑް ޓްރަމްޕް އިނގިރޭސިވިލާތަށް މިއަދު އިންޒާރު ދެއްވައިފި އެވެ.
ޓްރަމްޕް މި އިންޒާރު ދެއްވާފައި މިވަނީ، އިނގިރޭސި ބޮޑުވަޒީރު ކިއަރު ސްޓާމާ މިހާރު ޗައިނާއަށް ކުރައްވަމުން ގެންދަވާ ދަތުރުގައި ދެ ގައުމުގެ ގުޅުން އާ ހަރުފަތަކަށް ގެންދިއުމަށް ކުރައްވާ މަސައްކަތް ދިފާއުކުރައްވައި ވާހަކަދައްކަވާފައި ވަނިކޮށެވެ.
ޓްރަމްޕް ވިދާޅުވީ، އިނގިރޭސިވިލާތާއި ޗައިނާއާ ދެމެދު ގާތް ގުޅުމެއް ބޭއްވުމަކީ އެ ގައުމަށް ވަރަށް ނުރައްކާތެރި ކަމެއް ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް އޭނާ ނުދެއްވަ އެވެ.
ޓްރަމްޕް މިހެން ވިދާޅުވިއިރު، ސްޓާމާ ވަނީ ބެއިޖިންގައި ޗައިނާގެ ރައީސް ޝީ ޖިންޕިންއާ ބައްދަލުކުރައްވައި، މާކެޓް އެކްސެސް ފުޅާކުރުމާއި ޓެރިފް ކުޑަކުރުމުގެ އިތުރުން އިންވެސްޓްމަންޓްތައް އިތުރުކުރުމުގެ މައްޗަށް ބިނާވެފައިވާ ޒަމާނީ ގުޅުމަކަށް ގޮވާލައްވާފަ އެވެ.
ރައީސް ޝީއާ އެކު ތިން ގަޑިއިރަށް ކުރިއަށްދިޔަ ބައްދަލުވުމަކީ ވަރަށް ގާތް އަދި އުއްމީދީ ބައްދަލުވުމެއްގެ ގޮތުގައި ސްޓާމާ ސިފަކުރެއްވި އެވެ.
އިނގިރޭސި-ޗައިނާ ބިޒްނަސް ފޯރަމްގައި ވާހަކަދައްކަވަމުން އޭނާ ވިދާޅުވީ، ވިސާއާ ނުލައި ދަތުރުކުރެވޭނެ އިންތިޒާމު ހަމަޖެއްސުމާއި އިނގިރޭސިވިލާތުން ވިއްކާ ބަނގުރަލުން ނަގާ ޓެރިފް ކުޑަކުރުމަށް އެއްބަސްވެފައިވާ ކަމަށާއި، މިއީ ދެ ގައުމުގެ ދެމެދުގައި އޮންނަންޖެހޭ އިތުބާރާއި އިހުތިރާމް ބިނާކުރުމަށް އެޅުނު މުހިންމު ފިޔަވަޅެއް ކަމަށެވެ.
ހުޅަނގުގެ ބާރުތަކުން ޓްރަމްޕްގެ ލަފާކުރަންދަތި ވިޔަފާރީގެ ސިޔާސަތުތަކާ މެދު ކަންބޮޑުވުން ފާޅުކުރަމުންދާ ދަނޑިވަޅެއްގައި މި ދަތުރު ކުރިއަށްދާއިރު، ކެނެޑާގެ ބޮޑުވަޒީރު މާކް ކާނީ ޗައިނާއާ އެކު އިގްތިސާދީ އެއްބަސްވުންތަކެއްގައި ސޮއިކުރެއްވުމާ ގުޅިގެން ޓްރަމްޕް ވަނީ މިދިޔަ ހަފުތާގައި ކެނެޑާއަށް ޓެރިފްގެ އިންޒާރު ވެސް ދެއްވާފަ އެވެ.
ސްޓާމާ ވިދާޅުވި ގޮތުގައި، އިނގިރޭސިވިލާތުން ވޮޝިންޓަނާއި ބެއިޖިންއާ ދެމެދު ވަކި ފަރާތެއް އިހްތިޔާރެއް ނުކުރެ އެވެ. އެމެރިކާއާ އެކު އޮންނަ ދިފާއީ، ސަލާމަތީ އަދި ޖާސޫސީ ގުޅުމަކީ އެންމެ ގާތް ގުޅުންކަން ފާހަގަކުރައްވަމުން އޭނާ ވިދާޅުވީ، އެމެރިކާއާ އެކު އޮތް ގުޅުމަށް ބުރޫނާރާނޭހެން ޗައިނާއާ އެކު އިގްތިސާދީ ގުޅުން ބަދަހިކުރެވޭނެ ކަމަށެވެ.
ނަމަވެސް، އެމެރިކާގެ ކޮމާސް ސެކްރެޓަރީ ހަވާޑް ލަޓްނިކް ވަނީ އިނގިރޭސިވިލާތުގެ މި މަސައްކަތުން ނަތީޖާއެއް ނުކުމެދާނެ ކަމާ މެދު ޝައްކު އުފައްދަވާފަ އެވެ. އޭނާ ވިދާޅުވީ ޗައިނާއަކީ މުދާ އެކްސްޕޯޓްކުރުމުގައި ވަރުގަދަ ގައުމެއް ނަމަވެސް، އެ ގައުމަށް މުދާ އެތެރެކުރުމަކީ ވަރަށް އުނދަގޫ ކަމެއް ކަމަށެވެ.
ކެނެޑާއާ އެއްފަދައިން އިނގިރޭސިވިލާތަށް ވެސް ޓެރިފްގެ ކުރިމަތިލާން ޖެހިދާނެތޯ ސުވާލުކުރުމުން ލަޓްނިކް ވިދާޅުވީ، ލަންޑަނުން ސީދާ ގޮތެއްގައި ވޮޝިންޓަނާ ދެކޮޅަށް ފިޔަވަޅެއް ނާޅާހާ ހިނދަކު އެފަދަ ކަމެއް ހިނގުން ދުރު ކަމަށެވެ.
ސްޓާމާގެ މި ދަތުރަކީ ފަރަންސޭސި ރައީސް އެމަނުއަލް މެކްރޮން ޗައިނާއަށް ކުރެއްވި ދަތުރަށް ފަހު ކުރެއްވި ދަތުރެކެވެ. އަދި ޖަރުމަނުގެ ޗާންސެލަރު ފްރީޑްރިކް މާޒް ވެސް ވަރަށް އަވަހަށް ޗައިނާއަށް ދަތުރެއް ކުރައްވާނެ ކަމަށް ބެލެވެ އެވެ.
މިއީ ހުޅަނގުގެ ބޮޑެތި އިގްތިސާދުތަކުން ޗައިނާއާ އެކު އަލުން ގުޅުން ބަދަހިކުރަން ފަށާފައިވާ ކަމުގެ ނިޝާނެކެވެ.