ސަލްޓަން ޕާކު ދެން ތަރައްގީ ކުރާނީ، "އެއް ގަހުން އަނެއް ގަހަށް ދެވޭ ގޮތަށް"، މަތީގައި ހަރަކާތްތަކެއް ހިމެނޭ ގޮތަށް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ވީ ކިހިނެއް؟- މިއަދު އާންމުކުރި 'ރައްޔިތުންނާ އެކު' ޕޮޑްކާސްޓުގައި ރައީސް ވަނީ ޕާކުތައް ތަރައްގީ ކުރުމުގެ މުހިއްމު ކަމާ ގުޅޭ ގޮތުން ވާހަކަފުޅު ދައްކަވައިފަ އެވެ. އެމަނިކުފާނުގެ ވިސްނުންފުޅަކީ މާލޭގެ ސަލްޓަން ޕާކު ވަރަށް ޝައުގުވެރިކުރުވަނިވި ގޮތަކަށް އަލުން ތަރައްގީ ކުރުން ކަމަށް ވިދާޅުވި އެވެ.
ރައީސް ވިދާޅުވި ގޮތުގައި ސަލްޓަން ޕާކަކީ ބޮޑެތި ގިނަ ގަސްތަކެއް ހުންނަ ތަނަކަށް ވުމުން، އަލުން އެތަން ހަދާނީ އެއް ގަހުން އަނެއް ގަހަށް ވެސް ދެވޭ ގޮތަށް، މަތީގައި ބައިތަކެއް ހިމަނައިގެން ކަމަށެވެ. ރައީސް އެ މާނަކުރެއްވީ ކޮންމެވެސް ކަހަލަ ބްރިޖަކުން އެއް ގަހުން އަނެއް ގަހަށް ދެވޭ ގޮތަށް ކަމަށް ބެލެވެ އެވެ.
"މިއީ ހަމައެކަނި ކުޑަކުދިންނަކަށް ނޫން. ބޮޑެތި މީހުންނާއި ޒުވާނުންނަށް ވެސް އެންޖޯއީ ކުރެވޭ ގޮތަށް، އެޑްވެންޗަރަސް ތަނެއްގެ ގޮތުގައި ދެން ތަރައްގީކުރާނީ،" ރައީސް ވިދާޅުވި އެވެ.
އެހުރިހާ ސިފަތަކާ އެކު އެމަނިކުފާނު ވިދާޅުވީ 'ބިންމަތީގެ އިތުރުން މަތީގައި ވެސް ކުޑަ ޕާކެއް އަންނާނެ' ކަމަށެވެ.
އެނގުން މުހިއްމު- ސަލްޓަން ޕާކު ތަރައްގީ ކުރައްވާނެ ކަމަށް ރައީސް ވިދާޅުވި އިރު، އެތަން ތަރައްގީކުރަން މާލޭ ސިޓީ ކައުންސިލުން މިދިޔަ ފެބުރުއަރީ މަހު ވަނީ އިއުލާންކޮށްފަ އެވެ.
ސަލްޓަން ޕާކް ތަރައްގީކުރުމުގެ ވާހަކަ ރައީސް އެކްސްގައި އޭރު ލިއުއްވީ އެކަމަށް ބަޔަކު ހޯދަން މާލޭ ސިޓީ ކައުންސިލުން އިއުލާންކުރުމާ އެކުގަ އެވެ. އެހެންވެ މާލޭ މޭޔަރު އާދަމް އާޒިމް ވަނީ ރައީސަށް ފާޑު ވެސް ވިދާޅުވެފަ އެވެ.
އޭނާ ކުރިން ވިދާޅުވި ގޮތުގައި ސަލްޓަން ޕާކު ތަރައްގީ ކުރައްވަން ރައީސް އިއުލާން ކުރެއްވީ، އެކަން ކުރުމަށް ސިޓީ ކައުންސިލުން ތައްޔާރުވެފައި ވަނިކޮށް ކަމަށެވެ. އެހެންވެ ރައީސް އުޅުއްވަނީ އެކަމުގެ 'ކްރެޑިޓް ނަންގަވަން' ކަމަށް ވެސް އޭނާ ވިދާޅުވި އެވެ.
"އަޅުގަނޑު ހަވާލުވި ފަހުން އެސެސްމެންޓެއް ހަދާފައި ބިޑަށް ހުޅުވާލަން އޮތީ. ރައީސްއަށް އެނގިވަޑައިގަތީ ކަންނޭނގެ ބިޑަށް ހުޅުވާލަން އުޅޭކަން. މިއަދު ނޫނީ މަދަމާ ބިޑަށް އިއުލާން ކުރާނެ އެތަން މަރާމާތުކޮށް ހަދަން،" އޭރު އާޒިމް ވިދާޅުވި އެވެ.
"އެބޭފުޅާ [ރައީސް މުއިއްޒު މޭޔަރު ކަމުގައި] ހުރިއިރު ވެސް އެއްވެސް ކަމެއް ނުކޮށް އޮތީ."