އައްޑޫ ސިޓީ ހިތަދޫގެ އިތުރު ދެ ފިހާރައަކަށް ވަގުތުން ކަަރަންޓް ދިނުމަށް، ހިތަދޫ މެޖިސްޓްރޭޓް ކޯޓުން މިއަދު ފެނަކައިގެ މައްޗަށް އަމުރުކޮށްފިއެވެ.
ކަރަންޓް ކަނޑާލާފައިވާތީ، ވަގުތުން ކަރަންޓް ދިނުމަށް އަމުރުކޮށްފައިވަނީ، ހިތަދޫ ބިންބިމާގޭ އިމްރާހިމް ސަބްރީގެ ވިޔަފާރި ހިންގާ ދެ ފިހާރަ ކަމަށްވާ، "ހޮޓްބޮކްސް" އަދި ހެލްޕްސައިޑް" އަށެވެ.
އެ ފިހާރަތަކުން ކަރަންޓް ކަނޑާލާފައިވާތީ، ސަބްރީ ފެނަކައާ ދެކޮޅަށް ކުރި ދައުވާގައި ބުނެފައިވަނީ، މާޗުމަހުގެ ކަރަންޓް ބިލް ފޮނުވިއިރު، ކުރިން ކަރަންޓް ބިލަށް އެއްވެސް ބަދަލެއް އަންނަ ވާހަކައެއް ނުވަތަ އެހެން އެއްވެސް ސަބަބެއް އެންގުމަކާ ނުލާ ކުރީގެ ޔުނިޓަކަށްޖެހޭ ވަރަށްވުރެ ބޮޑު ރޭޓަކުން ބިލް ހަދާފައި ފޮނުވާފައިވާތީ އެކަން އިސްލާހުކުރުމަށް ފޮނުވި ސިޓީއަށް ޖަވާބެއް ދިނުމެއް ނެތި މިއަދު ހެނދުނު 10:30 ގައި ކަރަންޓް ކަނޑާލާފައިވާ ކަމަށެވެ.
ސަބްރީ އެދިފައިވަނީ ކޯޓަށް ހުށައެޅިފައިވާ މައްސަލަ ނިމެންދެން، އެ ފިހާރަތަކަށް ކަރަންޓް ދޫކޮށްދިނުމުގެ ވަގުތީ އަމުރެއް ފެނަކައިގެ މައްޗަށް ނެރެދިނުމަށެވެ.
ކޯޓުން ނެރުނު ވަގުތީ އަމުރުގައި ބުނެފައިވަނީ، ކަރަންޓް ހިދުމަތް އެ ފިހާރަތަކުން ކެނޑިފައި އޮތުމަކީ އެކަމުގެ ސަބަބުން ފިހާރައިގެ ވެރިފަރާތުގެ ހައްގާއި އަދި އެ ފިހާރައިން ހިދުމަތް ލިބިގަންނަ ފަރާތުގެ ހައްގުތަކަށް އުނިކަން ލިބިދާނެ ކަމެއް ކަމަށެވެ.
އެހެންކަމުން "ހޮޓްބޮކްސް" އާއި "ހެލްޕްސައިޑް" ފިހާރައަށް ދީފައިވާ ކަރަންޓްގެ ހިދުމަތް މެދުނުކަނޑާ މިވަގުތަށް ފޯރުކޮށްދިނުމަކީ ޝަރޫރަތެއް ކަމަށް ފެންނާތީ މި މައްސަލަ ވަކިގޮތަކަށް ނިމެންދެން ނުވަތަ ކޯޓުން ވަކިގޮތެއް ފެނަކައަށް އަންގަންދެން އެ ދެ ފިހާރައަށް ވަގުތުން ކަރަންޓްގެ ހިދުމަތް ދިނުމަށް ފެނަކައިގެ މައްޗަށް އަމުރުކުރާ ކަމަށް، ހިތަދޫ ކޯޓުގެ މެޖިސްޓްރޭޓް އަބްދުﷲ ފާރޫގު އިބްރާހިމް ނެރުއްވި އަމުރުގައި ބުނެފައިވެއެވެ.
ހިތަދޫ މެޖިސްޓްރޭޓް ކޯޓުން ރޭ ވެސް ފެނަކައިން ކަރަންޓް ކަނޑާލާފައިވާ ފިހާރައަކަށް ވަގުތުން ކަރަންޓް ދިނުމަށް އަމުރުކޮށްފައިވާއިރު، ފެނަކައިން ދަނީ ކަރަންޓް ބިލް ނުދައްކާ ފިހާރަތަކުން ކަރަންޓް ކަނޑަމުންކަން ފާހަގަކޮށްލެވެއެވެ.
އެގޮތުން ރޭ ހިތަދޫގައި ހުރި ސިމްޑީގެ ޝޯ ރޫމުން ކަރަންޓް ކަނޑާލިއިރު، މިއަދު ވަނީ ހިތަދޫގައި ހުރި އައިއެމްޑީސީ ހޮސްޕިޓަލުން ވެސް ކަރަންޓް ކަނޑާލާފައެވެ.