ރާއްޖޭގެ ހުރިހާ ރައްޔިތުންގެ ބޯހިޔާވަހިކަމަށް ހައްލު ހޯއްދަވާ ދެއްވާނެކަމަށް ވައުދުވި މުއިއްޒުގެ ވެރިކަމަށް 15 މަސް ވެގެންދިޔައިރު, އެވައުދުމަށް އެއްމެ ގާބުރިއެއްވެސް މިއަދާހަމައަށް މި ސަރުކާރުން ބާއްވާފައެއް ނެތެވެ.
ބޯހިޔާވަހި ކަމަކީ މުއިއްޒުގެ ސަރުކާރުގެ އެންމެ ބޮޑު ވައުދެވެ. އަދި ވެރިކަމަށް ވަޑައިގަތުމަށް މުއިއްޒު ވީ ވައުދުތަކުގެ ތެރޭގައި އެންމެ ގިނައިން ދެއްކެވި ވާހަކައަކީވެސް, ވެރިކަމުގެ 5 އަހަރުގެ ދައުރު ނިމިގެންދާއިރު, ބީހިޔާވަހިކަން ނުލިބޭ އެއްވެސް ދިވެހި ރައްޔިތަކު ނުހުންނާނެ ކަމުގެ ވައުދެވެ.
އެހެންނަމަވެސް މުއިއްޒުގެ ސަރުކާރަށް 15 މަސްދުވަސް ވެގެންދިޔައިރުވެސް, މުއިއްޒު ދައްކަވަމުން ގެންދެވި ބޯހިޔާވަހިކަމުގެ ވައުދު ފުއްދުމަށް, އެންގެ ހައުސިން ޔުނިޓެއްގެ ބިންގަލެއްވެސް, އަދި ގާބުރިއެއްވެސް މިހާތަނަށްވެސް ބާއްވާފައެއް ނުވެއެވެ. އެގޮތުން މި ސަރުކާރުގައި އަދިވެސް ކުރިޔަށް ދަނީ ނިމިދިޔަ އެމްޑީޕީގެ ސަރުކާރުގައި ފެށި ހައުސިން މަޝްރޫޢުތަކެވެ.
ހަމަ އެއާއެކު ފާހަގަވާން އޮތް ކަމަކީ, މުއިއްޒު ވެވަޑައިގެންނެވި ބޯހިޔާވަހިކަމުގެ ވައުދު ފުއްދުމަށް މިހާތަނަށް މިސަރުކާރުން އެއްވެސް މަސައްކަތެއް ކޮށްފައި ނުވާއިރު, އެމްޑީޕީގެ ސަރުކާރުން އަޅާދިން ފްލެޓްތައްވެސް މިއަދާއި ހަމައަށް އައިއިރުވެސް ނުދީ ހިފަހައްޓާފައި ވާކަމެވެވެ. އަދި ފެލެޓް ހައްގުވާ މީހުންގެ ލިސްޓަށް ބޮޑެތި ބަދަލުތައް ގެނެސް, މަޖިލިސް މެމްބަރުންނާއި ސާޖިދާ ކަނޑައަޅާ އެތައް ބަޔަކު 4,000 ފްލެޓް ލިސްޓުގައި ނުހައްގުން ހިމެނުމަށް މިސަރުކާރުން ދަނީ މަސައްކަތް ކުރަމުންނެވެ.
އެގޮތުން މުއިއްޒުގެ ފުރަތަމަ ހައުސިން މިނިސްޓަރ ހައިދަރު ހައުސިން މިނިސްޓަރުކަމުގެ ވަކިކޮށް ހަޔަރ އެޑިއުކޭޝަން މިނިސްޓްރީއަށް ބަދަލު ކުރިއިރުވެސް, އޭނާ ގެންދެވީ ފްލެޓް ލިސްޓު އާންމު ކުރުމަށް ދޮގު ވައުދުތައް ވަމުންނެވެ.
