ކުރީގެ ރައީސް މައުމޫން އަބްދުލް ގައްޔޫމްގެ ކޮންމެ ހަރަކާތެއް ކޮންމެ ބަސްފުޅެއް ވެފައި އޮންނަނީ އެންމެން ސަމާލުވާ ކަމަކަށެވެ، ރައީސް މައުމޫން ޑީއާރްޕީން ވަކިވެވަޑައިގެން އާ ސިޔާސީ ޕާޓީއެއް އިއުލާން ކުރެއްވުމަށް ފަހު ސަންއަށް ވަނީ ހާއްސަ އިންޓަވިއުއެއް ދެއްވާފަ އެވެ. ތިރީގައި މިވަނީ އެ އިންޓަވިއުގެ މުހިންމު ސުވާލުތަކާއި ޖަވާބެވެ.
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ކުރިމަގާމެދު ދެކިވަޑައިގަންނަވަނީ ކިހިނެއްތޯ؟
ޕީ.ޕީ.އެމް.ގެ ކުރިމަގު އަޅުގަނޑު ދެކެނީ ވަރަށް ރަނގަޅުކޮށް. އިރާދަކުރެއްވިއްޔާ ޕީ.ޕީ.އެމް. ވެގެންދާނީ ރާއްޖޭގެ ވަރަށް ގިނަ ބައެއްގެ ތާއީދުއޮތް އަދި ވަރަށް ކާމިޔާބު ޕާޓީއަކަށް. އަދި ޤައުމަށްޓަކައި މިޕާޓީން ކުރާ އިޚްލާޞްތެރި މަސައްކަތްތަކުގެ ސަބަބުން މުސްތަޤްބަލްގައި ދިވެހި ރައްޔިތުންނަށް ކުރިއެރުމާއި، ތަރައްޤީއާއި، ހިތްހަމަޖެހުމާއި، އުފާފާގަތިކަން ލިބިގެންދާނެ.
ޕީ.ޕީ.އެމް. އުފެއްދުމުގެ ކަންތައްތަކުގައި އެންމެ އިސްކޮށް އުޅުއްވާތަން މި ފެންނަނީ މަނިކުފާނުގެ ޢާއިލާގެ ބޭފުޅުން. އެގޮތުން އިލެކްޝަނަށް ފޯމު ހުށަހެޅުއްވީ ދަރިކަލުން ފާރިސް، އަދި ދަރިކަނބަލުން ޔުމްނާ ވެސް ވަރަށް އިސްކޮށް އުޅުއްވާތަން މިފެންނަނީ. ހަމަ އެހެންމެ ކޮއްކޯފުޅު ޔާމީނުގެ ވަރަށް ބޮޑު ދައުރެއް ވެސް އެބަ ފެނޭ. މަނިކުފާނާ ގުޅުވައިގެން ދެކެވޭ ޢާއިލީ ވެރިކަމާ ދިމާއަށް މި ޕާޓީ މިސްރާބު ނުޖަހާނެތޯ؟
