ށ އަތޮޅަށް ކުރައްވާ ރަސްމީ ދަތުރުފުޅުގައި ޖުމުހޫރީޕާޓީގެ ލީޑަރު އަދި ރިޔާސީ ކެންޑިޑޭޓު އޮނަރަބަލް ގާސިމް އިބުރާހިމް ށ އަތޮޅަށް ވަޑައިގެންފި އެވެ.
މިއަދު ށ ފުނަދޫއަށް ގާސިމް އިބުރާހިމް ވަޑައިގަތުމުން އެރަށުގެ ގިނަ އަދަދެއްގެ ރައްޔިތުން ވަނީ އެމަނިކުފާނަށް މަރުހަބާ ދަންނަވާފަ އެވެ.
ރައްޔިތުންނާއި ބައްދަލުކުރެއްވުމަށްފަހު ގާސިމް އިބުރާހިމް ދެން ވަޑައިގަތީ ފުނަދޫ ކައުންސިލް މެންބަރުންނާއި ބައްދަލުކުރެއްވުމަށެވެ. ކައުންސިލް މެންބަރުންވަނީ ރަށުގެ ތަރައްގީއަށް ހުރި ގޮންޖެހުންތަކާއި މިވަގުތު ފުނަދޫގެ ހާލަތު ގާސިމް އިބުރާހިމްގެ އަރިހުގައި ދަންނަވާފަ އެވެ.
މިއަދު ފުނަދޫއަށް ކުރެއްވި ދަތުރުފުޅުގައި ގާސިމް އިބުރާހިމް ވަނީ ފުނަދޫ ސުކޫލްގެ މެނޭޖުމަންޓާއިވެސް ބައްދަލުކުރައްވާފައި، އަދި މީގެ އިތުރުން ދާދި ފަހުން ފުނަދޫގައި ހުޅުވިގެންދިޔަ ވިލާ ކޮލެޖުގެ ކެމްޕަސް ބައްލަވާލައްވާފައިވެ އެވެ. ޖުމުހޫރީޕާޓީގެ ރިޔާސީ ކެންޑިޑޭޓު ށ އަތޮޅަށް ކުރައްވާ މިދަތުރުފުޅުގައި މިރޭ ފުނަދޫގައި ޚާއްސަ ޖަލްސާއެއް ބޭއްވުމަށް ވަނީ ހަމަޖެހިފަ އެވެ.
މިޖަލްސާއަށް ޕާޓީގެ މެންބަރުންނާއި ޕާޓީއަށް ހެޔޮއެދިވަޑައިގަންނަވާ ހުރިހާ ފަރާތްތަކުން ވަޑައިގަތުމަށް ޖުމުހޫރީ ޕާޓީން އެދެ އެވެ. މިހާތަނަށް ޖުމުހޫރީޕާޓީން ކެމްޕެއިން ދަތުރުތައްކޮށްފައިވަނީ، ލ. ޅ. ޏ. ފ. އަދި މ. އަތޮޅަށެވެ.