މީހަކާ ބައްދަލުވާތާ ފުރަތަމަ ތިން ސިކުންތުގެ ތެރޭގައި އެހެން މީހުން ތިމާގެ ސިފައަށް އިންސާފު ކުރެ އެވެ. ހާއްސަކޮށް ރަސްމީ މުނާސަބަތެއް ނަމަ އިސްތަށިގަނޑަށް ބަލާފައި ތިމާގެ ޝަހުސިއްޔަތާ މެެދު އެހެން މީހުން ގޮތެއް ނިންމަ އެވެ. އޮފީހުގެ ބައްދަލުވުމަކަށް ވިޔަސް ނުވަތަ ކައިވެނި ޕާޓީއަކަށް ވިޔަސް، އިސްތަށިގަނޑަށް ހަދާ ގޮތެއްގެ ސަބަބުން އެ މީހެއްގެ މުޅި ސިފަ ތަފާތު ކޮށްލައި ރީތިކޮށް ދެ އެވެ. 
އިސްތަށިގަނޑު ސްޓައިލް ކުރަންވާނީ ހަމައެކަނި ޓްރެންޑްތަކަށް ތަބާވެގެނެއް ނޫނެވެ. އެ މީހެއްގެ މޫނުގެ ބައްޓަމާއި އިސްތަށިގަނޑުގެ ބާވަތާ ގުޅޭ ސްޓައިލެއް ހޯދުން ވަރަށް މުހިއްމެވެ. ތަފާތު ގޮތެއް އިސްތަށިގަނޑަށް ހެދުމުގެ ކުރީން ތިމާއަށް ކަމުދާ ކަހަލަ ލުކެއް އިހުތިޔާރުކުރާށެވެ.  
މި އަހަރު ބޮޑަށް މަގުބޫލު ވާނެ ކަމަށް ބެލެވެނީ މިދިޔަ އަހަރު ފެނުނު ސްޓައިލްތައް އަނެއްކާވެސް އެހެން ގޮތަކަށް ބަދަލު ކޮށްލައިގެނެވެ. އަދި ގިނަ ވައްތަރުތަކުގައި އިސްތަށިގަނޑަށް އިތުރު 'ޓެކްސްޗާ'އެއް ދޭން އަހައްމިއްޔަތުކަން ދީފައިވާކަން ފާހަގަ ކުރެވެ އެވެ. މީގެ އިތުރުން ކްލެސިކް ސްޓައިލްތަކެއް ވެސް ފެންނަން ފަށައިފި އެވެ. ތިރީގައި، އެންމެ ފަހުގެ މަގުބޫލު ފަސް ސްޓައިލްއެއް ހިމަނާލާނަމެވެ.
ފިލްމު 'ބޭބީގާލް'ގެ މަގުބޫލުކަމަށް ފަހު ލީޑް އެކްޓަރު ހެރިސް ޑިކިންސަންގެ އިސްތަށިގަނޑުގެ ސްޓައިލް މިހާރު އަންނަނީ އިތުރަށް މަގުބޫލުވަމުންނެވެ. ޒަމާނީ އަދި ޒުވާން ސިފައެއް ގެެނެސްދޭ މި ލުކް ޔަގީނުން ވެސް ކުރިއަށް އޮތް ދުވަސްތަކުގައި އިތުރަށް މަގުބޫލުވާނެ އެވެ.
މިއީ 'ޓެކްސްޗާ' އާއި 'މޫވްމަންޓަށް' ބާރުއަޅާ 'ޗޮޕީ' ފަށަލަތަކަކާ އެކު ކުޑަކޮށް ހާވާލައިފައި ހުންނަ ސްޓައިލްއެކެވެ. އަދި ނުރަސްމީ ނަމަވެސް ޒަމާނީ ވައްތަރެކެވެ.
'ސްލިކްޑް ބެކް' ސްޓައިލްގައި އިސްތަށިގަނޑު ހުންނަނީ ފަހަތަށް ރީތިކޮށް ފުނާއަޅާފަ އެވެ. ރަސްމީ މުނާސަބަތަކަށް ނުވަތަ ބޭނުމަކަށް ކަމުދާ ނަލަ މި ސްޓައިލް މިދިޔަ އަހަރު މަޝްހޫރުވި 'އޯލްޑް މަނީ އެއިސްތެޓިކް' ސްޓައިލްއާ ވެސް ގުޅެ އެވެ. އަދި މިއީ މޫނުގެ އެކި ބައްޓަންތަކަށް ފެތޭ ވައްތަރެކެވެ.  
މިދިޔަ އަހަރު ފެނުނު އެންމެ މަގުބޫލު ފިރިހެން ހެއާސްޓައިލްތަކުގެ ތެރެއިން އެއް ވައްތަރަކީ ފޭޑް ކަޓް އެވެ. މި އަހަރު ވެސް މި ސްޓައިލް ފެނިގެންދާނެ ކަމަށް ބެލެވެ އެވެ.
ޒަމާނީ މި ސްޓައިލް މޫނުގެ ތަފާތު ބައްޓަންތަކާއި އެކި އުމުރުތަކާ ގުޅެ އެވެ. މި އަހަރު މި ސްޓައިލް ބޮޑަށް ފެންނާނީ މަޑު ފޭޑްއަކުން 'ޓެކްސްޗާޑް' ގޮތަކަށް ސްޓައިލް ކޮށްފައި ހުންނަ ތަނެވެ.
'މަލެޓް'އަކީ ވެސް މިދިޔަ އަހަރު ވަރަށް މަގުބޫލުވި ސްޓައިލްއެކެވެ. އެކަމަކު މި އަހަރު މި ސްޓައިލްގެ އެހެން ވައްތަރެއް ފެންނާނެ އެވެ. އެއީ 'ޓެކްސްޗާޑް' ކުރު އިސްތަށިގަނޑެކެވެ. މަޝްހޫރު ސީރީޒް 'އައުޓާ ބޭންކްސް'ގެ ތަރި ޑްރޫ ސްޓާކީ ވަނީ ދާދި ފަހުން މި ސްޓައިލްގައި ފެނިފަ އެވެ.
ނުވަދިހައިގެ އަހަރުތަކުގައި ފެޝަންއެއްގެ ގޮތުގައި މަޝްހޫރުވި ކުރު 'ބަޒް ކަޓް' އަކީ ކްލެސިކް ސްޓައިލްއެކޭ ބުނެވިދާނެ އެވެ. 'ބަޒް ކަޓް' ކޮންމެ އަހަރެއްގައި ވެސް ފެޝަން ޝޯތަކުގެ ރަންވޭ މަތީން ފެށިގެން މަޝްހޫރު ހޮލީވުޑް ސެލެބްރިޓީއިން ބޭނުން ކުރާތަން ފެނެ އެވެ. މި އަހަރުގެ ބަޒް ކަޓް ސްޓައިލްތަކުގެ ތެރޭގައި 'ބްލީޗްޑް ބަޒް ކަޓް' ހިމެނެ އެވެ.