ގދ. އަތޮޅުގައި އޮންނަ މާވަރުލު އެއަރޕޯޓަށް ރޭގަނޑު ދަތުރުތައް ފަށަން ރީޖަނަލް އެއަރޕޯޓްސްއިން ތައްޔާރުވެއްޖެއެވެ.
އެތެރޭގެ އުދުހުންތަކަށް ޚާއްސަކޮށް ތަރައްޤީކޮށްފައިވާ މާވަރުލު އެއަރޕޯޓު ތަރައްޤީކޮށް ހުޅުވާފައިވަނީ 2020ވަނަ އަހަރުގެ ތެރޭގައެވެ. އެހެންނަމަވެސް މިހާތަނަށް މާވަރުލަށް ފްލައިޓުތައް އޮޕަރޭޓުކުރަނީ ހަމައެކަނި ދުވާލުގެ ގަޑިތަކުގައެވެ.
ގދ. މާވަރުލު އެއަރޕޯޓަކީ ހުވަދުއަތޮޅުގައި އޮންނަ 5 އެއަރޕޯޓުގެ ތެރެއިން އެއަރޕޯޓެކެވެ. އަދި އެސަރަޙައްދުގައި މިވަގުތު އޮޕަރޭޓުކުރާ އެއަރޕޯޓުތަކުގެ ތެރެއިން ރޭގަނޑު ފްލައިޓު ނުޖެއްސޭ ހަމައެކަނި އެއަރޕޯޓުވެސްމެއެވެ. އެހެންކަމުން މާވަރުލު އެއަރޕޯޓުގައި ރޭގަނޑު ފްލައިޓު ޖެއްސޭނެ އިންތިޒާމު ހަމަޖެއްސުމަށް މިދިޔަ އަހަރުގެ ބަޖެޓުގައިވެސްވަނީ ހިމަނާފައެވެ.
ދައުލަތުގެ ބަޖެޓުން 13 މިލިޔަން ރުފިޔާ ޚަރަދުކޮށްގެން މާވަރުލު އެއަރޕޯޓަށް ރޭގަނޑު ފްލައިޓު ޖެއްސޭނެ އިންތިޒާމު ރީޖަނަލްސް އެއަރޕޯޓުންވަނީ މިހާރު ހަމަޖައްސަވާފައެވެ.
އެކުންފުނިން ވިދާޅުވީ، އަންނަ ބުދަ ދުވަހު ޓެސްޓު ފްލައިޓު ޖެއްސުމަށް މިހާރު މޯލްޑިވިއަންއާއެކު ތައްޔާރުވަމުންދާކަމަށެވެ. ޓެސްޓު ފްލައިޓު ޖެއްސުމަށް ސިވިލް އެވިއޭޝަން އޮތޯރިޓީން ހޯދަންޖެހޭ ހުއްދަތައް މިހާރު ހޯދާފައިވާކަން އެކުންފުނިން ފާހަގަކުރައްވައެވެ.
ޝެޑިއުލް ފްލައިޓުތައް ބޭއްވޭނެކަން ރާއްޖޭގައި އޮޕަރޭޓްކުރާ އެއަރލައިންތަކަށް އަންގަވާނެކަމަށް ރީޖަނަލް އެއަރޕޯޓްސްއިން ވިދާޅުވެއެވެ. މާވަރުލު އެއަރޕޯޓުގެ ޝެޑިއުލް ފްލައިޓުތައް އޮޕަރޭޓުކުރާނީ މޯލްޑިވިއަނުންނެވެ.
މާވަރުލު އެއަރޕޯޓުގައި ރޭގަނޑު ފްލައިޓު ޖެއްސުމުގެ އެންމެ މުހިއްމު އެއް ބޭނުމަކީ ސިއްޙީ ކުއްލި ޙާލަތްތަކުގައި ބަލި މީހުން އިވެކުއޭޓްކުރަންޖެހޭ ޙާލަތްތަކުގައި އެކަން ކުރެވޭނެ އިންތިޒާމު ފަހިކުރުމެވެ. މިއާއެކު އެސަރަޙައްދުގެ ރައްޔިތުންނަށް އިތުރު ލުއިތަކެއް ލިބިގެންދާނެކަން ސަރުކާރުން ފާހަގަކުރައްވައެވެ. ހަމައެއާއެކު އެސަރަޙައްދުގެ ފަތުރުވެރިކަން އިތުރަށް ކުރިއެރުވުމުގައިވެސް މާވަރުލު އެއަރޕޯޓުގެ ދައުރުފުޅާކުރުމަށްދަނީ މަސައްކަތް ކުރަމުންނެވެ.
އެމްޓީސީސީން މާވަރުލު އެއަރޕޯޓުގެ މަސައްކަތް ކުރިއަށްގެންގޮސްފައިވަނީ 2 ފިޔަވައްސަކަށް ބަހާލައިގެންނެވެ. ބަޖެޓުން 69 މިލިޔަނަށްވުރެ ގިނަ ރުފިޔާ ޚަރަދުކޮށްގެން ތަރައްޤީކޮށްފައިވާ މާވަރުލު އެއަރޕޯޓަކީ 1200 މީޓަރުގެ ދިގު ރަންވޭއަކާއެކު އެތެރޭގެ އުދުހުންތަކަށް ޚާއްސަ އެއަޕޯޓެކެވެ.
މާވަރުލު އެއަރޕޯޓަށް ރޭގަނޑު ފްލައިޓު ޖެއްސޭނެ އިންތިޒާމު ހަމަޖެހިގެންދިޔުމާއެކު ރީޖަނަލް އެއަރޕޯޓްސްގެ ދަށުގައި އޮތް 8 އެއަރޕޯޓުގެ ތެރެއިން ހޯރަފުށި ފިޔަވާ ހުރިހާ އެއަރޕޯޓަކަށްވެސް ރޭގަނޑު ފްލައިޓު ޖެއްސޭނެ އިންތިޒާމު ހަމަޖެހިގެން ދިޔައީއެވެ.