މި އަހަރުގެ ފިޠުރް ވާނީ ފަލަކީ ހިސާބުން ދައްކާގޮތުން ހުކުރު ދުވަހަަށް ކަމަށް ފަލަކީ އިލްމުވެރިޔާ އަދި ދިވެހިރާއްޖޭގެ ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްްޔޫމް ވިދާޅުވެއްޖެއެވެ.
ޓްވިޓާގައި އީދު ވަނީ ކޮން އިރަކުތޯ އެމަނިކުފާނު ގާތުން ސުވާލު ކުރެއްވުމުން އެ ސުވާލަށް ޖަވާބުދެއްވަމުން މައުމޫން ވިދާޅުވީ، ފަލަކީ ހިސާބުން ދައްކާގޮތުގައި ޢީދު ވާނީ ހުކުރު ދުވަހަށް ކަމަށެެވެ.
އަންނަ ބުރާސްފަތި ދުވަހު އަރަބި އަދި އިސްލާމީ ދުނިޔޭގެ އެއްވެސް ތަނަކަށް ހަމަލޮލަށް ހަނދު ފެނުމަކީ ނާދިރު ކަމެއް ކަމަށް ރިޕޯޓްތައް ބުނެފައިވެއެވެ. އަދި ލީބިޔާއިން ފެށިގެން ހުޅަނގު އެފްރިކާގެ ބައެއް ސަރަހައްދުތައް ފިޔަވައި އަރަބި ގިނަ ގައުމުތަކަށް ޓެލެސްކޯޕަކުން ބަލައިގެންވެސް ހަނދު ނުފެންނާނެ ކަމަށާ އެހެންކަމުން ހޮނިހިރު ދުވަހަކީ ފިތުރު ޢީދު ދުވަހަށް ވުން އެކަށީގެންވާ ކަމަށް އިންޓަރނޭޝަނަލް އޮސްޓްރޮނޮމިކަލް ސެންޓަރުން ބުނެފައިވެއެވެ.
މި އަހަރު ޝަޢުބާން މަހުގައި 30 ދުވަސް ފުރިހަމަވެ ރަމަޟާން މަހަށް ހަނދު ފެނިފައި ނުވާއިރު، ޝައްވާލުމަހަށް ހަނދު ފެނުމަކީ އެކަށީގެންވާ ކަމެއްކަމަށް ގިނަބަޔަކު ޤަބޫލު ކުރެއެވެ.