ރައީސުލްޖުމްހޫރިއްޔާގެ ނައިބު ހުސެއިން މުހައްމަދު ލަތީފް، ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ކޮންގްރެސް ޕާޓީގެ ހދ. އަތޮޅުގެ މާލެ ކެމްޕެއިން ޖަގަހަ ހުޅުއްވައިދެއްވައިފިއެވެ.
މި ޖަލްސާގައި ނައިބު ރައީސްގެ އަރިހުގައި، ކޮންގްރެސް ޕާޓީގެ ފަރާތުން މާލެ ސިޓީގެ މޭޔަރުކަމަށް ވާދަކުރައްވާ މޫސާ އަލީ ޖަލީލްއާއި، މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާކަމަށް ވާދަކުރައްވާ އާޝިޔަތު އަލައިކާ އަދުނާން ބައިވެރިވެވަޑައިގެންނެވިއެވެ. އަދި ޕީއެންސީގެ ލީޑަޝިޕްގެ ބޭފުޅުންނާއި ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް ހދ. އަތޮޅުން ވާދަކުރާ ޕީއެންސީގެ ކެންޑިޑޭޓުންވެސް ބައިވެރިވެވަޑައިގެންނެވިއެވެ.
މީގެ އިތުރުން ޕީއެންސީގެ ގިނަ އަދަދެއްގެ ސަޕޯޓަރުންވެސް މި ޖަލްސާގައި ބައިވެރިވިއެވެ.
ކުރިއަށް އޮތް ލޯކަލް ކައުންސިލް އިންތިހާބާއި ދިމާކޮށް ރާއްޖޭގެ ސިޓީތަކުގެ ޖަގަހަތައް މާލޭގައި ހުޅުވުމުގެ މަސައްކަތް ޕީއެންސީން އަންނަނީ ކުރަމުންނެވެ. އެގޮތުން ތިނަދޫ ސިޓީއާއި، ކުޅުދުއްފުށި ސީޓީ އަދި އައްޑޫ ސިޓީގެ މާލެ ކެމްޕެއިން ޖަގަހަ މިހާތަނަށް ވަނީ ހުޅުވާފައެވެ. މިއީ މިފަދަ އިންތިހާބަކާއި ދިމާކޮށް ސިޓީތަކާއި އަތޮޅުތަކުގެ ކެމްޕެއިން ޖަގަހަ މާލޭގައި ވެސް ހުޅުވާ ފުރަތަމަ ފަހަރެވެ.
ޕީއެންސީން އަންނަނީ ކުރިއަށް އޮތް އިންތިހާބަށް ރައްޔިތުންގެ ތާއީދު ހޯދުމަށްޓަކައި ދޮރުން ދޮރަށް ހަރަކާތްތައް ވެސް ހިންގަމުންނެވެ. އެގޮތުން މި ހަރަކާތްތަކުގައި ޕާޓީގެ ލީޑަރު އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ބައިވެރިވެވަޑައިގަންނަވައެވެ.