ހޯމް މިނިސްޓަރު އުމަރު ނަސީރު ބަންދުގައި ބަހައްޓައިގެން ކޯޓަށް ހާޒިރުކުރަން އަމުރު ނެރެފައި ވަނިކޮށް އުމަރު މިއަދު ރާއްޖެ ވަޑައިގެންފި އެވެ.ނެދަލެންޑްސަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު އުމަރު މިއަދު މާލެ ވަޑައިގަތްއިރު މާދަމާ ހެނދުނު 11:00 އަށް އުމަރު ބަންދުކޮށްގެން ކޯޓަށް ހާޒިރުކުރަން ކްރިމިނަލް ކޯޓުން އޮތީ ފުލުހުންގެ މައްޗަށް އަމުރު ނެރެފަ އެވެ. އެ އަމުރު ނެރެފައިވަނީ އުމަރުގެ މައްޗަށް ދައުލަތުން ކުރާ ޖިނާއީ ދައުވާގެ ޝަރީއަތަށް އުމަރު ހާޒިރުނުވާ މައްސަލައިގަ އެވެ.އުމަރު ރާއްޖެ ވަޑައިގަތީ މިއަދު މެންދުރު 2:00 ހާއިރު ކަމަށް ވަނީ އެނގިފަ އެވެ. ނަމަވެސް މިހާތަނަށް އައިއިރު ވެސް އުމަރު ހައްޔަރުކޮށްފައެއް ނުވެއެވެ.އުމަރު ބަންދު ކުރަން ނެރުނު އަމުރާ މެދު ސުވާލު ކުރުމުން ފުލުހުން ބުނީ "ފުލުހުންގެ މައްޗަށް އެފަދަ އަމުރެއް ކޮށްފައިވާ ނަމަ ތަންފީޒުކުރާނެ" ކަމަށެވެ. އުމަރު ބަންދުގައި ބަހައްޓައިގެން ކޯޓަށް ހާޒިރުކުރުމުގެ އަމުރު އިސްތިއުނާފް ކުރަން އުމަރުގެ ފަރާތުން ހުށަހެޅި ނަމަވެސް އެ މައްސަލަ ބަލައިނުގަނެވޭނެ ކަމަށް ހައި ކޯޓުން މިއަދު ވަނީ ނިންމައިފަ އެވެ.އުމަރު ބަންދުކުރަން އަމުރު ނެރުނީ އެ މައްސަލައިގެ ޝަރީއަތުގެ ދެ އަޑުއެހުމަކަށް އުމަރު ހާޒިރުވެ ވަޑައިނުގެން ވަނިކޮށް ތިން ވަނަ އަޑުއެހުމަށް ހާޒިރު ނުވެއްޖެ ނަމަ އުމަރާ މެދު ފިޔަވަޅު އަޅުއްވާނެކަމުގެ އިންޒާރު ގާޒީ އަބްދުﷲ ދީދީ ދެއްވުމަށްފަހު އެވެ. ގާޒީ އަބްދުﷲ ދީދީ ވިދާޅުވެފައިވާ ގޮތުގައި ދަތުރަށް ފުރައި ވަޑައިގަންނަވަންޖެހޭނީ ކޯޓަށް ހާޒިރުވުމުގެ އަމުރާ ހަވާލުވުމަށް ފަހު ކަމަށް ގަބޫލު ނުކުރައްވާ ކަމަށެވެ.އުމަރުގެ މައްޗަށް ދައުލަތުން ދައުވާކުރަނީ ކުރީގެ ރައީސް މުހައްމަދު ނަޝީދުގެ ސަރުކާރުގެ ދުވަސްވަރު އޭރުގެ އިދިކޮޅު ފަރާތްތަކުން ކުރި މުޒާހަރާއެއްގައި ރާއްޖޭގެ އަމަން ކަމަށް ގެއްލުމެއް ލިބިދާނެ ފަދަ ވާހަކަ އުމަރު ދެއްކެވި ކަމަށް ބުނެއެވެ. ނަމަވެސް އެ ދައުވާއަށް އުމަރު އިންކާރު ކުރައްވަ އެވެ.މިއީ ރާއްޖޭގެ ތާރީޚުގައި ދައުލަތުގެ ވަޒީރަކު ބަންދުކޮށްގެން ކޯޓަށް ހާޒިރުކުރަން އަމުރު ނެރުނު ފުރަތަމަ ފަހަރެވެ.