ރާއްޖޭގައި ތަރިކައާއި ސަގާފަތުގެ ދާއިރާ ކުރިއެރުވުމަށް އާސާރީ ތަކެތި ދިރާސާކުރުމަށް އާކިއޮލޮޖިސްޓުންނާއި އިންސާނީ ޢިލްމުތައް ދަންނަ އެންތްރޮޕޮލޮޖިސްޓުން ބިނާކުރަންޖެހޭކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.
ވަޒީރު މިހެން ވިދާޅުވީ ސަރުކާރަށް 1 އަހަރު ފުރުމާ ގުޅިގެން ޕީއެސްއެމް ނިއުސްއިން ގެނެސްދޭ "ހަފްތާ 52" ޕްރޮގުރާމްގައި ވާހަކަފުޅުދައްކަވަމުންނެވެ.
"ހަފްތާ 52" ޕްރޮގުރާމްގައި ވާހަކަފުޅުދައްކަވަމުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވީ މިހާތަނަށް އައިރުވެސް ދިވެހި ތަރިކައާއި ސަގާފަތް ރާއްކާތެރިކޮށް އަންނަން އޮތް ޖީލުތަކަށް ފޯރުކޮށްދިނުމުގެ މަސައްކަތަކީ ދުނިޔޭގެ އެކި ހިސާބުތަކުގައި ވަކި ދާއިރާއެއްގެ ގޮތުގައި ކުރާ ކަންކަން ކަމަށެވެ. އަދި މިގޮތަށް ރާއްޖޭގައި ތަރިކައާއި ސަގާފަތުގެ ދާއިރާއެއް އުފެދިފައިނުވާކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ ތަރިކައާއި ސަގާފަތުގެ ދާއިރާ ކުރިއެރުވުމަށް ފުރަތަމަ ކުރަންޖެހޭ ކަމަކީ މި ދާއިރާއިން މީހުން ތަމްރީންކުރުން ކަމަށެވެ. އެގޮތުން ތަރިކައިގެ ޒަރިއްޔާއިން ތާރީޚުގެ ޢިލްމު ދެނެގަންނަ އާކިޔޮލޮޖިސްޓުންނާއި އިންސާނީ ޢިލްމުތައް ދިރާސާކުރާ އެންތްރޮޕޮލޮޖިސްޓުން ރާއްޖޭގައި މަދުކަން ފާހަގަކުރައްވަމުން ވަޒީރު ވިދާޅުވީ މި ދާއިރާތަކުން މީހުން ބިނާކުރަންޖެހޭ ކަމަށެވެ.
ވަޒީރު ވިދާޅުވީ ވިސްނުމަކީ ބޭރުގެ ތަޖުރިބާކާރުން ރާއްޖެ ގެނެސްގެން ސަގާފަތާއި ތަރިކައިގެ ދާއިރާއިން މީހުން ތަމްރީންކުރުން ކަމަށެވެ. އެގޮތުން ތަޖުރިބާކާރުން ގެނައުމަށް މިޞްރާއެކު މިހާރު ވާހަކަދެކެވިފައިވާކަން ވަޒީރު ފާހަގަކުރެއްވިއެވެ.
"ދާރުލްއާސާރު ބެެލެހެއްޓުމަށް ބޭނުންވާ ޢިލްމީ މީހުން ރާއްޖެއަކު ނެތް. މި ދާއިރާއިން ތަމްރީންވެފައިވާ ޢިލްމީ މީހުން މަދުވުމުގެ ސަބަބުން ދާއިރާގެ މުހިންމުކަން މީހުންނަށް ވިސްނިފައިނެތީ. މި ދާއިރާއަށް އެހައި ބޮޑު އަހަންމިއްޔަތުކަމެއް ދެވިފައިނުވަނީ. ފާއިތުވި އަހަރުތަކުގައި ތާރީޚާއި ޖޯގްރަފީ އަދި އެކި ފަންނުތައް ދަރިވަރުންނަށް ކިޔަވާ ދެވިފަކާއެއް ނެތް." ވަޒީރު ވިދާޅުވިއެވެ.
ވަޒީރު ވިދާޅުވީ ރާއްޖޭގައި 400 އަށްވުރެ ގިނަ މާއްދީ ތަރިކަ ރިކޯޑުކުރެވިފައިވާ ކަމަށެވެ. އަދި މާއްދީ ތަރިކަ ބޭނުންކޮށްގެން ތަރިކައިގެ ފަތުރުވެރިކަމެއް ކުރުމަކީ ރައީސް ޑރ. މުޙައްމަދު މުޢިއްޒުގެ މުހިންމު ސިޔާސަތެއް ކަމަށާއި އެކަންކުރުމަށްވެސް މިހާރު މަސައްކަތްކުރަމުންދާކަމަށް ވަޒީރު ވިދާޅުވިއެވެ. އަދި ބޭރު ޤައުމުތަކުގައި ތަރިކައިގެ ފަތުރުވެރިކަންކުރާއިރު ޓެކްނޮލޮޖީގެ ވަޞީލަތްތައް ބޭނުންކޮށްގެން މީހުން ޝައުޤުވެރިވާފަދަ ތަރިކައާގުޅުންހުރި ޑިޖިޓަލް ވީޑިޔޯތައް ދައްކާ ކަމަށާއި އެކަމަށް ބޭނުންވާ ވަޞީލަތްތައް ހޯދުމުގެ މަސައްކަތް ކުރަމުންދާކަމަށްވެސް ވަޒީރު ވިދާޅުވިއެވެ.
ތަރިކަ ރައްކާތެރިކޮށް ބަލަހައްޓައި ދިވެހި ސަގާފަތް އަންނަން އޮތް ޖީލުތަކަށް ފޯރުކޮށްދިނުމަށް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން ދަނީ ގިނަ މަސައްކަތްތަކެއްކުރަމުންނެވެ. އެގޮތުން ތަރިކަ ދިރާސާކުރާ ޤައުމީ މަރުކަޒުގެ ވިލަރެސްވެރިން ދިވެހި ތާރީޚާއި ތަރިކައާ ގުޅުންހުރި ދާއިރާތަކުން ދިރާސާތައް ހަދަމުންދާއިރު، ރާއްޖޭގެ މާއްދީ ތަރިކަތަކުގެ ތެރޭގައި ހިމެނޭ ހިރިގަލު މިސްކިތްތައް ދުނިޔޭގެ ތަރިކައިގެ ލިސްޓުތަކުގައި ހިމެނުމަށް ދަނީ މަސައްކަތްކުރަމުންނެވެ.