މިޙާރު ހާމަވެފައިވާ ގޮތުގައި, ކުރީގެ ސަރުކާރުގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި ފެށި ގެދޮރުވެރިޔާ މަޝްރޫޢުގެ ދަށުން ހުޅުމާލޭގައި އިމާރާތްކުރަމުންދާ 4،000 ސޯޝަލް ހައުސިންގ ޔުނިޓާ ގުޅޭގޮތުން ދިމާވެފައިވާ މައްސަލަތަކާ ގުޅިގެން، ކުރީގެ ހައުސިންގ، ލޭންޑް އެންޑް އާރބަން ޑިވެލޮޕްމަންޓް މިނިސްޓަރ އަލީ ޙައިދަރު އަޙްމަދަށް 32 ސިޓީ ފޮނުވި ކަމަށް ފަހި ޔޫނިއަން އެސޯސިއޭޝަނުން ވަނީ ބުނެފައެވެ. އަދި އޭނާއާ ބައްދަލުކުރުމަށް 53 ފަހަރު އެދުނު ނަމަވެސް، އެއްފަހަރަކުވެސް ބައްދަލު ކޮށްފައި ނުވާކަމަށްވެސް އެ އެސޯސިއޭޝަނުން ވަނީ ބުނެފައެވެ.
މިކަން ހާމަވެފައިވަނީ ޙައިދަރުގެ ބަދަލުގައި އައްޔަންކުރެވުނު އާ ހައުސިންގ މިނިސްޓަރު، ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ މިނިސްޓަރު ޑރ. ޢަބްދުﷲ މުއްޠަލިބާ ބައްދަލުކުރުމަށް އެދި އެސޯސިއޭޝަނުން ފޮނުވި ސިޓީއަކުންނެވެ.
ޔޫނިއަންގެ ސިޓީގައި ވަނީ މުއްޠަލިބަކީ ކުރިން ތިބި ފަރާތްތަކާ މުޅިން ތަފާތު ޝަޚްޞިއްޔަތެއްގެ ގޮތުގައި ދެކޭތީ، އޭނާއާއި ބައްދަލުކޮށް މަޝްވަރާކުރަން ބޭނުންވާ ކަމަށް ބުނެފައެވެ.
މީގެއިތުރުން 2025 ޖަނަވަރީ 6 ގައި ފޮނުވި މި ސިޓީގައި، މުއްޠަލިބްގެ މިނިސްޓަރުކަމުގެ ދަށުގައި މިނިސްޓްރީއަކީ ރައްޔިތުންގެ އަޑުއަހާ، އަމާންކަމާއި އެކުވެރިކަމާއެކު ރައްޔިތުންނާ ގާތުން ޚިދުމަތް ފޯރުކޮށްދޭ ތަނަކަށް ވާން އެދޭކަމަށްވެސް އެސިޓީގައި ބުނެފައި ވެއެވެ.
އެހެންނަމަވެސް އެ ސިޓީގެ ޖަވާބުގައި, “އެންމެ އަވަސް ފުރުޞަތެއްގައި” މިނިސްޓަރާ ބައްދަލުކުރުމަށް އެދި ފޮނުވި ސިޓީއަށް ޖަނަވަރީ 16 ގައި ޖަވާބުދެމުން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ބުނެފައިވަނީ “އެއްވެސް ފަރާތަކާ ބައްދަލުނުކުރުމަށް ނިންމާފައިވާ” ކަމަށް ބުނެފައި ވެއެވެ.
ސިޓީގައި މިކަމަށް ދީފައިވާ ސަބަބަކީ “ވެރިފިކޭޝަން ޕްރޮސެސްގެ އިންސާފުވެރިކަން ކަށަވަރުކުރުމަށާއި އެކަން ނުފޫޒުން އެއްކިބާވެފައިވާ ގޮތެއްގައި ބޭއްވުމަށްޓަކައި” ކަމަށެވެ.
ރައީސް މުއިއްޒު ފާހަގަ ވެފައިވަނީ ދޮގާއި މަކަރާއި ހީލަތުން ވެރިކަމަށް ވަޑައިގެންނެވި ބޭފުޅެއްގެ ގޮތުގައެވެ. އަދި ވެރިކަމަށް ވަޑައިގެންނެވުމަށްފަހުވެސް މުއިއްޒު ގެންދަވަނީ ވައުދު ފުއްދުމުގެ ނަމުގައި ބޮޑެތި ދޮގުތައް ހަދަމުންނެވެ.