ޑރ. މުއިއްޒު، ރައީސް ޔާމީން އާއި މަޝްވަރާ ކުރުމަށް މަސައްކަތް ފަށައިފި ކަމަށް ޑރ. މުއިއްޒުގެ ވަރަށް އަރިސް ފަރާތަކުން ދިޔަވަރު ނޫހަށް ކަށަވަރު ކޮށްދީފިއެވެ. މި ގޮތުން މުއިއްޒު ރައީސް ޔާމީން އާއި މަޝްވަރާ ކުރުމަށް ޓަކައި، ކުރީގެ ރައީސް އޮފީހުގެ ޗީފް އޮފް ސްޓަރފް މުސްތަފާ އަށް ގުޅުވައި މެދުވެރިއެއްގެ ރޯލް އަދާ ކޮށް ދިނުމަށް ވަނީ އެދިފައެވެ.
ދިޔަވަރު ނޫހުން އިތުރަށް ރައީސް އޮފީހުގެ ތެރެއިން ސާފު ކުރި މައުލޫމާތަށް ބަލާއިރު، މުއިއްޒު، ރައީސް ޔާމީން އާއި މަޝްވަރާ ކުރުމަށް މި މަސައްކަތް ފެއްޓެވީ މައިގަނޑު ދެ ސަބަބަކަށްޓަކައެވެ.
ފުރަތަމަ ސަބަބަކީ އަބްދުއްރަހީމް އާއި އަހްމަދު ނާޒިމްގެ ކޯޅުމެވެ. ބާރުތައް އެއްކޮށް، 2028 ގެ ރިޔާސީ އިންތިހާބަށް ދެފަރާތުން ކުރަމުންދާ ސިޔާސީ މަސައްކަތްތަކުގެ މެދުގައި، ޑރ. މުއިއްޒު ތާށިވެ، ސިޔާސީ ގޮތުން މަޑު މަޑުން ދަނީ އެކަހެރި ވަމުންނެވެ. އަމިއްލައަށް ވެރިކަމުގައި ހުރެ، އިތުބާރު ކުރަންވީ މީހެއް ނޭނގި ދިމާވެފައިވާ މި ހާލަތުގައި މުއިއްޒު ހުންނެވީ ވަރަށް އެކަނިވެރި ކޮށް ކަމުގައި މުއިއްޒުގެ ހާލަތު ކައިރިން ދަންނަ ފަރާތްތަކުން ދިޔަވަރު ނޫހަށް މައުލޫމާތު ދީފައި ވެއެވެ. ކަން މިހެން ހުރި އިރު، ވެރިކަން ދެމެހެއްޓުމަށް ހުރި ގޮންޖެހުންތައް ނުހަނު ގިނައެވެ. ބާރުތައް ބެލޭންސް ކުރުމަށްޓަކައި، ރައީސް ޔާމީނު ވެރިކަމުގެ ތެރެއަށް ގެނައުން މުއިއްޒަށް ވަނީ މަޖުބޫރު ވެފައެވެ. އެހެން ކަމުން، އަބްދުއްރަހީމް އާއި، އަހްމަދު ނާޒިމްގެ ބާރު ކުޑަ ކުރުމަށް ރައީސް ޔާމީންގެ ދައުރެއް ވެރިކަން ކުރުމަށް ގެނައުމަކީ ޑރ. މުއިއްޒު ރައީސް ޔާމީން އާއި މަޝްވަރާ ކުރުމަށް މަސައްކަތް ކުރަމުންދާ މައިގަނޑު ސަބަބު ކަމަށް ބެލެވެއެވެ.
ވެރިކަން ފެށިގެން އައި އިރު، ސަރުކާރުގެ އިސް މިނިސްޓަރުންތަކެއް ވަނީ، ރައީސް ޔާމީނުގެ ވިސްނުމާއި ޚިޔާލު ވެރިކަމުގެ ބައެއް މުހިންމު ކަންކަމުގައި ހޯދުމަށް މަޝްވަރާ ކުރުމަށް ރައީސް ޔާމީނާއި ގުޅުއްވުމަށް މުއިއްޒުގެ އަރިހުން އެދިވަޑައިގެންފައެވެ. ނަމަވެސް މިކަމުގައި މުއިއްޒުގެ ފަރާތުން އެއްބާރުލުން ލިބިފައި ނުވާ ކަމަށް އެކަމަށް މަސައްކަތް ކުރެއްވި މިނިސްޓަރެއްގެ ފަރާތުން ދިޔަވަރު ނޫހަށް މައުލޫމާތު ލިބިފައިވެއެވެ.
ދެން އޮތް ގޮތަކީ މުއިއްޒު ރައީސް ޔާމީނާއި ސުލްހަ ވުމަށް، ޗައިނާއިން ބާރު އަޅަމުން ދާތީ އެކަން ކުރާކަން ދެއްކުމަށްޓަކައި ފެށި މަސައްކަތަކަށް ވުމެވެ. ޗައިނާ އާއި މުއިއްޒު އާއި ދެމެދު އޮތް ގުޅުންތައް، ނާއިބް ރައީސް ސެމްބެ ޗައިނާއަށް ކުރަން އޮތް ދަތުރުފުޅު މުއިއްޒު އަޑީގައި ހުންނަވައިގެން ކެންސަލް ކުރި މައްސަލާގައި ވަނީ ގޯސް ވެފައެވެ. މިކަން ހިނގާފައިވަނީ ދާދި ފަހަކުންނެވެ. ނާއިބް ރައީސް ސެމްބެ އާލާސްކަންފުޅާ އުޅުއްވާ ކަމަށް ބުނެ ޗައިނާ އެމްބަސީއަށް މުއިއްޒު ދޮގު ހަދައިގެން އުޅެނިކޮށް، އެކަން ފަޅާއަރައި، ޗައިނާ އެމްބަސަޑަރ ނުރުހިގެން މުއިއްޒަށް ގުޅައި “ބަވާލި” ކަމަށް ސަރުކާރު ތެރެއިން މައުލޫމާތު ލިބެއެވެ. އެހެން ކަމުން، މި ހީނަރު ވެފައިވާ ގުޅުން ބަދަހި ކުރުމަށް ޗައިނާ އަށް މުއިއްޒު، ރައީސް ޔާމީން އާއި، މަޝްވަރާ ކުރާތަން ދެއްކުމަށް ކުރަމުންދާ މަސައްކަތަކަށް ވުމަކީވެސް އެކަށީގެންވާ ކަމެކެވެ. ހަމަ އެއާއި އެކު، ފާހަގަ ކޮށްލަން ޖެހޭ ކަމަކީ މި މަޝްވަރާތަކަށް މުއިއްޒު އެދިފައި މިވަނީ، ޗައިނާ އެމްބަސަޑަރ އާއި އެކު ރައީސް އޮފީހުގައި މި ފަހުން ބޭއްވި ބައްދަލުވުމަށް ފަހުއެވެ.
ރައީސް ޔާމީނުގެ މަގުބޫލުކަން އިތުރުވަމުންދާ ވަރަކަށް، ރައީސް މުއިއްޒުގެ މަގުބޫލުކަން ދުވަހަކަށް ފަހު ދުވަހަކު ދަނީ ފަނޑުވަމުންނެވެ. ސަރުކާރުގެ ވައުދުތައް ނުފުއްދައި ދޮގު ހެދުމާއި، ކަރަންޓު ބިލް ބޮޑުވުމުން ފެށިގެން، މުއިއްޒު ހުއްޓުވާފައިވާ ފްލެޓާއި ގޯތި ތަކުގެ ސަބަބުން އާންމުންގެ ނުރުހުމާއި، ނަފްރަތުވެސް މުއިއްޒަށް ދަނީ އިންތިހާއަށް ލިބެމުންނެވެ. މިކަަންކަމުގެ ސަބަބުން މުއިއްޒު ވެފައިވަނީ، ރާއްޖޭގައި މިހާތަނަށް އެންމެ އަވަހަށް މަގުބޫލުކަން ގެއްލިގެން ދިޔަ ރައީސް އަށެވެ. ވަޒީފާގެ ދަހިވެތިކަމުގައި މުއިއްޒު ތައްޕާހުން އުޅޭ 4000 މީހުން ފިޔަވައި، ޕާޓީގެ އެންމެންގެ ތާޢީދުވެސް އޮތީ މިހާރު ރައީސް ޔާމީނަށެވެ.