ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު، މުރައިދޫގައި މަސައްކަތްކުރާ މުވައްޒަފުންގެ މަޢުލޫމާތު ޤައުމީ ސަލާމަތަށް ނުރައްކާ ވާތީ، ހާމަ ނުކުރަން ނިންމީ މިއަދު ހެނދުނުއެވެ. އަސުރުން ފާބައިގެން ރަނގަޅަށް ހަވީރު ނުވެވިގެން އުޅެނީސް، ޤައުމީ ސަލާމަތަށް ނުރައްކަލެއް ކަމަށް ނިންމި 241 ކޮމިޓީއިން ހަމަ އެ މައްސަލަ އެއީ ޤައުމީ ސަލާމަތަށް ހުރި ނުރައްކަލެއް ނޫން ކަމަށް ވަނީ ކަނޑައަޅާފައެވެ. “ޤައުމީ ސަލާމަތަކީ” ވެސް ކުޅޭ ކުޅޭ އެއްޗަކަށް ހަދައި، މުއިއްޒުގެ އާރާއި ބާރާއި ނުފޫޒުން ކަންކަން ކުރެވޭކަން ދެއްކުމަށް މަސައްކަތް ކުރީއެވެ.
ޤައުމީ ސަލާމަތަކީ އެއްވެސް ހާލެއްގައި ވަކި ފަރާތަކަށް ނިސްބަތްވާ އެއްޗެއް ނޫނެވެ. އެއީ މުޅި ޤައުމުގެ ރައްޔިތުންގެ ޙައްޤެކެވެ. އެއީ އަބްދުއްރަހީމް އާއި މުއިއްޒު ފުށްގަނޑެއްހެން މޮޑެން އޮންނަ އެއްޗެއް ނޫނެވެ.
ޤައުމެއް ވެއްޖިޔާ ހަމަ ޖެހުމެއް އޮންނަން ޖެހެއެވެ. މުއިއްޒު މިއަދު ބުނާއެއްޗެއް، އެއް ބަހަކުން މާދަމާއެއް ނުބުނެއެވެ. އެނބުރޭ ވަހުތާނެކޭ މިއަދު ދިވެހިންނަށް ޖެހިފައިވާ ވަލިއްޔުލްއަމުރެކޭ ތަފާތެއް ނެތެވެ.
މި ހިސާބުން ރައީސުލްޖުމްހޫރިއްޔާގެ ގެކޮޅު މުލިއާގޭގައި މަސައްކަތް ކުރާ މުއައްޒަފުންގެ އަދަދު ހާމަ ކުރުންވެސް، މި އުފެދުނު ގާނޫނީ ބާރު ލިބިގެންވާ ޕްރެޒިޑެންސްގެ ތެރެއިން ހިމެނިގެން ދާނެއެވެ.
ޤައުމީ ސަލާމަތުގެ ނަމުގައި ވަކި ފަރުދުންނަށް ނުވަތަ ސިޔާސީ ޕާޓީތަކަށް ފައިދާވާ ގޮތަށް ކަންކަން ނިންމުމަކީ ޑިމޮކްރަސީގެ އަސާސްތަކާ ފުށުއަރާ ކަމެކެވެ. މިފަދަ ޢަމަލުތަކުން ޤާނޫނުގެ ވެރިކަމާއި ހަމަހަމަކަން ގެއްލި، ވަކި ބަޔަކަށް ނާޖާއިޒު ބާރެއް ލިބިގެންދެއެވެ. މީގެ ސަބަބުން މުޖުތަމަޢުގެ އެކި ފަންތީގެ މީހުންގެ މެދުގައި ފިތުނަފަސާދަ އުފެދި، އިޖުތިމާޢީ ގުޅުން ކެނޑިގެން ހިނގައިދާނެއެވެ.
ޤައުމީ ސަލާމަތާ ގުޅޭ ނިންމުންތައް ނިންމަންވާނީ ވަކި ފަރުދެއްގެ މަޞްލަޙަތަށް ނުބަލައި، މުޅި ޤައުމުގެ ހެވާއި ލާބައަށް ވިސްނައިގެންނެވެ. މިކަމަށްޓަކައި މިނިވަން، މުސްތަޤިއްލު އަދި ޕްރޮފެޝަނަލް މުއައްސަސާތަކެއް އޮތުމަކީ ކޮންމެހެން މުހިންމު ކަމެކެވެ. އަދި މި މުއައްސަސާތަކުގެ ނިންމުންތަކަށް ހުރިހާ ފަރާތްތަކުންވެސް އިޙްތިރާމްކުރަން ޖެހެއެވެ. އޭގައި ރައީސުލްޖުމްހޫރިއްޔާވެސް ހިމެނެއެވެ.
މާދަމާ ޤައުމީ ސަލާމަތުގެ ނަމުގައި ދެން މުއިއްޒު އިނދިކޮޅު ފަރާތެއް ހައްޔަރުވެސް ކޮށްފާނެއެވެ. މި ގޮތަށް ބާރުތައް ނަހަމަ ގޮތުގައި ބޭނުން ކުރުމަކީ ޑިމޮކްރެޓިކް މުޖުތަމަޢުއެއްގައި ޤަބޫލުކުރެވޭނެ ކަމެއް ނޫނެވެ. މިފަދަ ޢަމަލުތަކުން ޚިޔާލު ފާޅުކުރުމުގެ މިނިވަންކަން ހަނިވެ، ބިރުވެރި މާޙައުލެއް އުފެދިގެން ދެއެވެ.
ޤައުމީ ސަލާމަތުގެ ނަމުގައި މިއަދު މުއިއްޒު މި ކުޅުނު، ކުޅި ކުޅިވަރު މިފަދައިން އުޅުމަކީ ވަރަށް ނުރައްކާތެރި ކަމެކެވެ. މިފަދަ ޢަމަލުތަކުން ދިގު މުއްދަތުގައި ޤައުމަށް ލިބޭނީ ގެއްލުމެވެ. ޤައުމީ ސަލާމަތުގެ ކަންކަން ބޭނުންކުރަންވާނީ ހަމައެކަނި އޭގެ ޙަޤީޤީ މަޤްޞަދުގައި ކަމުގައި ދަންނަވަމެވެ.