ކްރިމިނަލް ކޯޓުން ފުލުހުންގެ މައްޗަށް ނެރުނު އަމުރާ އެއްގޮތަށް ހޯމް މިނިސްޓަރު އުމަރު ނަސީރު މާދަމާ ކޯޓަށް ހާޒިރުކުރާނެ ކަމަށް ފޮލިސް ކޮމިޝަނަރު ހުސެއިން ވަހީދު ވިދާޅުވެއްޖެ އެވެ.
ހުސެއިން ވަހީދު މިއަދު ސަންއަށް ވިދާޅުވީ، ފުލުހުންގެ މައްޗަށް ކޯޓުން ނެރުނު އަމުރަށް ތަބާވާނެ ކަމަށާއި އަދި އެ އަމުރު ތަންފީޒު ކުރައްވާނެ ކަމަށެވެ.
" ކޯޓުން ނެރުނު އަމުރާ އެއްގޮތަށް މަދާމާ ހޯމް މިނިސްޓަރު ކޯޓަށް ހާޒިރުކުރާނަން. ފުލުހުން ކޯޓުން ނެރޭ އަމުރުތަކަށް ފުރިހަމައަށް ތަބާވާނެ،" ހުސެއިން ވަހީދު ވިދާޅުވި އެވެ.
ހޯމް މިނިސްޓަރު އުމަރު ނަސީރު ހައްޔަރުކޮށްގެން ކޯޓަށް ހާޒިރު ކުރުމަށް ފުލުހުންގެ މައްޗަށް އަމުރު ނެރެފައި ވަނީ މި މަހުގެ 12 ވަނަ ދުވަހު އެވެ.
އުމަރުގެ މައްޗަށް ދައުލަތުން އުފުލާފައިވާ އަމުރަށް ނުކިޔަމަންތެރި ވުމުގެ ދައުވާއާ ގުޅިގެން ކްރިމިނަލް ކޯޓުން އެންމެ ފަހުން ބާއްވަން އުޅުނު ދެ އަޑު އެހުން ވެސް ކެންސަލް ކޮށްފައި ވަނީ، އުމަރު ރާއްޖޭން ބޭރުގައި ހުންނެވުމުންނެވެ. އަދި ހޯމް މިނިސްޓްރީން ވަނީ، އުމަރު ރަސްމީ ދަތުރުފުޅެއްގައި ރާއްޖޭން ބޭރަށް ފުރާވަޑައިގަންނަވާތީ، މިމަހުގެ 16ގެ ކުރިން ކޯޓަށް ހާޒިރު ވެވަޑައިގަނެވެން ނެތްކަމަށް އަންގައި ކްރިމިނަލް ކޯޓަށް ސިޓީއެއް ވެސް ފޮނުވައިފައެވެ.
އުމަރުގެ މައްޗަށް އުފުލާފައިވާ އަމުރަށް ނުކިޔަމަންތެރިވުމުގެ ދައުވާގައި ދައުލަތުން ބުނެފައި ވަނީ ކުރީގެ ރައީސް މުޙައްމަދު ނަޝީދުގެ ވެރިކަމާ ދެކޮޅަށް 2012 ވަނަ އަހަރުގެ ކުރީކޮޅު އިދިކޮޅު ފަރާތްތަކުން ކުރި މުޒާހަރާއެއްގައި ވާހަކަ ދައްކަވަމުން، 50 ހަރުގަނޑު ބޭނުން ކޮށްގެން ސިފައިންގެ މައި މަރުކަޒު ތެރެއަށް ވަންނާނެ ކަމަށް ދޭހަވާ ގޮތަށް ވާހަކަ ދައްކަވާފައިވާ ކަމަށެވެ.