މިޕާޓީގެ ހުރިހާ ކަމެއްވެސް ނިންމާނީ ޕާޓީގެ މެންބަރުން. އެހެންވީމާ މިޕާޓީގައި ވަކި މީހަކަށް ނުވަތަ ވަކި ޢާޢިލާއަކަށް އިތުރު ފުރުޞަތުތަކެއް ލިބިގެނެއް ނުދާނެ. ހުރިހާ މެންބަރުންނަށްވެސް އޮންނާނީ ހަމަހަމަ ފުރުޞަތުތަކެއް. ކުރިޔަށްދާ މީހަކު ކުރިޔަށްދާނީ އެމީހެއްގެ ހިތްމަތާއި މިންނަތުން. ދެން އަޅުގަނޑާ ބެހޭގޮތުން ދެކެވޭކަމަށް ތިޔަ ވިދާޅުވާ ޢާޢިލީ ވެރިކަމުގެ ވާހަކަޔާ ބެހޭގޮތުން ދަންނަވަން އޮތީ އެއީ އަޅުގަނޑާބެހޭގޮތުން ދައްކާނެ އެހެން ވާހަކައެއް ނެތިގެން ބަޔަކު ދައްކާ ވާހަކައެކޭ. ޕީ.ޕީ.އެމް އުފެއްދުމަށް މަސައްކަތްކުރުމުގެ ހުއްދައަށް އެދި ފޯމު ހިފައިގެން އިލެކްޝަންސް ކޮމިޝަނަށް ދިޔައީ ފާރިސް. އެކަންވީގޮތަކީ ރައްޔިތުންގެ މަޖިލީހުގެ ވަރަށް ގިނަ މެންބަރުންނާ ސިޔާސީ މައިދާނުގައި ޙަރަކާތްތެރިވެވަޑައިގަންނަވާ ވަރަށް ގިނަ ބޭފުޅުން އެދިވަޑައިގަތީ އަޅުގަނޑު އިސްމީހަކަށް ހުރެގެން އާ ސިޔާސީ ޕާޓީއެއް އުފެއްދުމަށް. އަދި އާންމު ރައްޔިތުންގެ ވަރަށް ގިނަ ބަޔަކުވެސް އަޅުގަނޑުގެ ކިބައިން އެކަމަށް އެދުނީ. އެހެންވީމާ ޕާޓީ އުފެއްދުމަށް ކުރަންޖެހޭ މަސައްކަތްތައް ރާވައި ހިންގުމަށް އުފެއްދި ކޮމިޓީގެ ރައީސަކަށް ހުރީ ފާރިސް. އެގޮތަށް ހަމަޖެއްސީ ވަގުތުން ވަގުތަށް ކޮމިޓީގެ މަސައްކަތްތައް އަޅުގަނޑަށް އެނގި އަދި އަޅުގަނޑުގެ ޚިޔާލާ މަޝްވަރާ ކޮމިޓީއަށް ވަގުތުން ވަގުތަށް ލިބެމުންދާނީ މިފަދަ ގޮތަކަށް ކަންތައް ގެންދިޔައީމާ ކަމަށްވާތީ. ކޮމިޓީގެ ރައީސަކަށް ހުރީ ފާރިސްކަމަށްވާތީ އިލެކްޝަންސް ކޮމިޝަނަށް ފޯމް ހުށަހަޅަން ދިޔައީވެސް އޭނަ. ޢާއިލީ ވެރިކަމުގެ ވާހަކަ ދައްކާއިރު ދުނިޔޭގައި އޮތް އެންމެ ބޮޑު ދެ ޑިމޮކްރަސީ ކަމަށްވާ އެމެރިކާއާއި އިންޑިއާގައި ކަންތައްތައް ހިނގަމުންދާގޮތް ބައްލަވާލައްވާ.
