ޣައްޒާ ހަނގުރާމަ ހުއްޓައިލުމަކީ، ޣައްޒާގެ މުސްލިމުން ނަސްލުހޭދު ކުރުމަށް ޔަހޫދީން ހިންގަމުންދާ ލާއިންސާނީ ޢުދުވާނާ ދެކޮޅަށް ފަލަސްޠީނުގެ ރައްޔިތުން ދެއްކި ހިތްވަރަށް ލިބުނު ކާމިޔާބީއެއްގެ ގޮތުގައި، އީރާނުގެ އިންޤިލާބީ ފައުޖުން ސިފަކޮށްފިއެވެ.
ފާއިތުވި 15 މަސް ދުވަހު ފަލަސްޠީނުގެ ޣައްޒާގައި ކުރަމުންދާ ހަނގުރާމަ އަންނަ އާދީއްތަ ދުވަހުން ފެށިގެން ހުއްޓާލައި، އަސީރުން ބަދަލު ކުރުމަށް ޔަހޫދީ ދައުލަތާއި ޣައްޒާގައި ވެރިކަންކުރާ ޙަމާސް ޖަމާޢަތުން ވަނީ އެެއްބަސްވެފައެވެ.
"ހަނގުރާމަ ނިމުމާއި ޒަޔަނިސްޓް ވެރިކަމަށް ހަނގުރާމަ ހުއްޓާލުމަށް މަޖުބޫރުވުމަކީ، ފަލަސްޠީނަށް ލިބުނު ބޮޑު ކާމިޔާބީއެއް އަދި ޒަޔަނިސްޓް ވެރިކަމަށް ލިބުނު ބޮޑު ނާކާމިޔާބީއެއް،" އީރާނުގެ އިންޤިލާބީ ފައުޖުން ނެރުނު ބަޔާނެއްގައި ބުންޏެވެ.
ފަލަސްޠީނުގެ ރައްޔިތުންގެ ހައްޤުގައި، އީރާނާއި އެ ޤައުމުން ވާގިދޭ ޔަމަނުގައި ހަރަކާތްތެރިވާ ޙޫޘީންނާއި ލުބްނާނުގެ ޙިޒްބުﷲން ވަނީ ޔަހުދީ އިސްތިޢުމާރީ ފައުޖާ ދެކޮޅަށް ޙަމާސަށް އެކި ގޮތްގޮތުން އެހީތެރިކަން ފޯރުކޮށްދީފައެވެ. ޣައްޒާއަށް ދެމުންދާ ޢުދުވާނީ ޙަމަލާތައް ހުއްޓައިލުމުގެ އެއްބަސްވުމާ ޚިލާފަށް ޔަހޫދީ ދައުލަތުން ހިންގާ ކޮންމެ ޢަމަލަކަށް ފާރަވެރިވެ، ރައްދު ދޭން ތައްޔާރަށް އޮތް ކަމުގެ އިންޒާރު ވެސް އެ ބަޔާނުގައި އީރާނުގެ އިންޤިލާބީ ފައުޖުން ވަނީ ދީފައެވެ.
ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 46,584އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 109,731 މީހުން ޒަޚަމު ކޮށްލާފައެވެ.