ހެޔޮލަފާ ތެދުވެރި ބަޔަކަށް ވެވޭނީ އިސްލާމްދީނުގައި އަންގާފައިވާ ގޮތަށް ވަކިކަހަލަ ތަމްރީނުތަކެއް ލިބި، ވަކި ގޮތަކަށް ކަންތައްތައް އާދަކޮށްގެން ކަމުގައި ރައީސް މައުމޫނު އަބްދުލް ގައްޔޫމު ވިދާޅުވެއްޖެ އެވެ.
މައުމޫނު ފައުންޑޭޝަންގެ ފަރާތުން ރޯދަމަހު ބާއްވާ އިހްޔާ ޕްރޮގްރާމްގެ މިއަހަރުގެ ފުރަތަމަ ޖަލްސާގައި ވާހަކަފުޅު ދައްކަވަމުން މައުމޫނު ވިދާޅުވީ ހެޔޮލަފާ ތެދުވެރި ބަޔަކަށް ވެވޭނީ އިސްލާމް ދީނުގައި އަންގަވާފައިވާ ގޮތަށް ވަކިކަހަލަ ތަމްރީނުތަކެއް ލިބި، ވަކި ގޮތަކަށް ކަންތައްތައް ކުރަން އާދަކޮށްގެން ކަމަށެވެ. އެމަނިކުފަނު ފާހަގަކުރެއްވި ގޮތުގައި ދީނުގައި އަންގަވާފައިވާ ގޮތަށް ރޯދަމަހު ރޯދަ ހިފުމާއި ފަރުލު ފަސް ނަމާދު ކުރުމާއި ހައްޖާއި އުމުރާ ވުމުގެ ތަނަވަސްކަން ލިބިފައިވާ ފަރާތްތަކުން އެ ފަރުލު އަދާކުރުމާއި ޒަކާތް ދިނުމުގެ ޝަރުތުހަމަވާ މީހުން ޒަކާތްދީގެނެވެ.
"މި ތަމުރީނުތައް އަޅުގަނޑުމެންނަށް މި ލިބެނީ ވަކި ހަމައެއްގެ މަތިން ﷲ އަންގަވާ ކަނޑައަޅުއްވާފައިވާ ނިޒާމެއްގެ މަތިން އެކަން ކޮށްގެން އެއިން ލިބޭ ފައިދާއިން ނަފުސު ހާނުވައިގެން،" މައުމޫނު ވިދާޅުވި އެވެ.
އިސްލާމީ މަރުކަޒުގައި، އަޅުކަމާއި ސަހުސިއްޔަތުގެ މައުލޫއަށް ވާހަކަފުޅު ދައްކަވަމުން އެމަނިކުފަނު ވިދާޅުވީ އަޅުކަމަކީ ޝަހުސިއްޔަތު ބިނާކުރަން އޮތް އެންމެ މުހިންމު ވަސީލަތް ކަމަށާއި އިސްލާމް ދީނުގެ ރުކުންތައް ކަމަށްވާ ނަމާދާއި ރޯދަ އާއި ޒަކާތްދިނުމާއި ހައްޖުގެ އަޅުކަން އަދާކުރުން ފުރިހަމަ ކުރުން ކަމަށާއި އެކަންކަން އަދާކުރުމުން ލިބޭނެ އެންމެ ބޮޑު ފައިދާއަކީ ރޫހާނީ ފައިދާ ކަމަށެވެ.
"މާތްﷲ އަންގަވަފައިވާ ގޮތުގެ މަތިން މި މުހިންމު އިސްލާމީ ރުކުންތައް އަދާކުރީމާ އަޅުގަނޑުމެންނަށް ލިބޭނެ އެންމެ ބޮޑު ފައިދާއަކީ ރޫހާނީ ފައިދާ އަޅުގަނޑުމެންގެ އީމާންތެރިކަން ވަރުގަދަވުން ﷲ ގެ ހަޒުރަތަށް ކުއްތަންވުން އަޅުގަނޑުމެން ކުރާ ކޮންމެ ކަމެއް ކުރަނީ އަޅުގަނޑުމެން ކުރާ ކަންތައްތައް ﷲ ދެކެ ދެނެވޮޑިގެންވާކަން ގަބޫލު ކުރުން. އެކަލާނގެ ހުއްދަ ކުރާ ގޮތަށް މެނުވީ އެއްވެސް ކަމެއް ނުކުރުރާނެ ކަމުގެ ޔަގީންކަން ނުވަތަ އަޒުމު އަޅުގަނޑުމެންގެ ހިތުގައި އޮތުން. އަބަދުވެސް އަޅުގަނޑުމެންނަކީ ﷲ ސުބުހާނަހޫ ވަތައަލާގެ ކުރިފުޅުމަތީގައި ވަރަށް ނިކަމެތި އެއްވެސް އާރެއް ބާރެއް ނެތް ބަޔެއްކަން ގަބޫލު ކުރުން،" މައުމޫނު ވިދާޅުވި އެވެ.
މިރޭގެ އިހްޔާ ޕްރޮގްރާމުގައި ރައީސް މައުމޫނުގެ އިތުރުން ކުރީގެ އުއްތަމަ ފަނޑިޔާރު އަދި އިސްލާމީ ކަންތަކާ ބެހޭ އެންމެ މަތީ މަޖިލީހުގެ ރައީސް މުހައްމަދު ރަޝީދު އިބުރާހީމް ވެސް ވާހަކަފުޅު ދެއްކެވި އެވެ. އެމަނިކުފާނުގެ ވާހަކަފުޅު ބިނާ ކުރެއްވީ ދޫ ރައްކާތެރިކުރުމުގެ މުހިންމު ކަމުގެ މައްޗަށެވެ. ރަޝީދުގެ ވާހަކަފުޅުގައި އެކަކު އަނެކަކަށް މަލާމަތްކޮށް ފުރައްސާރަ ކުރަމަކީ މުޖުތަމައުގައި މިހާރު އެއްވެސް ޖެހިލުމެއްނެތި ކުރާ ކަމެއް ކަމަށާއި އެފަދަ ކަންކަމަކީ ބޮޑެތި ފާފަތަކުގެ ތެރޭގައި ހިމެނޭ ކަމެއްކަން ފާހަގަކުރައްވައި އާޑަފުރައްސާރަ ނުކުރަން ނަސޭހަތްތެރިވެ ވަޑައިގެންނެވި އެވެ.
މައުމޫނު ފައުންޑޭޝަނުން ރޯދަ މަހުގެ ރޭތައް އިހުޔާކުރުމުގެ ޕްރޮގްރާމެއް ކުރިއަށް ގެންދާތާ މިވީ ތިން އަހަރެވެ. މިއަހަރުގެ ޕްރޮގްރާމް ރޯދަމަހުގެ ކޮންމެ އަންގާރަވިލޭރެއަކު ކުރިއަށް ގެންދެ އެވެ.