މަނިކުފާނު އަބަދުވެސް ވިދާޅުވޭ ރައްޔިތުން އެދިވަޑައިގަންނަވާ ގޮތަކަށް އަބަދުވެސް ރައްޔިތުންނަށް ޚިދްމަތް ކުރުން މަތީ ދެމިހުންނަވަން ބޭނުންފުޅު ވާ ކަމަށް. ގިނަ އަދަދެއްގެ ބަޔަކު މަނިކުފާނު އަލުން ރައީސް ކަމަށް ވަޑައިގަތުމަށް އެދޭ ނަމަ އެ ކަމާ މެދު މަނިކުފާނު ވިސްނަވާނަންތޯ؟
އާދެ! ވަރަށް ގިނަ އަދަދެއްގެ ބަޔަކު އަޅުގަނޑު ރައީސްކަމަށް ކުރިމަތިލުމަށް އެދެމުން ގެންދޭ. ހަމައެފަދައިން އެހެން ބައެއް މީހުން ދެން އަޅުގަނޑު ކުރިމަލާން ނުފެންނަ ވާހަކަވެސް ބުނަމުން ގެންދޭ. މިވަގުތު މިކަމާބެހޭގޮތުން އަޅުގަނޑު އެއްޗެއް ބުނާކަށް ބޭނުމެއްނޫން. އެހެން މިދެންނެވީ، މިހާރު ވަކި އެއްޗެއް ބުނެފިނަމަ ޕީ.ޕީ.އެމް.ގެ ފަރާތުން ނުކުންނާނެ ރިޔާސީ ކެންޑިޑޭޓް ހޮވުމަށް އަޅުގަނޑުމެން ބާއްވަން ޤަސްދުކުރާ ޕްރައިމަރީއަށް އަސަރު ފޯރާނެތީ. އަޅުގަނޑު ބޭނުންވަނީ އަޅުގަނޑުމެން ބާއްވާ ޕްރައިމަރީއަކީ ވަރަށް ހުޅުވާލެވިފައިވާ ވަރަށް އިންސާފުވެރި ގޮތެއްގައި ބޭއްވޭ ޕްރައިމަރީއަކަށްވާން.
ޕީ.ޕީ.އެމް. އުފެދިގެން އަންނައިރު ތި ޕާޓީއަށް އެންމެ ގިނަ މެންބަރުން ވަންނާނެ ކަމަށް ބުނެވެނީ ޑީ.އާރު.ޕީން. އޭގެ ތެރޭގައި ގިނައީ އަތޮޅު ތަކުގެ މެންބަރުން. މަނިކުފާނުގެ އާ ޕާޓީ އަށް މެންބަރުން އިތުރު ކުރެއްވުމަށް އަތޮޅު ތަކަށް ދަތުރު ކުރައްވާނަންތޯ؟ އަދި އެންމެ މެންބަރުން ގިނަ ޕާޓީ އަކީ ޕީޕީއެމް ކަމަށް ހެއްދެވޭނެ ކަމަށް ޤަބޫލުފުޅު ކުރެއްވޭތޯ؟
އަތޮޅުތަކުގެ ރައްޔިތުންނަށް ޕީ.ޕީ.އެމް. ތަޢާރުފްކޮށްދީ ޕީ.ޕީ.އެމް.ގެ ސިޔާސީ އެޖެންޑާ އޮޅުންފިލުވައިދިނުމަށްޓަކައި އިރާދަކުރެއްވިއްޔާ އަޅުގަނޑު އަތޮޅުތަކަށް ދަތުރުކުރާނަން. އަޅުގަނޑަށް ޔަޤީންކުރެވޭގޮތުގައި މާތް ﷲ ގެ ވާގިފުޅާއެކު ޕީ.ޕީ.އެމް. ވެގެންދާނީ ވަރަށް މެންބަރުން ގިނަ ޕާޓީއަކަށް.
ޑީ.އާރު.ޕީން. ކެނޑިވަޑައިގެން މަނިކުފާނާ ގުޅިވަޑައިގެން އާ ޕާޓީ އުފައްދަވަން މަސައްކަތް ކުރައްވާ މަޖިލީހުގެ މެންބަރުންނަށް ޕީ.ޕީ.އެމް.ގެ މެންބަރުންގެ ގޮތުގައި މަޖިލީސް ތަމްސީލު ނުކުރެއްވޭނެ ކަމަށް ދާދިފަހުން މަޖިލީހުގެ އިދާރާއިން ވަނީ ވިދާޅުވެފަ. އެކަމާމެދު މަނިކުފާނު ދެކިވަޑައިގަންނަވާ ގޮތަކީ ކޮބައިތޯ؟
ރައްޔިތުންގެ މަޖިލީހުގެ ޤަވާއިދު މިހާރު އޮތްގޮތުން ތިޔަހެން ތިކަން ވެދާނެ. އެކަމަކު އަޅުގަނޑަށް އެނގިފައިވާގޮތުގައި އެ ޤަވާއިދަށް ވަރަށް އަވަހަށް އިޞްލާޙްތަކެއް ހުށަހެޅޭނެ. އެ އިޞްލާޙްތައް ފާސްވެއްޖިއްޔާ ތިޔަ މައްސަލަ ޙައްލުވެގެންދާނެ. ފާސްނުވިނަމަވެސް މިނިވަން މެންބަރުންގެ ގޮތުގައި ޕީ.ޕީ.އެމް. ގެ މެންބަރުންނަށް މަޖިލީހުގެ ތެރޭގައި ފުރިހަމައަށް ޙަރަކާތްތެރިވެވޭނެ. އެހެންވީމާ އެއީ މާބޮޑު މައްސަލައަކަށް ނުވާނެ.
