ހުޅުމާލޭގެ ފުރަތަމަ ފިޔަވަހީގައި އިއްޔެ ހިނގި އެކްސިޑެންޓެއްގައި، މަޑުނުކޮށް ފިލި މީހަކު ހައްޔަރުކޮށް، ބަންދުގެ މުއްދަތު ޖަހައިފިއެވެ. މި މައްސަލާގައި ހައްޔަރުކޮށްފައި ވަނީ ގދ. ވާދޫ، 27 އަހަރުގެ ލޫތު އިބްރާހީމެވެ. ފުލުހުން ބުނީ، އިއްޔެ ހުޅުމާލޭ ނިރޮޅުމަގު، ކެއާ ޕްލަސް ފިހާރަ ކައިރިން ހިނގާފައި ދިޔަ މީހެއްގެ ގައިގައި ސައިކަލުން ޖެހި އެކްސިޑެންޓުވި މައްސަލައެއް ރިޕޯޓުކޮށްފައިވާ ކަމަށެވެ. އެގޮތުން، އެކްސިޑެންޓުގައި އަނިޔާވި 63 އަހަރުގެ ދިވެހި ފިރިހެނަކަށް ކަމަށްވާއިރު، އޭނާއަށް ހޮސްޕިޓަލުގައި ފަރުވާ ދިނުމަށް ފަހު މިހާރު ވަނީ ދޫކޮށްލާފައެވެ. ފުލުހުން ބުނި ގޮތުގައި، މި އެކްސިޑެންޓު ހިނގުމުން ސައިކަލު ދުއްވި މީހާ، ސައިކަލު ބޭއްވުމަށް ފަހު ފިލި ކަމަށާއި އިއްޔެގެ ވަގުތެއްގައި އޭނާ ހައްޔަރުކޮށްފައިވާ ކަމަށެވެ. މި މައްސަލާގައި އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ހަތް ދުވަހަށް ބަންދުކުރަން ކޯޓުން ވަނީ އަމުރުކޮށްފައެވެ. މި މައްސަލަ ފުލުހުން އަންނަނީ ތަހުގީގު ކުރަމުންނެވެ. ފާހަގަކޮށްލެވޭ ގޮތުގައި، އެކްސިޑެންޓުތައް ހިނގުމުން މަޑުނުކޮށް ފިލި މީހުން މީގެކުރުން ވެސް ހައްޔަރުކޮށްފައި އެބަ ހުއްޓެވެ.