ސަރުކާރަށް ދޮގު ތުހުމަތުކުރާ ކަމަށް ބުނެ އިދިކޮޅު ޕާޓީތަކުގެ މެމްބަރުން ފުލުސް އޮފީހަށް ހާޒިރުކޮށް ބިރުދައްކަމުން ދަނީ ސަރުކާރަށް ގޮތް ހުސްވެގެން ކަމަށް 23 ޑިސެމްބަރު އިއްތިހާދުން އިއްޔެ ބުނެފި އެވެ.
މަދަނީ އިއްތިހާދާއި ސިޔާސީ އަށް ޕާޓީއެއް ގުޅިގެން އުފައްދާފައިވާ، 23 ޑިސެމްބަރު އިއްތިހާދުން ނެރުނު ނޫސް ބަޔާނެއްގައި ބުނީ ސާބިތު ނުހިފޭ ދޮގު ވާހަކަތަކެއް ދެއްކި ކަމަށް ބުނެ، ގައުމީ ޕާޓީގެ ނައިބް ރައީސް ޑރ. މުހައްމަދު ޖަމީލް އަހްމަދާއި އަބްދުލް މަތީނާއި އެ ޕާޓީގެ ކައުންސިލް މެމްބަރު އަހްމަދު އިބްރާހިމް ދީދީ (ސަންދާނު އަހައްމައިދީ) ހައްޔަރުކުރުމަކީ ސަރުކާރުން ހިންގި ޚުދުމުހްތާރު ފިނޑި އަމަލެއް ކަމަށެވެ. އެ ހުރިހާ އެންމެން ވަގުތުން ދޫކޮށްލުމުގެ އިތުރުން ދިވެހި އެއްވެސް ރައްޔިތަކަށް ނުހައްގުން އަނިޔާއެއް ނުދިނުމަށް ސަރުކާރަށް އެ ބަޔާނުގައި ގޮވާލާފައިވެ އެވެ.
"މި ފުރުސަތުގައި ސަރުކާރުގެ ބިރުދެއްކުންތަކާއި އަނިޔާތަކުން މި އިއްތިހާދުގެ އެއްވެސް ބައިވެރިއަކު ބިރުގަނެ، ފަހަތަށް ނުޖެހޭނެ ކަމާއި އިސްލާމްދީނާއި ގައުމުގެ ހައްގުގައި ކުރަމުން ގެންދާ ހުރިހާ ކަމެއް އިތުރު ފޯރި އާއި ޔަގީންކަމާ އެކު ކުރިއަށް ގެންގޮސް ރައްޔިތުންނަށް ގެއްލެމުންދާ ހައްގުތައް ހޯދައިދޭނެކަމުގެ ފުރިހަމަ ޔަގީންކަން ލޮބުވެތި ދިވެހި ރައްޔިތުންނަށް 23 ޑިސެމްބަރު އިއްތިހާދުގެ ހުރިހާ ބައިވެރިންގެ ނަމުގައި އަރުވާ ވާހަކަ ވެސް ދަންނަވަމެވެ،" އެ ބަޔާނުގައިވެ އެވެ.
އިއްތިހާދުން ބުނިގޮތުގައި ސަރުކާރުން އިސްލާމް ދީނާއި ގަމުގެ މަސްލަހާ ދެކޮޅަށް ހިންގަމުންދާ ޖަރީމާތައް ކުށްވެރިކޮށް، މީޑިއާއާ އެހެން ވެސް ތަންތަނުގައި ދައްކާ ވާހަކަތައް ހުއްޓުވުމަށް ބިރުދައްކަމުން ދަނީ 24 ފެބުރުއަރީގައި ބާއްވާ މަހާސިންތާ އަށް ހުރަސްއެޅުމަށެވެ. އެކަން ހުއްޓުވުމަށް ސަރުކާރުން ޣައިރު ގާނޫނީ ކަންތައްތަކެއް ހިންގާ ކަމަށް ބުނެ އެ ބަޔާނުގައި އެ އަމަލުތައް ވެސް ކުށްވެރިކޮށްފައިވެ އެވެ.