ސަރުކާރުން މިހާރު ކުރިޔަށް ގެންދަވާ ޓެކްސް ބިލްތަކުގެ ސަބަބުން ރައްޔިތުންނަށް އޮތް ފައިދާ ތަކަކީ ކޮބައިކަމަށްތޯ މަނިކުފާނު ޤަބޫލުފުޅު ކުރައްވަނީ؟
ޓެކްސްއަކީ ދުނިޔޭގެ ހުރިހާ ޤައުމުތަކެއްގައިވެސް ވަކި ޤާނޫނޫތަކެއްގެދަށުން ނަގަމުންދާ އެއްޗެއް. އެއީ ސަރުކާރުގެ ޚަރަދުތަކަށާއި ސަރުކާރުން ހިންގަން ބޭނުންވާ ޕްރޮގްރާމްތައް ހިންގޭނީ އެކަމަށް ބޭނުންވާ ފައިސާ ހޯދައިގެންކަމަށްވާތީ. އެހެންވީމާ ޓެކްސް ނެގުމަކީ ރާއްޖޭގައިވެސް ކުރަންޖެހޭނެ ކަމެއް. އަޅުގަނޑު ރައީސްކަމުގައި ހުރިއިރުވެސް ޓެކްސް ނެގުމާ ބެހޭ ބިލެއް ތައްޔާރުކޮށްފައި އޮންނާނެ. ޓެކްސް ނެގުމުގައި ބަލަންޖެހޭނެ ކަމަކީ ވީހާވެސް އިންސާފުވެރި ގޮތަކަށް އަދި ވީހާވެސް އާންމު ރައްޔިތުންނަށް ބުރަ ކުޑަވާގޮތަށް ޓެކްސްއާބެހޭ ޤާނޫނުތައް ފަރުމާ ކުރުން. އަދި އެއްފަހަރާ މާގިނަ ޓެކްސްތަކެއް ނުނެގުން. ޚާއްޞަކޮށް ރާއްޖޭގެ އިޤްތިޞާދީ ޙާލަތު މިހާބޮޑަށް ދަށަށްގޮސް އަދި މީސްމީހުނަށް ލިބޭ އާމްދަނީ އެތައް ތަނެއް ކުޑަވެގެންގޮސްފައިވާ ވަގުތެއްގައި އާދައިގެ ރައްޔިތުންނަށް ދަތިވާގޮތަށް މާގިނަ ޓެކްސްތަކެއް ނެގުމަކީ އެއްގޮތަކަށްވެސް ކޮށްގެންވާނެ ކަމެއް ނޫން.
