މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ޔުނައިޓެޑް އެރެބް އެމިރޭޓްސް (ޔޫެއޭއީ)ގެ ވައިގެ ސަރަހައްދު ބަންދުކުރުމުގެ ސަބަބުން އެ ގައުމުގައި ތާށިވެފައިތިބި ފަސިންޖަރުންގެ ހުރުމުގެ ޚަރަދު ސަރުކާރުން ދޭނެކަން އަބޫދާބީގެ ޑިޕާޓްމަންޓް އޮފް ކަލްޗާ އެންޑް ޓޫރިޒަމް (ޑީސީޓީ) އިން ކަށަވަރުކޮށްދީފިއެވެ. ޑީސީޓީ އަބޫދާބީން ނެރުނު ސާކިއުލާއެއްގައި ވަނީ މިހާރުގެ ހާލަތަށް ބަލާއިރު އަދި ބައެއް ގެސްޓުން ޗެކްއައުޓް ވާން ޖެހިފައިއޮތް ނަމަވެސް ދަތުރު ނުކުރެވޭތީ، އެ މީހުން ފުރުމުގެ ކަންތައްތައް ހަމަޖެހެންދެން ހޮޓަލްތަކުގައި ތިބެވޭނެ ގޮތް ހަމަޖައްސައިދިނުމަށް ހޮޓެލްތަކަށް އަންގާފައެވެ. “އެކްސްޓެންޑް ސްޓޭގެ ހަރަދު ޑީސީޓީ އަބޫދާބީން ކަވަރު ކުރާނެ." ޑީސީޓީއާ ހަވާލާދީ ދަ ނޭޝަން ނޫހުން ބުނެފައިވެއެވެ. ޔޫއޭއީގެ އެއާޕޯޓް ބަންދުކުރުމާއި ވައިގެ ސަރަހައްދު ބަންދުވުމުން ހޮނިހިރު ދުވަހު ކެންސަލްވި ފްލައިޓްތަކުގެ ފަސިންޖަރުންގެ ކެއުމާއި ހުރުމުގެ ހަރަދު ޖެނެރަލް ސިވިލް އޭވިއޭޝަން އޮތޯރިޓީ (ޖީސީއޭއޭ) އިން ވަނީ ދީފައެވެ. އަދި ފްލައިޓް ރީޝެޑިއުލިންގެ އަސަރު ކުރި ގާތްގަނޑަކަށް 20،200 ފަސިންޖަރުން އެއާޕޯޓްތަކާއި ތިބިކަމަށާއި، ފާސްކޮށްފައިވާ އޮޕަރޭޝަނަލް ޕްލޭންތަކާ އެއްގޮތަށް ރީބުކިންގެ މަސައްކަތްތަކުގެ އިތުރުން ކެއުމާއި ބުއިމާއި ވަގުތީ ގޮތުން ހުރުމުގެ އިންތިޒާމްވެސް ޖީސީއޭއޭ އިން ހަމަޖައްސާފައިވާ ކަމަށް އެ އޮތޯރިޓީން ބުނެއެވެ. ޔޫއޭއީއާއި ސަރަހައްދުގެ އިތުރު އެއާޕޯޓްތައް ހޮނިހިރު ދުވަހުގެ މެންދުރު ބަންދުކޮށްފައި ވަނީ އެމެރިކާއާއި އިސްރާއީލުން އީރާނަށް ދޭ ހަމަލާތަކުގެ ރައްދުގައި އީރާނުން މެދުއިމަތީގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދޭން ފެށުމުންނެވެ. އިސްރާއީލާއި އެމެރިކާއިން އީރާނަށް ހޮނިހިރު ދުވަހު ދޭން ފެށި ހަމަލާތަކުގެ ރައްދުގައި އީރާނުން އަންނަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދެމުންނެވެ. އެގޮތުން ގަތަރު، ބަހްރެއިން، ކުވޭތު އަދި ޔޫއޭއީގައި ހުންނަ އެމެރިކާގެ އަސްކަރީ މަރުކަޒުތަކަށް އީރާނުން އަންނަނީ ހަމަލާތައް ދެމުންނެވެ.