މީގެ 10 އަހަރު ކުރިން ޑިސެމްބަރު 26، 2004 ގައި ރާއްޖެ އަށް ކުރިމަތިވި ސުނާމީއާ ގުޅިގެން ވަގުތީ ހިޔާތަކުގައި ދިރިއުޅެމުން ދިޔަ މީހުންގެ ތެރެއިން މިހާރު އެއްވެސް ރައްޔިތަކު އެތަންތަނުގައި ނޫޅޭނެ ކަމަށް ހައުސިން މިނިސްޓަރު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ. ރާއްޖޭގެ 71 ވަނަ ގައުމީ ދުވަހާއި ސުނާމީއާ ގުޅިގެން ފާހަގަކުރާ ގައުމީ އެއްބައިވަންތަކަމުގެ ދުވަހުގެ ރަސްމީ ޖަލްސާގައި މިނިސްޓަރު ވިދާޅުވީ ސުނާމީގައި ގެދޮރު ގެއްލުނު މީހުންގެ ތެރެއިން ގިނަ އާއިލާތަކާ ދާއިމީ ގެތައް ހަވާލުކޮށްފައިވާ ކަމަށެވެ. ބާކީ ހުރި ގެތައް ވެސް ވަރަށް އަވަހަށް ހަވާލުކުރާނެ ކަމަށް މިނިސްޓަރު ވިދާޅުވި އެވެ. އެ ގެތައް މި މަސް ނިމުމުގެ ކުރިން ހަވާލުކުރަން ސަރުކާރުން އަންނަނީ މަސައްކަތް ކުރަމުންނެވެ. މިނިސްޓަރު ވިދާޅުވި ގޮތުގައި ސުނާމީ އަށް 10 އަހަރު ފުރޭއިރު އާއިލާތަކަށް ދާއިމީ ހިޔާވަހިކަން ނުލިބި ތިބެން ޖެހުމަކީ ސަރުކާރުގެ އިހުމާލު އޮތް ކަމެއް ކަމަށާއި އެކަމުން ރެކެވޭނެ ގޮތެއް ވެސް ނެތް ކަމަށެވެ. ގެތައް ނުނިމި ދިގުލައިގެން ދިޔައީ ވޭތުވެދިޔަ ފަސް އަހަރު ޕްރޮޖެކްޓްތައް މެނޭޖްކުރި ގޮތުން ކަމަށާއި އެ މުއްދަތުގައި އެތައް ފައިސާއެއް ބޭކާރުވި ކަމަށް ވިދާޅުވި އެވެ. މުއިއްޒު ވިދާޅުވީ ސުނާމީގައި ހާލުގައި ޖެހުނު މީހުންނަށް މާދަމާގެ ކުރިން ދާއިމީ ބޯހިޔާވަހިކަން ފޯރުކޮށްދިނުމަށް ރައީސް އަބްދުﷲ ޔާމީން ވެވަޑައިގެންފައިވާ ވައުދާ އެއްގޮތަށް ކާމިޔާބު މަސައްކަތްތަކެއް ކުރެވިފައިވާ ކަމަށެވެ. "€œހުރިހާ ގޮންޖެހުންތަކާ އެކު ވެސް ކުރެވުނު މަސައްކަތް ވަރަށް ކާމިޔާބު. މިގޮތުން މަޑިފުށީގައި ހަދަމުން ދިޔަ 41ގެެ އެއްކޮށް ވަނީ ނިމިފައި. ދާންދޫގައި ހަދަމުން ދިޔަ 87 ގޭގެ ތެރެއިން 86 ގެ ވަނީ ނިމިފައި. ނިލަންދޫގައި ހަދަމުން ދިޔަ 50 ގޭގެ ތެރެއިން 45 ގޭގެ މަސައްކަތް ވަނީ ނިމިފައި. ވިލިނގިލީގައި ހަދަމުން ދިޔަ 76 ގޭގެ ތެރެއިން 59 ގޭގެ މަސައްކަތް ނިމި، މާމެންދޫގައި ހަދަމުން ދިޔަ 84 ގޭގެ ތެރެއިން 51 ގޭގެ މަސައްކަތް މިވަނީ ނިމިފައި،"€ މިނިސްޓަރު ވިދާޅުވި އެވެ. މުއިއްޒު ވިދާޅުވި ގޮތުގައި ގއ. އާއި ތ. މަޑިފުށީގައި އިމާރާތްކުރާ ގެތައް ނިންމަން ހަވާލުކުރި ކުންފުނިތަކަށް ގެތައް ނުނިންމޭނެ ކަމަށް ސަރުކާރަށް ފެނިގެން އެ މަސައްކަތް ކުރިއަށް ގެންދިޔައީ ސަރުކާރާއި އަމިއްލަ ކުންފުނިތަކާއި ސިފައިން މަސައްކަތަށް ނެރެގެންނެވެ. ވޭތުވެދިޔަ ހަތަރު އަހަރު ނުކުރާ މަސައްކަތް، ގެތައް ނިންމަން ވޭތުވެދިޔަ މަހެއްހާ ދުވަހުގެ ތެރޭގައި ކޮށްފައިވާ ކަމަށް ވެސް މިނިސްޓަރު ވިދާޅުވި އެވެ. ގއ. ހަތަރު ރަށެއްގައި އަޅާ ގެތައް ވިމްލާ ކުންފުންޏާ ހަވާލުކޮށްފައިވާއިރު، މަޑިފުށީ ގެތައް ހަވާލުކުރީ ބޭރުގެ ކުންފުންޏަކާ އެވެ. އެކަމަކު މިހާރު އެ މަސައްކަތް ކުރަމުން އަންނަނީ އެމްޓީސީސީ އާއި އެމްއާރުޑީސީ އާއި ސިފައިންގެ އިތުރުން ސަރުކާރުން ކަނޑައެޅި ބައެއް އަމިއްލަ ކުންފުނިތަކުންނެވެ. މިނިސްޓަރު ވިދާޅުވި ގޮތުގައި މާދަމާ އަށް ގެތައް ނިންމުމަށް ސަރުކާރުން ކުރި މަސައްކަތަށް އިދިކޮޅު ފަރާތްތަކުން ވަނީ ހުރަސްއަޅައިފަ އެވެ. އޭގެ މާ ބޮޑު ތަފްސީލެއް ނުދެއްވައި ވިދާޅުވީ ގެތައް ނިންމަން ކޮށްފައިވާ މަސައްކަތަށް ގެއްލުންދީ މަސައްކަތް ހުއްޓުވުން ފަދަ ކަންކަން ކޮށްފައިވާ ކަމަށެވެ.