މި ސަރުކާރުގެ ބައެއް ފަރާތްތަކުން ޣައިރު ދީނީ ކަންކަމަށް ހިތްވަރު ލިބޭ ކަހަލަ ކަންކަން ނުވަތަ އެކަން ޕްރޮމޯޓު ކުރުމަށް މަސައްކަތްތައް ކުރާކަމަށް ވާހަކަ ދެކެވޭ. އެއީ ތެދެއް ކަމަށް ޤަބޫލު ކުރެއްވޭތޯ؟
އާދެ! އެއީ ތެދެއް ކަމަށް ޤަބޫލުކުރެވޭ. މިހެން މިދެންނެވީ އެފަދަ ކަންތައްތައް ފާޅުގައި ބަޔަކު ކުރަމުން ގެންދާތަން ވަރަށް ގިނަ ބަޔަކަށް ފެނި އެވާހަކަތައް ދައްކަމުންދާތީ. ރާއްޖެފަދަ އިސްލާމީ ޤައުމެއްގައި ޣައިރު ދީނީ ކަންކަމަށް ހިތްވަރު ލިބޭގޮތަށް އެއްވެސް ބަޔަކު މަސައްކަތް ކޮށްގެނެއް ނުވާނެ.
މަނިކުފާނުގެ ވެރިކަމުގަ މޫސާ މަނިކަށް ނުހައްގުން އަދަބުދީ، ޖަލަށްލައި އަނިޔާ ކުރި ވާހަކަ އަކީ މޫސަ ވަރަށް ގިނައިން ޕޯޑިއަމް ތަކުގައި ދައްކާ ވާހަކަ އެއް. މި ކަހަލަ ކަމެއް މަނިކުފާނު ހަނދުމަފުޅު އެބަހުރިތޯ؟
ރާއްޖޭގެ ޤާނޫނާ ޚިލާފަށް އެކި ބާވަތުގެ ޢަމަލުތައް ހިންގައިގެން އެކަމުގެ ކުށް ޝަރީޢަތަށް ސާބިތުވާ މީހުންނަށް އަދަބު ދިނުމަކީ މުޅި މުޖްތަމަޢުގެ ސަލާމަތަށްޓަކައި ކުރަން ޖެހޭނެ ކަމެއް. އެގޮތުގެމަތިން އަޅުގަނޑުގެ ރައީސްކަމުގައިވެސް އެކި ބާވަތުގެ ކުށް ޝަރީޢަތަށް ސާބިތުވާ މީހުންނަށް ޤާނޫނީ ގޮތުން ދޭންޖެހޭ އަދަބު ދީފައި ހުންނާނެ. އަޅުގަނޑަށް އެނގިގެން ނުވަތަ އަޅުގަނޑު ހުއްދަކޮށްގެން އެއްވެސް މީހަކަށް ނުޙައްޤުން އަދަބެއް ދީފައެއް ނޯންނާނެ.
ކާށިދޫ ދާއިރާގެ ރައްޔިތުންގެ މަޖިލީހުގެ ބައި އިލެކްޝަނުގައި ވާދަ ކުރެއްވުމުގެ ޝައުގުވެރިކަން މަނިކުފާނުގެ ދަރިކަލުން ޣައްސާން މައުމޫން ވަނީ ފާޅުކުރައްވާފަ. އެކަމާމެދު ކީކޭތޯ ވިދާޅުވަނީ؟ ދަރިކަލުން ނުކުންނަވައިފިނަމަ ތާއީދު ހޯއްދެވުމަށް މަނިކުފާނު ވަޑައިގަންނަވާނަންތޯ؟
ޣައްސާން ބޭނުންވާނަމަ، އެހެން ދިވެހި ރައްޔިތުންނެކޭވެސް އެއްފަދައިން ކުރިމަތިލުމުގެ އިޚްތިޔާރު އޭނާއަށްވެސް އޮންނާނެ. އަދި އޭނާއަކީ މަތީ ތަޢުލީމް ޙާޞިލްކޮށްފައިވާ ޤައުމަށް އިޚްލާޞްތެރި ޒުވާނަކަށްވާތީ އޭނާ ކުރިމަތިލައިފިނަމަ އޭނާއަށް ތާއީދު ހޯދައިދިނުމަށް އިރާދަކުރެއްވިއްޔާ އަޅުގަނޑު މަސައްކަތް ކުރާނަން.
