ދިވެހި ފުލުހުންގެ ޚިދުމަތުން މިހާރު ކުރިއަށްގެންދާ ގެދޮރުވެރިޔާ އަދި ބިންވެރިޔާ ސްކީމާ ގުޅޭ މައްސަލައިގެ ތަހުގީގަށް ބޭނުންވާ މަޢުލޫމާތު ހިއްސާކުރުމަށް ފުލުހުން އެދެފި އެވެ.
ފުލުހުންގެ ފަރާތުން މިއަދު ނެރުނު ބަޔާނެއްގައި ބުނެފައިވަނީ، މި މައްސަލައިގެ ތަހުގީގަށް ބޭނުންކުރެވިދާނެ ކަމަށް ބެލެވޭ އެއްވެސް މަޢުލޫމާތެއް ނުވަތަ ހެކީގެ ގޮތުގައި ބޭނުންކުރެވިދާނެ އެއްވެސް ލިޔުމެއް އޮތްނަމަ، https://evidence.police.gov.mv އަށް ވަދެ އެ މަޢުލޫމާތު ހިއްސާކުރުމަށެވެ.
ފުލުހުން ވަނީ މަޢުލޫމާތު ހިއްސާކުރާ ފަރާތްތަކުގެ ސިއްރުކަން ހިފަހައްޓާނެ ކަމުގެ ޔަގީންކަން ދީފައެވެ. އަދި މަޢުލޫމާތު ހިއްސާކުރާއިރު އަމިއްލަ މަޢުލޫމާތު ހާމަނުކޮށްވެސް ހުށަހެޅިދާނެ ކަމަށާއި، ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތެއްގައި ގުޅޭނެ މަޢުލޫމާތާއެކުވެސް ހިއްސާކުރެވިދާނެ ކަމަށް ބުނެފައިވެއެވެ.
މި މައްސަލައަކީ ފާއިތުވި ދުވަސްތަކުގައި ރާއްޖޭގައި ވަރަށް ބޮޑަށް ސަމާލުކަން ލިބިފައިވާ މައްސަލައެކެވެ. ގެދޮރުވެރިޔާ އަދި ބިންވެރިޔާ ސްކީމްގެ ދަށުން ގޯތި ދޫކުރުމުގައި ކޮރަޕްޝަނަށް މަގުފަހިވާ ގޮތަށް ޢަމަލުކޮށްފައިވާ ކަމަށް ތުހުމަތުކުރެވޭތީ، ފުލުހުން ވަނީ މި މައްސަލަ ތަހުގީގުކުރަން ފަށާފައެވެ.
ފުލުހުންގެ މި އިޢުލާނާ ގުޅިގެން، މި މައްސަލައާ ގުޅޭ އިތުރު މަޢުލޫމާތު ލިބި، ތަހުގީގު އިތުރަށް ހަރުދަނާވެގެންދާނެ ކަމަށް ބެލެވެއެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi