ރާއްޖޭގައި ދުންފަތް މަނާކުރަންވީ އުމުރަކާއި ގުޅޭގޮތުން ރައްޔިތުންގެ ޚިޔާލު ހޯއްދެވުމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ދެންމެ ޕޯލެއް ހުޅުވާލައްވައިފި އެވެ.
އެމަނިކުފާނު އެ ޕޯލް ހުޅުވާލެއްވީ އެކްސް ގަ އެވެ. އެމަނިކުފާނުގެ ޕޯލް ގައި ވިދާޅުވީ ދުންފަތުގެ ނުރައްކަލުން ޒުވާން ޖީލާއި އަންނަން އޮތް ޖީލު ސަލާމަތް ކުރެއްވުމަށް ކުރައްވާ މަސައްކަތުގެ ދަށުން ދުންފަތް މަނާ އުމުރެއް ރާއްޖޭގައި ކަނޑައަޅުއްވަން ނިންމަވާފައިވާ ކަމަށެވެ.
އެކަމަށް ރައްޔިތުން ހިޔާލު ދެއްވުމަށް އެމަނިކުފާނު އެދިވަޑައިގެންނެވި އެވެ. ރަައީސްގެ ޕޯލް ގައި ވަނީ ތިން އުމުރުފުރައެއް ފާހަގަ ކުރައްވާފަ އެވެ. އެއީ;
Advertisement
* ޖަނަވަރީ 1, 2007
* ޖަނަވަރީ 1, 2004
* ޖަނަވަރީ 1, 2000
ރައީސް ވަނީ މި ތިން އުމުރުފުރާގެ ތެރެއިން ދުންފަތް ބޭނުންކުރުން މަނާކުރަންވީ ކޮން އުމުރުފުރަކަށްކަން ރައްޔިތުންގެ ހިޔާލަށް އެދިވަޑައިގެންފަ އެވެ.
ދުންފަތުން ދިވެހިން ސަލާމަތް ކުރުމަށް ސަރުކާރުން ދަނީ މުހިންމު ފިޔަވަޅުތަކެއް އަޅުއްވަމުންނެވެ. އާންމުންގެ ތެރޭގައި ކޮންމެވެސް ވަރަކަށް އެކަމާމެދު ހިޔާލުތަފާތުވުން އޮތް ނަމަވެސް ވަަރަށް ގިނަ ބަޔަކު ދަނީ ސަރުކާރުގެ ފިޔަވަޅުތަކަށް ތާއީދު ކުރާކަން ހާމަ ކުރަމުންނެވެ.
ސަރުކާރުން މިހާރު ވަނީ ރާއްޖޭގައި ވޭޕު ކުރުން ވެސް މަނާކޮށްފަ އެވެ. އެކަން ސަރުކާރުން ތަންފީޒު ކުރަން ފެށީ ވޭޕް ކުރުން ބޮޑު ފެޝަނަކަށް ވެ ދިވެހީންގެ ސިއްހަތު, އެކަމުން ވަރަށް ބޮޑު ނުރައްކަލަކަށް ހުށައެޅިފައިވަނިކޮށެވެ.