"ބިންވެރިޔާ" ސްކީމުގެ ސްކީމުގެ ދަށުން ގޯތި ނުލިބޭ ބަޔަކަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ގޯތިިތަކެއް ދިން ކަމަށް ބުނެ ކުރާ ތުހުމަތުތައް އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދޮގުކުރައްވައިފިއެވެ.
އެޗްޑީސީގެ ލިޔެކިޔުންތަކެއް ފޯޖުކޮށް ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދޫކޮށްފައިވާ މައްސަލަ ފެންމަތިވެ އެ މައްސަލަ ބަލަމުންދާ ކަން ފުލުހުން ހާމަކޮށްފައި ވަނީ މިއަދު އެވެ.
އެ މައްސަލައާއި ގުޅޭގޮތުން މައުލޫމާތު ދިނުމަށް މިރޭ ނޫސްވެރިންނާ ބައްދަލު ކުރައްވާ ވާހަކަ ދައްކަވަމުން ފަޒުލް ވިދާޅުވީ، ބިންވެރިޔާ ސްކީމްގެ ދަށުން ރަޖިސްޓްރީ ދޫކުރުމާއި އެއްބަސްވުން ހެދުމާއި ބިން ހަވާލުކުރުމަކީ އެޗްޑީސީން ކުރާ ކަމެއް ނޫން ކަމަށެވެ. މައްސަލަ ތަހުގީގު ކުރަން ކަމާ ގުޅޭ އިދާރާތަކަށް އެއްބާރުލުން ދެއްވާނެކަން ފާހަގަކުރައްވާ ފަޒުލް އިތުރަށް ވިދާޅުވީ އެ ސްކީމުގެ ދަށުން ބިން ލިބިފައިވާ ފަރާތްތައް އިންސާފުވެރިކަމާއެކު ބިން ދޫކުރައްވާނެ ކަމަށެވެ.
އަދި ސޯޝަލް މީޑިއާގައި ފަތުރަމުންދާ ވާހަތަކަކީ ހަގީގަތާ ހިލާފު ވާހަކަތަކެއްކަން ފާހަގަ ކުރައްވާ ފަޒުލް ވިދާޅުވީ އަބުރު ކަތިލަން ދައްކާ ވާހަކަ ތަކަށް ޖަވާބުދާރީވާން ތައްޔާރަށް ހުރި ކަމަށެވެ.
"އަޅުގަނޑަށް ދެވެން އޮތް ޔަގީން ކަމަކީ އެޗްޑީސީގެ ފަރާތުން އަދި އެޗްޑީސީގެ މުވައްޒަފަކު ވެސް ހިމެނޭ ގޮތަށް ޝާމިލްވާ ގޮތަށް އެޗްޑީސީގެ ފަރާތުން އެއްވެސް މުވައްޒަފަކު ވެސް އަދި އެޗްޑިސީގެ ބެލުމުގެ ދަށުގައި ހުރި އެއްވެސް ކަމެއް އިސްތިސްނާ ވާނޭ ނޫނީ ބިންވެރިޔާ ސްކީމްގައި ހިމެނޭ އެއްވެސް ފަރާތެއް އިސްތިސްނާ ވާނެ ގޮތަކަށް މިކޮޅުން ކޮށްފައެއް ނޯންނާނެ،" ފަޒުލް ވިދާޅުވިއެވެ.
އަދި ހަމައެހެންމެ އެޗްޑީސީގެ ޕޯޓަލް މެދުވެރިވެގެން އެޕްލައިކުރި 792 ޕްލޮޓް ހުޅުމާލޭ ފޭސް ދޭކުން ހަވާލުކޮށްފައިވާނެ ކަމަށާއި، ފޭސް ދޭކުން 600 އަށް ވުރެ ގިނައިން ޕްލޮޓް ދޫކުރުމަށް ނިންމާފައިވާނެ ކަމަށް އޭނާ ވިދާޅުވިއެވެ.
ބިންވެރިޔާ ސްކީމުގައި މައްސަލަތަކެއް އުޅޭކަން ފާހަގަވެފައި ވަނީ ދެ ބިމެއްގެ އިންފާރު ރޭނުމުގެ ހުއްދަ އަށް ހައުސިން މިނިސްޓްރީގައި އެދުމުންނެވެ. ސޯޝަލް މީޑިއާގައި ދައުރުވާ އެ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ. ދެން ހިމެނެނީ އަބްދުލް މަޖީދު މާހިރު ނަމަކަށް ކިޔާ މީހެކެވެ.
ކުރީގެ ސަރުކާރުން "ބިންވެރިޔާގެ" ސްކީމްގެ ދަށުން ހުޅުމާލެ ދެކާއި ތިނެއް އާއި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ވަނީ ދޫކޮށްފައެވެ.