ހުޅުމާލޭގެ ދެވަނަ ފިޔަވަހީގައި ހުންނަ ހިޔާ ޓަވަރެއްގައި މީހަކު ރަހީނުކޮށްގެން ގެންގުޅުނު މައްސަލައެއް ފެންމަތިވެއްޖެއެވެ.
ފުލުހުން މީޑިއާތަކަށް މިރޭ ފޮނުވި މެސެޖެއްގައި ބުނިގޮތުގައި، މީހަކު ރަހީނުކޮށްގެން ގެންގުޅެފައިވަނީ  ހުޅުމާލޭ ދެވަނަ ފިޔަވަހީގެ ހިޔާގެ ނުވަވަނަ ޓަވަރުގައި ހުންނަ ފުލެޓެއްގެ ތެރޭގައެވެ.
ކޯޓު އަމުރެއްގެ ދަށުން، އެ އެޕާޓްމަންޓުގެ ދޮރު ވައްޓާލައިގެން ފުލުހުން ވަން އިރު، ރަހީނު ކުރުމުގައި ބައިވެރިވި 12 މީހުން ވަނީ، ރަހީނު ކޮށްގެން ގެންގުޅުނު މީހާގެ ބޯ ބާލާފައި ކަމަށް މައުލޫމާތު ލިބެއެވެ.
އަދި އޭރު އެމީހުން މަސައްކަތްކުރަމުންދިޔައީ ރަހީނު ކޮށްފައި ހުރި މީހާގެ އިނގިލިތައް ބުރިކޮށްލުމަށެވެ.
މި ހާދިސާ ހިނގީ، ޑްރަގް ކެފޭއެއްގެ ގޮތުގައި ބޭނުން ކުރަމުންދިޔަ އެޕާޓްމަންޓެއްގައިކަން އެނގިފައިވެއެވެ.