މަނިކުފާނުގެ ކޮއްކޯފުޅު ޢަބްދުﷲ ޔާމީން މިވަނީ އަންނަ ރިޔާސީ އިންތިޚާބުގަ ވާދަ ކުރައްވާނެ ކަމަށް އިޢްލާނު ކުރައްވާފަ. މަނިކުފާނު ރިޔާސީ އިންތިޚާބަށް ކުރިމަތި ނުލައްވާނަމަ ޔާމީނަށް މަނިކުފާނު ތާއީދު ކުރައްވަފާނަންތޯ؟
ކުރިންވެސް ދެންނެވި ފަދައިން ޕީ.ޕީ.އެމް.ގެ ނަމުގައި 2013 ވަނަ އަހަރުގެ ރިޔާސީ އިންތިޚާބަށް ކުރިމަތިލާނީ އަޅުގަނޑުމެން ބާއްވާ ވަރަށް ހުޅުވާލެވިފައިވާ ވަރަށް އިންސާފުވެރި، ޕްރައިމަރީއަކުން ހޮވޭ މީހަކު. އެހެންވީމާ ވަކިމީހަކަށް ތާއީދު ކުރާނަމެކޭ މިވަގުތަކު އަޅުގަނޑަކަށް ނުބުނެވޭނެ.
ޔާމީނާ މަނިކުފާނާ ގުޅުން ކިހިނެއްތޯ؟ ސިޔާސީ މައިދާނުގަ މުހިންމު ނިންމުންތައް ނިންމުން ފަދަ ކަންކަމުގަ ދެބޭފުޅުން މަޝްވަރާ ކުރައްވާ ހައްދަވަންތޯ؟
އަޅުގަނޑާ ޔާމީންއާ ދޭތެރޭ ގުޅުން ވަރަށް ރަނގަޅު. އަޅުގަނޑުމެން ދެމީހުންނަކީ ވަރަށް ގާތް ދެބެން. ސިޔާސީ މައިދާނުގައި މުހިންމު ކަންތައްތަކުގައި އަޅުގަނޑު ވަރަށް ގިނަ މީހުންނާ މަޝްވަރާކޮށްހަދަން. އޭގެތެރޭގައި ޔާމީންވެސް ހިމެނޭ.
ސިޔާސީ ކަންތައްތަކާއިގެން ތިހާ ބުރަކޮށް މަސައްކަތެއް ފައްޓަވާއިރު މަނިކުފާނުގެ އުމުރުފުޅު ތިވަނީ ވަރަށް މައްޗަށް ގޮސްފަ. ޢާއިލާގެ ބޭފުޅުން ތިމަސައްކަތްޕުޅަށް ތާއީދު ކުރައްވާތޯ؟
އާދެ! ޕާޓީއެއް އުފެއްދުމަށް އަޅުގަނޑު މިކުރާ މަސައްކަތަށް އަޅުގަނޑުގެ އަންހެނުންނާ، ކުދިންނާ އަދި ޢާއިލާގެ ހުރިހާ އެންމެންވެސް ވަރަށް ބޮޑަށް ތާއީދުކުރޭ. އުމުރަކީ މުހިންމު އެއްޗަކަށްވިޔަސް މީހާ ކުރާ މަސައްކަތް ކާމިޔާބުވުމުގައި މީހާގެ ޞިއްޙަތާއި، ވިސްނުމާއި، ހިތްވަރާއި، ޢަޒުމާއި، މުރާލިކަމަކީވެސް ވަރަށް ބޮޑު ބައެއް ކުޅޭ އެއްޗެއް. އެހެންވީމާ އަޅުގަނޑުގެވެސް ޞިއްޙަތު ތަންދޭ މިންވަރަކުން ކަންކަމުގައި އުޅެވިދާނެކަމަށްފެނޭ. ދުނިޔޭގެ އެހެން ޤައުމުތަކަށް ބަލާއިރުވެސް ޢުމުރުން ވަރަށް ދޮށި މީހުން އެތަންތާނގެ ސަރުކާރުގެ އިސް މަޤާމުތައް ފުރާފައިވޭ. އަދި މިހާރުވެސް ފުރަމުން ގެންދޭ.
