ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެމްބަރު އަބްދުﷲ ޖާބިރު، މީގެ 15 އަހަރު ކުރިން ބައްލަވައިގެންނެވި މ. އަތަމާ ޕްލާޒާއަކީ އޭނާއަށް މިލުކުވެރިކަން އޮތް ތަނެއް ކަމަށް ކަނޑައަޅައި ކުރިއަށް އޮތް ދެ މަސްދުވަސް ތެރޭ އެ ގެ ޖާބިރުގެ ނަން މައްޗަށް ބަދަލުކޮށްދިނުމަށް އެ ގޭގެ ވެރިފަރާތަށް ސިވިލް ކޯޓުން އިއްޔެ އަންގައިފި އެވެ. 
ވީ ކިހިނެއް؟ - 10 ބުރިއަށް އިމާރާތްކޮށްފައިވާ އަތަމާ ޕްލާޒާ ހުންނަނީ 770 އަކަފޫޓުގެ ބިމެއްގަ އެވެ. މި ގެއަކީ، މަލީޝާ ހައްޖު ގްރޫޕުގެ ވެރިޔާ އިސްމާއީލް އަބްދުއްލަތީފްގެ ނަންމަތީގައި ރަޖިސްޓްރީކޮށްފައިވާ ގެ އެކެވެ.
އިސްމާއިލް އަބްދުއްލަތީފާ އެކު ހެދި ގަނެވިއްކުމުގެ އެއްބަސްވުމެއްގެ ދަށުން އެ ގެ ޖާބިރު ބައްލަވައިގަތީ 28 އޮކްޓޫބަރު 2010ގަ އެވެ. ނަމަވެސް، އެ ގޭގެ ރަޖިސްޓްރީ އޭނާގެ ނަން މައްޗަށް ބަދަލުނުކޮށް އޮއްވައި ސިވިލް ކޯޓުން 2021 ވަނަ އަހަރުގެ ތެރޭގައި އެ ގެ ނީލަމަށް ލާފައިވެ އެވެ.
އެ ގެ ވިއްކާލަން ސިވިލް ކޯޓުން އޭރު އަމުރުކުރީ، އިސްމާއީލް އަބްދުއްލަތީފްގެ މައްޗަށް ސާބިތުވި ދަރަންޏެއް އަދާކުރެވޭނީ، އެ ގެ ވިއްކާލައިގެން ކަމަށް އޭނާގެ ފަރާތުން ކޯޓުގައި ބުނުމުންނެވެ. 
ނީލަމުގައި ވިއްކާލުމަށް ހުޅުވާލާފައި އޮތްއިރު އިސްމާއިލް އަބްދުއްލަތީފަށް އެތަނަށް ވަނުމުގެ ފުރުސަތު ޖާބިރު ނުދީގެން، ކޯޓު އަމުރެއްގެ ދަށުން، އެތަނުގެ ކޮންޓްރޯލް ފުލުހުން ލައްވައި ޖާބިރުގެ އަތުން ނަގަން ވެސް ނެގި އެވެ.
އަތަމާ ޕްލާޒާގެ މައްޗަށް ޖާބިރަށް އޮތް ހައްގު ކަނޑައަޅައިދިނުމަށް އެދި، މި މައްސަލަ ކޯޓަށް ޖާބިރު ހުށަހެޅުއްވީ 16 ސެޕްޓެމްބަރު 2021ގަ އެވެ. އެތަން ރަޖިސްޓްރީކޮށްނުދީ އޮތުމުގެ ސަބަބުން ލިބިފައިވާ ގެއްލުމުގެ ބަދަލުގެ ގޮތުގައި 16 މިލިއަން ރުފިޔާ ނަގައިދިނުމަށް ވެސް މި މައްސަލާގައި އެދިފައިވެ އެވެ.
ތަފްސީލް - މީގެ 15 އަހަރު ކުރިން، އަތަމާ ޕްލާޒާ ޖާބިރު ބައްލަވައިގަނެފައިވަނީ ޖުމްލަ 14 މިލިއަން ރުފިޔާ އަށެވެ. އެ ފައިިސާ ދައްކަން އެއްބަސްވެފައިވާ ގޮތަކީ:
އެއްބަސްވުމުގައި ސޮއިކުރާ ވަގުތު 2.5 މިލިއަން ދެއްކުމަށް
އަތަމާ ޕްލާޒާ ސްޓޭޓް ބޭންކް އޮފް އިންޑިއާއަށް ރަހުނުކޮށް އިސްމާއިލް އަބްދުއްލަތީފް ނަގާފައިވާ ލޯނުގެ ބާކީ އޮތް 4.8 މިލިއަން ޖާބިރު ދެއްކުމަށް
ބާކީ 6.6 މިލިއަން ރުފިޔާ ފަސް ބަޔަކަށް ބަހާލައިގެން ދެއްކުމަށް
އެއްބަސްވުމުގައި ސޮއިކުރާ ވަގުތުން ފެށިގެން އަތަމާ ޕްލާޒާ ޖާބިރާ ހަވާލުކުރަންޖެހޭނެ ކަމަށް އެެއްބަސްވުމުގައިވޭ
މި އެއްބަސްވުމުގެ ދަށުން، ގޭގެ މިލުކުވެރިކަން ޖާބިރަށް ބަދަލުކުރަން ސިވިލް ކޯޓަށް ހުށަހެޅުމަށް ފަހު، ފަހުން ވަނީ އަނބުރާ ގެންގޮސްފަ އެވެ. އިސްމާއިލް އަބްދުއްލަތީފް ބުނެފައިވާ ގޮތުގައި، ގޭގެ މިލުކުވެރިކަން ޖާބިރަށް ދޭން ހުށަހެޅި އެ މައްސަލަ އަނބުރާ ގެންގޮސް، ޖާބިރުގެ މައްޗަށް ގެ ރަޖިސްޓްރީކޮށްދިނުމުގެ ކަންކަން ފުރިހަމަނުކޮށް އޮތީ، އެ އެއްބަސްވުމާ ޖާބިރު ހިލާފުވެފައިވާތީ ކަމަށެވެ.
