ހުޅުމާލޭގައި އިމާރާތްކުރާ އެއްހާސް ފްލެޓްގެ މަސައްކަތް ނިމި 2013 ވަނަ އަހަރުގެ ޖެނުއަރީމަހުގެ ތެރޭގައި ފްލެޓްތައް ވެރިފަރާތާއި ހަވާލުކުރެވޭނެ ކަމަށް ހައުސިން މިނިސްޓަރ ޑރ މުހައްމަދު މުއިއްޒު ވިދާޅުވެއްޖެއެވެ.
ހުޅުމާލޭގައި އިމާރާތްކުރާ އެއްހާސް ފްލެޓާއި ވެށިފަހި މާލެ ޕްރޮގްރާމްގެ ދަށުން ހުޅުމާލެއިން ގޯތި ދޫކުރުމަށް ހަމަޖެހިފައިވާ ސަރަހައްދަށް ބޭނުންވާ މަގާއި، ޚިދުމަތްތައް ގާއިމުކުރުމުގެ އަމަލީ މަޝްރޫޢުގައި ޗައިނާގެ ސީއެމްއީސީއާއި ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީއާ މިނިސްޓްރީ އޮފް ހައުސިން ޓްރާންސްޕޯޓާއެކު އެއްބަސްވުމުގައި ސޮއިކުރުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހައުސިން މިނިސްޓަރ ވިދާޅުވީ، 8.9 މިލިޔަން ޑޮލަރުގެ މަގު ހެދުމުގެ މަޝްރޫޢުވެސް މިއަދު ހަވާލުކުރެވުނީ އެއްހާސް ފްލެޓްގެ މަސައްކަތްވެސް ހަވާލުކޮށްފައިވާ ޗައިނާގެ ސީއެމްސީ ކުންފުންޏާއި ކަމަށެވެ. ފްލެޓްތައް ނިމި ފްލެޓްތައް ވެރިފަރާތާއި ހަވާލު ކުރެވޭއިރު އެސަރަހައްދުގެ މަގުތައްވެސް ހުންނާނީ ރަނގަޅު ފެންވަރަކަށް ހެދިފައި ކަމަށާއި، އެހެންކަމުން ފްލެޓްތަކުގައި ދިރިއުޅެން ފަށާ އާއްމު ރައްޔިތުންނަށް ބޮޑު ފަސޭހައެއް ލިބިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ޑރ މުއިއްޒު ވިދާޅުވީ، މަގުތައް ހެދުމުގެ ޕްރޮޖެކްޓްގެ ދަށުން ހަތަރެއް ޕޮއިންޓް ހަތެއް ކިލޯ މިޓަރުގެ މަގު ހެދިގެންދާނެ ކަމަށެވެ. ޗައިނާގެ ސީއެމްސީ ކުންފުންޏާއި މިމަސައްކަތް ހަވާލު ކުރެވިފައިވަނީ ބާރަމަސް ދުވަހުގެ ތެރޭގައި ނިންމާގޮތަށް ކަމަށްވެސް މިނިސްޓަރ ވިދާޅުވިއެވެ.
ޑރ މުއިއްޒު ވިދާޅުވީ، ވެށިފަހި މާލެ ޕްރޮޖެކްޓްގެ ދަށުން ދޫކުރެވޭ 250 ފްލެޓް ހިމެނޭ ސަރަހައްދުގެ މަގުތައްވެސް މިޕްރޮޖެކްޓްގެ ދަށުން ހަދާ ނިންމާނެ ކަމަށެވެ. އެހެންނަމަވެސް ފުރަތަމަ މަސައްކަތް ނިންމާނީ އެއްހާސް ފްލެޓް ހަދާ ހިމެނޭ ސަރަހައްދުގެ މަގުތައް ކަމަށެވެ.