ރައީސް ނަޝީދުގެ ސަރުކާރުން މަނިކުފާނު ހައްޔަރު ކޮށްފާނެ ކަމަށް ޤަބޫލު ކުރެއްވޭތޯ؟
އަޅުގަނޑު ޤަބޫލުކުރާގޮތުގައި އެއްވެސް ޤާނޫނީ ހައިސިއްޔަތަކުން އަޅުގަނޑު ހައްޔަރުކުރެވޭފަދަ ކަމެއް އިރާދަކުރެއްވީތީ މިހާތަނަށް އަޅުގަނޑު ކޮށްފައެއް ނޯންނާނެ. އަދި އިރާދަކުރެއްވިއްޔާ އެފަދަކަމެއް ނުވެސް ކުރާނަން.
ޕީ.ޕީ.އެމް. އަށް ކުރިޔަށް އޮތް ރިޔާސީ އިންތިޚާބު ކާމިޔާބު ކުރެއްވޭނެކަމުގެ ކިހާވަރެއްގެ ޔަޤީންކަމެއް އެބައޮތްތޯ؟ އަދި ކުރިމަތިވާނެ ގޮންޖެހުންތަކަކީ ކޮބައިތޯ؟
2013 ވަނަ އަހަރުގެ ރިޔާސީ އިންތިޚާބު ޕީ.ޕީ.އެމް. އަށް މާތް ﷲ ގެ ވާގިފުޅާއެކު ކާމިޔާބު ކުރެވޭނެކަމަށް ވަރަށް ބޮޑަށް އުންމީދު ކުރެވޭ. އެހެންނަމަވެސް، މިކަމަށް ކުރިމަތިވާނެ ވަރަށް ގިނަ ގޮންޖެހުންތަކެއް އެބަހުރި. އެއީ އެހެން ފަރާތްތަކުންވެސް މިއިންތިޚާބުގައި ވަރަށް ވަރުގަދަޔަށް ވާދަކުރާނެތީ. އަދި ބައެއް ފަރާތްތަކުން އިންތިޚާބު ކާމިޔާބު ކުރުމަށްޓަކައި ބިރުދެއްކުމާ، ދޮގު ވަޢުދުތައް ކުރުމާ ރިޝްވަތުދިނުމާ އަދި އެނޫންވެސް ޤާނޫނާ ޚިލާފު ކިތަންމެ ކަމެއް ކުރަމުން ގެންދާނެ ކަމުގައި ޤަބޫލުކުރެވޭ. ޕީ.ޕީ.އެމް. އަކީ މިފަދަ އެއްވެސް ކަމެއް ކުރާނެ ޕާޓީއެއް ނޫން.