އެ ގެ ވިއްކުމުގެ އެއްބަސްވުމުގައި ޖާބިރު ދައްކާ ގޮތަށް އެއްބަސްވެފައިވާ ލޯނަކީ އަހަރު ދުވަސް ތެރޭ ބޭންކަށް ދައްކާ ނިންމަންޖެހޭ އެއްޗަކަށްވާއިރު، އެ މުއްދަތުގައި ލޯނު ދައްކާ ނިންމާފައިނުވާތީ ޖާބިރު އެއްބަސްވުމާ ހިލާފުވެފައިވާ ކަމަށް ކޯޓުގައި އިސްމާއިލް އަބްދުއްލަތީފް ބުންޏެވެ. އެއްބަސްވުމާ ހިލާފުވެފައިވާތީ އެ ދެމެދުގައި ވެފައިވާ އެއްބަސްވުމަކީ މިހާރު އުވިފައިވާ އެއްބަސްވުމެއްކަން އޭނާ ފާހަގަކުރި އެވެ. 
ކޯޓުން ނިންމިގޮތް - މި މައްސަލަ ބެއްލެވި ގާޒީ ޒުލައިހާ ޝީޒާ އިއްޔެ އިއްވި ހުކުމްގައި ވަނީ، ދެ މީހުން ބަދަލުކޮށްފައިވާ ގަނެވިއްކުމުގެ އެއްބަސްވުމުގައި އެ ލޯނު ދައްކާ ނިންމަން ވަކި މުއްދަތެއް ޖަހާފައިނުވާތީ، ބޭންކުން ދީފައިވާ މުއްދަތުގައި ލޯނު ނުދެއްކުމަކުން ޖާބިރު އެއްބަސްވުމާ ހިލާފުވެފައިވާ ކަމަށް ބެލެވެން ނެތް ކަމަށެވެ. އަދި އެ އެއްބަސްވުން އުވާލުމާ ގުޅޭ އެއްވެސް މައްސަލައެއް ކޯޓަށް ވެސް ހުށަހަޅާފައިނުވާތީ، އެ އެއްބަސްވުމަކީ ދެމިއޮތް އެބަސްވުމެެއް ކަމަށް އެ ހުކުމްގައިވެ އެވެ.
ޖާބިރާއި އިސްމާއިލް އަބްދުއްލަތީފާ ދެމެދު ހިންގާފައިވާ ގަނެވިއްކުމުގެ އެއްބަސްވުމުގެ ދަށުން، އެތަން ގަތުމަށް ޖާބިރުގެ ފަރާތުން ކުރަންޖެހޭ ހުރިހާ ކަމެއް ކޮށްނިމިފައިވާތީ، އެ ގޭގެ މިލްކުވެރިކަން އޮތީ ޖާބިރުގެ ކިބައިގައި ކަމަށް ހުކުމްގައިވެ އެވެ. އެ އެއްބަސްވުމުގެ ދަށުން ފުރިހަމަނުވެ އޮތް ހަމައެކަނި ކަމަކީ ޖާބިރަށް އެ ގެ ރަޖިސްޓްރީކޮށްދިނުމަށް އިސްމާއިލް އަބްދުއްލަތީފް ފުރިހަމަކުރަންޖެހޭ ޝަރުއީ އިޖުރާއަތު އެކަނިކަން ހުށަހަޅާފައިވާ ލިޔެކިއުންތަކުން އެނގޭ ކަމަށް ވެސް ހުކުމްގައިވެ އެވެ.
އެހެންވެ، ސިވިލް ކޯޓުން އިއްޔެ ކުރި ހުކުމްގައި ވަނީ:
އަތަމާ ޕްލާޒާގެ ބިމާއި އެ ބިމުގައި 10 ބުރިއަށް ހަދާފައިވާ އިމާރާތާއި އެ އިމާރާތުގައި ހަރުކޮށްފައިވާ ތަކެތީގެ މިލުކުވެރިކަން ނަގަލުކުރުމަށް ޖާބިރަށް އޮތް ހައްގުގެ މައްޗަށް އެހެން އެއްވެސް ހައްގެއް އިސްކުރެވޭނެ ކަމަށް
އަތަމާ ޕްލާޒާ ޖާބިރަށް ބަދަލުކުުރުމުގެ ޝަރުއީ އިޖުރާއަތު ކުރިއަށް އޮތް ދެ މަސްދުވަހުގެ ތެރޭގައި ކޮށް ނިންމުމަށް އިސްމާއިލް އަބްދުއްލަތީފަށް އެންގި
އެކަމަކު ގެއްލުމުގެ ބަދަލުގެ ގޮތުގައި ނަގައިދޭން އެދުނު 16 މިލިއަން ނަގައިދެވެން ނެތް ކަމަށް ނިންމި