މިނިސްޓްރީގެ ހުއްދަ ނެތި، ރަޖިސްޓްރީ ނުކޮށް ގަވައިދާ ހިލާފަށް ހިޖާމާ ޖެހުމުގެ މަސައްކަތް ކުރަމުންދާތީ ހުއްޓުވާފައި އޮތް 'ފަޒީސް ހިޖާމާ ތެރަޕީ' ކްލިނިކް އެންމެ ފަހުން ރަޖިސްޓްރީކޮށްފި އެވެ. އެކަމަކު އެ ކްލިނިކް ހިންގާ ފަޒީލާ އުސްމާން ބުނީ ހުއްޓުވާފައި އޮތް ދުވަސްތަކަށް ލިބުނު ގެއްލުން ހޯދުމަށް އޭނާ ކޯޓަށް މައްސަލަ ހުށަހަޅާފައިވާ ކަމަށެވެ.
ވީ ކިހިނެއް؟ - އެ ކްލިނިކްގެ މައްސަލަ ދޭތެރެ ދޭތެރެއިން ފެންމަތިވެ އެވެ. އެކަމަކު ހުއްދަ ނުހޯދައި އެ މަސައްކަތް ކުރަމުން ދާތީ، ފުލުހުން މެދުވެރިކޮށް އެތަން ހުއްޓުވާފައި ވަނީ މިދިޔަ ސެޕްޓެމްބަރު މަހުގެ ތެރޭގަ އެވެ.
ތަފްސީލް - މިއަދު ފޭސްބުކްގައި ކުރި ޕޯސްޓެއްގައި ފަޒީލާ ބުނީ އޭނާގެ ކްލިނިކް ރަޖިސްޓްރީ ކުރުމާ އެކު، އަށް އަހަރު ކުރިއްސުރެ ކުރަމުން އައި އުއްމީދެއް ހާސިލްވީ ކަމަށެވެ. އޭނާ ބުނި ގޮތުގައި:
ކްލިނިކް ރަޖިސްޓްރީވި ނަމަވެސް އެ ތަނުގައި އަދި ހިދުމަތް ދޭން ނުފަށާ
ހިދުމަތް ދެވޭނީ، އެ ކަމަށް ބޭނުންވާ ލައިސަންްސް ހޯދުމަށް ފަހުގައި
އެ ލައިސަންސް ހޯދުމުގެ މަސައްކަތް ކުރަމުން އަންނަ ކަމަށް ބުނި
ފަޒީލާ ބުނީ ކްލިނިކް ހުއްޓުވާފައި އޮތުމުން އޭނާއަށް ލިބުނު ގެއްލުމުގެ ބަދަލާއި އިނގިރޭސިވިލާތުގެ އިންސްޓިޓިއުޓަކުން އޭނާ ހެދި ހިޖާމާ ކޯހުގެ ސެޓްފިކެޓް، އެލައިޑް އިންޝުއަރެންސުން ގަބޫލު ނުކުރި މައްސަލަ މިހާރު ކޯޓަށް ހުށަހަޅާފައިވާ ކަމަށެވެ.
އެނގުން މުހިއްމު - ޑޮކްޓަރީ ބޭހުގެ ބަދަލުގައި ހިޖާމާ ޖަހައިގެން އެކި ކަހަލަ ބަލިތަކަށް ފަރުވާ ހޯދޭނެ ކަމަށް ބުނެ، އެ ވިޔަފާރި ހިންގާ ފަޒީލާ ކުރާ ޕޯސްޓުތަކަށް އާއްމުންގެ ފާޑުކިޔުން އަމާޒުވެފައި ވާއިރު، މީގެ ކުރިން ވެސް އޭނާގެ މިފަދަ މައްސަލައެއް ފެންމަތިވި އެވެ. އެގޮތުން:
ހަކުރު ބަލީގެ މީހުން އިންސިއުލިންގެ ބަދަލުގައި ހިޖާމާ ޖަހައިގެން ހަކުރު ބައްޔަށް ފަރުވާ ހޯދޭނެ ކަމަށް ބުނެ 2022 ވަނަ އަހަރު ފަޒީލާ ދެއްކި ވާހަކައާ ގުޅިގެން އެ ކްލިނިކްގެ މައްސަލަ ބެލި 
ތަން ރަޖިސްޓްރީނުކޮށް ހިންގާތީ އެކަން ކުރުމަށް އިރުޝާދު ދިން
ދެން ހިދުމަތް ދޭނީ ސަރުކާރު މިންގަނޑުތަކަށް ފެތޭ ގޮތަށް، ހުއްދަ ހޯދައިގެން ކަމަށް ފަޒީލާ އޭރު މީޑިއާތަކަށް ބުނި ނަމަވެސް އަދިވެސް އޭނާ އެ ހުއްދައެއް ނުހޯދާ
އޭގެ ފަހުން ދެ އަހަރު ވީއިރު ވެސް، ރަޖިސްޓްރީ ނުކޮށް ފަޒީލާ ކްލިނިކް ހިންގަމުންދާތީ، ފަޒީލާގެ ކްލިނިކަށް ފިޔަވަޅު އެޅުމަށް ކޮލިޓީ އެޝުއަރެންސް ޑިޕާޓްމެންޓުން އެ ތަނުގެ ލީގަލް ޑިޕާޓްމެންޓަށް އަންގާފައިވާ ކަމަށް ހެލްތު މިނިސްޓްރީން ވަނީ މިދޔަ އަހަރުގެ ޖޫން މަހު ބުނެފަ އެވެ.