ދުނިޔޭގެ އެންމެ ބޮޑު ފުޓްބޯޅަ މުބާރާތް ކަމަށްވާ ފީފާ ވޯލްޑް ކަޕްގެ މެޗުތައް އިންސާފު ކުރުމަށް އެމެރިކާއަށް އެތެރެވުމުގެ ހުއްދަ ނުދީ ބޭރުކޮށްލި ސޯމާލިއާގެ ރެފްރީ އޮމަރު އަރްތާންއަށް، މުބާރާތުގެ ތެރޭގައި އޭނާއަށް ލިބެންޖެހޭ ފުރިހަމަ މުސާރަ ދިނުމަށް ބައިނަލްއަގުވާމީ ފުޓްބޯޅަ ފެޑެރޭޝަން (ފީފާ) އިން ނިންމައިފިއެވެ. މި މުބާރާތުގައި އިންސާފު ކުރުމަށް ހޮވުނު ނަމަވެސް، އެމެރިކާގެ ވިސާ ނުވަތަ އެތެރެވުމުގެ ހުއްދަ ނުލިބުމުގެ ސަބަބުން އޮމަރު އަރްތާންއަށް ވަނީ މުބާރާތަށް ދެވޭ ގޮތް ނުވެފައެވެ. ނަމަވެސް ފީފާއިން މިހާރު ވަނީ އޭނާ މުބާރާތުގައި ރެފްރީކަން ކުރިނަމަ ލިބޭނެ ހުރިހާ ފައިސާއެއް އެއްވެސް އުނިކަމެއް ނެތްގޮތަށް ދިނުމަށް ކަނޑައަޅާފައެވެ. މީގެ ސަބަބުން އޭނާއަށް މާލީ ގޮތުން އެއްވެސް ގެއްލުމެއް ނުލިބޭނެއެވެ. މި ނިންމުމާ ގުޅިގެން ގިނަ ބައެއްގެ މެދުގައި ތަފާތު ޚިޔާލުތައް ދަނީ ފާޅުކުރެވެމުންނެވެ. ބައެއް ފަރާތްތަކުން ގަބޫލުކުރާ ގޮތުގައި ފީފާއިން މިގޮތަށް ނިންމީ އާންމުންގެ ފަރާތުން ކުރިމަތިވި ފާޑުކިއުންތަކާއި ޕްރެޝަރުގެ ސަބަބުންނެވެ. އަދި ބައެއް މީހުން ބުނަމުން ދަނީ މިއީ އިދާރީ މައްސަލަތަކެއްގެ ސަބަބުން މުބާރާތުން ފުރުސަތު ގެއްލުނު ރެފްރީއަކަށް ލިބުނު ބޮޑު އިންސާފެއް ކަމަށެވެ. އަނެއްކޮޅުން، މުސާރަ ފުރިހަމައަށް ލިބުނު ނަމަވެސް، ވޯލްޑް ކަޕް ފަދަ ބޮޑު މުބާރާތެއްގައި ރެފްރީކަން ކުރުމުގެ ސަބަބުން ލިބޭނެ ތަޖުރިބާ އާއި ޝަރަފާ މި ފައިސާ އަޅާ ނުކިޔޭނެ ކަމަށް ވެސް ފުޓްބޯޅަ ސަޕޯޓަރުން ފާހަގަކުރެއެވެ. އެހެންނަމަވެސް، މި ހާދިސާގެ ސަބަބުން އޮމާރު އަރްތާންގެ ނަން މުޅި ދުނިޔެއަށް މަޝްހޫރުވެގެން ގޮސްފައިވާކަން ގިނަ ބަޔަކު ގަބޫލުކުރެއެވެ. މިދިޔަ އަހަރުގެ އެފްރިކާގެ އެންމެ މޮޅު ރެފްރީގެ މަގާމު ހޯދާފައިވާ އަރްތާންއަށް ވޯލްޑް ކަޕްގެ ފުރުސަތު ގެއްލުނު ނަމަވެސް، އޭނާއަށް ވަނީ އިތުރު ބޮޑު ފުރުސަތެއް ލިބިފައެވެ. އެގޮތުން ސަލްޒްބާގްގައި ކުޅުމަށް ހަމަޖެހިފައިވާ ޕީއެސްޖީ އާއި އެސްޓަން ވިލާ ބައްދަލުކުރާ ޔޫއީއެފްއޭ ސުޕަ ކަޕް މެޗުގައި އިންސާފުކުރުމުގެ ފުރުސަތު އޭނާއަށް ވަނީ ދީފައެވެ.