ރާއްޖޭގެ ރައްޔިތުންނަކީ ސައްތައިންސައްތަ މުސްލިމް ރައްޔިތަކަށްވާތީ، ސިޔާސީ ޕާޓީއެއް އިސްކަންދޭ ކަންތައްތަކުގެ ތެރޭގައި ރާއްޖޭގައި އިސްލާމްދީން ރައްކާތެރިކުރުން އޮންނަން ނުޖެހޭނެ ކަމުގައި ބައެއް ބޭފުޅުން ވިދާޅުވޭ. މިކަމާމެދު މަނިކުފާނު ވިދާޅުވަނީ ކީކޭތޯ؟
ތިޔައީ ވަރަށް ބޮޑު އޮޅުވާލުމެއް. އެހެން މިދެންނެވީ ރާއްޖޭގެ ރައްޔިތުން ޣައިރު ދީނަށް އެނބުރުވުމަށްޓަކައި މީގެކުރިންވެސް ބައެއް ފަރާތްތަކުން މަސައްކަތްކޮށްފައިވާތީ. 1990 ގެ ފަހު އަހަރު ތަކުގައި ޖޮޝުއާ ޕްރޮޖެކްޓް އޭ ކިޔުނު ޕްރޮޖެކްޓެއް ބިދޭސީންގެ ބަޔަކު ރާއްޖޭގައި ވަނީ ހިންގާފައި. އެމީހުންގެ އެންމެ ބޮޑު މަޤްޞަދަކަށްއޮތީ 2000 ވަނަ އަހަރު އަންނަންވާއިރަށް ރާއްޖޭގައި ނަސާރާ ދީނުގެ ފައްޅިއެއް ޤާއިމްކުރުން. އެހެންނަމަވެސް އޭރު އެކަން ސަރުކާރަށް އެނގިގެން އެކަން ހިންގަން އުޅުނު ބިދޭސީންތައް ރާއްޖެއިން ޑިޕޯޓް ކުރީ. އަދި އެމީހުންނާ ބައިވެރިވެގެން އުޅުނު ރާއްޖޭގެ ޒުވާން ކުދިންކޮޅަށް ޙަޤީޤަތް ވިސްނައިދީ ނަސޭހަތްދީ އެކުދިންކޮޅު އިޞްލާޙްކުރީ. މިފަދަ ކަންތައްތައް މިހާރުވެސް ހިނގަމުންދާކަން ޤަބޫލުކުރެވޭތީ، ރާއްޖެއަކީ ސައްތައިން ސައްތަ މުސްލިމް ޤައުމެއްގެ ގޮތުގައި ދެމެހެއްޓުމަށް ވަރަށް ވަރުގަދަ ޢަޒުމަކާއެކު މަސައްކަތްކުރުމަކީ އަޅުގަނޑު ދެކޭގޮތުގައި ރާއްޖޭގައި އުފެދޭ ކޮންމެ ސިޔާސީ ޕާޓީއެއްގެވެސް ވަރަށް މުހިންމު މަޤްޞަދަކަށްވާންޖެހޭނެ.
މިދޭތެރެއިން ޢަބްދުﷲ ޝާހިދު މީޑިޔާގައި ވިދާޅުވި ވާހަކަފުޅެއްގެ ތެރޭގައި މަނިކުފާނު ދެން ސިޔާސީ އެއްވެސް ކަމެއްގައި ނޫޅުއްވާނެކަމަށް ޝާހިދު އަރިހުގައި ވިދާޅުވެފައިވާކަމަށް އޭނާ ވިދާޅުވޭ. މީ ޙަޤީޤީ ވާހަކަފުޅެއްތޯ؟
ޢަބްދުﷲ ޝާހިދަކީ ވަރަށް ހަނދުމަފުޅު ގަދަ ވަރަށް ވިސްނުންފުޅު ތޫނު ބޭފުޅެއް. އެކަމަކު ޝާހިދަކީވެސް އިންސާނެއް. އެހެންވީމާ ބައެއް ކަންތައްތައް ހަނދުމަފުޅުނެތުމަކީވެސް، އަދި އޮޅިވަޑައިގެންފައިއޮތުމަކީވެސް އެކަށީގެންވާކަމެއް. މި ސެޕްޓެމްބަރު މަހުގެ 4 ވަނަ ދުވަހާ ހަމަޔަށް އަޅުގަނޑު ހުރީ ރާއްޖޭގައި އޮތް އެންމެ ބޮޑު އެއް ސިޔާސީ ޕާޓީގެ އެންމެ އިސް މަޤާމުގައި ކަމަށްވާތީ އެއްވެސް ސިޔާސީ ކަމެއްގައި އަޅުގަނޑު ބައިވެރިއެއް ނުވާނަމޭ އޭރު ބުނުމަކީ އަޅުގަނޑު ހިތުން ބުއްދި ޤަބޫލުކުރާ ކަމެއްނޫން.