އޭސީސީއަށް އައްޔަންކުރަން ރައީސް ފޮނުއްވި ދެ ނަމަށް މަޖިލީހުން ރުހުން ދީފި
އެންޓި ކޮރަޕްޝަން ކޮމިޝަން (އޭސީސީ) އަށް އައްޔަންކުރުމަށް، ރައީސް ޑރ. މުޙައްމަދު މުއިއްޒު ރައްޔިތުންގެ މަޖިލީހަށް ފޮނުއްވި ދެ ނަމަށް މިއަދު މަޖިލީހުން ރުހުން ދީފިއެވެ. އޭސީސީއަށް މެންބަރުން އައްޔަންކުރުމަށް ރައީސް ދެ ބޭފުޅެއްގެ ނަން މަޖިލީހަށް ފޮނުއްވީ މިދިޔަ ބުރާސްފަތި ދުވަހުގައެވެ. ނަމަވެސް މިއަދު ރައީސް ވަނީ އޭގެ ތެރެއިން އެއް ނަން ބަދަލުކުރައްވައިފައެވެ. ރައީސް ކުރިން ފޮނުއްވި ނަންތަކުގެ ތެރޭގައި ހިމެނުނީ ރ. ހުޅުދުއްފާރު، ރޯޒް ވިލާ/ އާސިޔާ އަޒީމާ އާއި މއ. ގޯލްޑަންމޫން، އަހުމަދު ނާޝިދެވެ. މިއަދު ރައީސް ވަނީ އާސިޔާ އަޒީމާގެ ބަދަލުގައި މއ. ގޯލްޑަންމޫން، އަބްދުﷲ ނާޝިދުގެ ނަން ފޮނުއްވައިފައެވެ. މިއަދު ހެނދުނު ދައުރުން ބޭރުން ބޭއްވި ޖަލްސާގައި ވަނީ އެސީސީއަށް މެންބަރުން އައްޔަންކުރުން ދިރާސާކުރަން، މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފައެވެ. އަދި އެ ނަންތަކަށް ޝަކުވާ ހުށަހަޅަށް 30 މިނިޓު ދިނެވެ. އެ ކޮމިޓީން ނަންތައް ފާސްކޮށް މަޖިލީހަށް ފޮނުވުމުން، ދެ ބޭފުޅުންނަށް ރުހުން ދިނީ ހާޒިރުވި 68 މެމްބަރުންގެ އިއްތިފާގުންނެވެ. އޭސީސީއަށް ދެ މެންބަރުން އައްޔަންކުރަނީ އެ ކޮމިޝަންގެ ނައިބު ރައީސް އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމާ ގުޅިގެންނެވެ.
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