މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން، ދުނިޔޭގެ ހަކަތައިގެ ސަޕްލައި ރައްކާތެރިކުރުމަށްޓަކައި، ބޭނުންވެއްޖެ ހާލަތެއްގައި ހޯރްމުޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށް އެމެރިކާގެ ނޭވީން ހިމާޔަތްދީ، އެ އުޅަނދުތަކާ އެކު ދަތުރުކުރަން ފަށާފާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިއްޔެ ވިދާޅުވެއްޖެ އެވެ.
މީގެ އިތުރުން، ގަލްފުގެ ސަރަހައްދުގައި ކުރާ ކަނޑުގެ ވިޔަފާރިތަކަށް ސިޔާސީ ހީނަރުކަމުން ކުރިމަތިވެދާނެ ނުރައްކާތަކުން ސަލާމަތްވުމަށް ބޭނުންވާ އިންޝުއަރެންސާއި މާލީ ކަށަވަރުކަން ފޯރުކޮށްދިނުމަށް ޔޫއެސް އިންޓަނޭޝަނަލް ޑިވެލޮޕްމަންޓް ފައިނޭންސް ކޯޕަރޭޝަނަށް އަމުރުކުރައްވާފައިވާ ކަމަށް ވެސް ޓްރަމްޕް ވިދާޅުވި އެވެ.
"ކޮންމެ ފަދަ ހާލަތެއް މެދުވެރިވި ނަމަވެސް، ދުނިޔެއަށް ބޭނުންވާ ހަކަތައިގެ ސަޕްލައި މެދުނުކެނޑި ލިބޭނެކަން އެމެރިކާއިން ކަށަވަރުކުރާނެ،" ސޯޝަލް މީޑިއާގައި ކުރެއްވި ޕޯސްޓެއްގައި އޭނާ ވިދާޅުވި އެވެ.
މި ނިންމުން އިއުލާނުކޮށްފައިވަނީ އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން، ރައްދުގައި ދޭން ފެށި ހަމަލާތަކުގެ ސަބަބުން ހޯރްމުޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކަށް ހުރަސްތަކެއް ކުރިމަތިވެފައިވާ ދަނޑިވަޅެއްގަ އެވެ. ދުނިޔޭގެ ތެޔޮ ސަޕްލައިގެ ފަސްބައިކުޅަ އެއްބައި ދަތުރުކުރަނީ މި ކަނޑުއޮޅި މެދުވެރިކޮށެވެ.
މި ހަމަނުޖެހުންތަކުގެ ސަބަބުން ހަނގުރާމައިގެ ނުރައްކަލަށް ދޭ އިންޝުއަރެންސް ޕްރީމިއަމްތައް ވަރަށް ބޮޑަށް އުފުލި، ބައެއް ކުންފުނިތަކުން އިންޝުއަރެންސް ދިނުން ހުއްޓާލާ އަދި ބައެއް އުޅަނދުފަހަރުގެ ދަތުރުތައް ވަނީ މަޑުޖައްސާލާފަ އެވެ.
ހަމަނުޖެހުންތައް ފެށުނީއްސުރެ ތެލުގެ އަގު ވަނީ ވަރަށް ބޮޑަށް އުފުލިފަ އެވެ.
ކުރިއަށް އޮތް ކުރު މުއްދަތެއްގައި އެމެރިކާގެ ރައްޔިތުންނަށް ތެލުގެ އަގު ބޮޑުވުމުގެ ތަކުލީފު އުފުލަން ޖެހިދާނެ ކަމަށް ޓްރަމްޕް ގަބޫލުކުރެއްވި އެވެ. ނަމަވެސް، މި ހަމަނުޖެހުންތައް ނިމުމާ އެކު ތެލުގެ އަގު ކުރިން ހުރި މިންވަރަށް ވުރެ ވެސް ބޮޑަށް ތިރިވާނެ ކަމަށް އޭނާ ވިދާޅުވި އެވެ.